.jpg)
ដោយ លោក ជា វិបុល
ប្រមុខរដ្ឋាភិបាលកម្ពុជា លោក ហ៊ុន សែន បានក្រើនរំលឹកអំពីបម្រាមហាមមិនឱ្យពលរដ្ឋខ្មែរជួល
ដីនៅតាម ព្រំដែនទៅឱ្យពលរដ្ឋប្រទេសជិតខាង ដែលរួមមានប្រទេសវៀតណាម ថៃ និងឡាវ។
លោកនាយករដ្ឋមន្ត្រី ហ៊ុន សែន ថ្លែងជាសាធារណៈទៅកាន់អាជ្ញាធរគ្រប់ខេត្តដែលមានព្រំប្រទល់ជាប់ ប្រទេសវៀតណាម ថា “ហាមដាច់ខាតការជួលដីឱ្យប្រជាជនវៀតណាម”។ លោក ហ៊ុន សែន ប្រកាសបែបនេះនៅក្នុងពិធីសំណេះសំណាលជាមួយមន្ត្រីរាជការ និងកងកម្លាំងប្រដាប់អាវុធ កាលពីថ្ងៃទី១៦ ខែសីហា នៅខេត្តតាកែវ ហើយត្រូវបានលោកសរសេររៀបរាប់ក្នុងហ្វេសប៊ុក (Facebook) របស់លោកនៅព្រឹកថ្ងៃទី១៧ ខែសីហាបន្ថែមទៀត។
ទន្ទឹមនឹងនេះ លោក ហ៊ុន សែន ក៏បានក្រើនរំលឹកមន្ត្រីរបស់ខ្លួនឱ្យយកចិត្តទុកដាក់ថែរក្សា សន្តិ
សុខសណ្ដាប់ធ្នាប់សង្គម ផ្ដល់សេវាសាធារណៈ និងដោះស្រាយបញ្ហារបស់ប្រជាជនឱ្យបានឆាប់
រហ័ស សមស្រប និងមានប្រសិទ្ធភាព។ លោកសង្កត់ធ្ងន់ថា មន្ត្រីត្រូវគិតថា ខ្លួនជាអ្នកបម្រើពលរដ្ឋ និងត្រូវខិតខំលុបបំបាត់ឱ្យអស់នូវភាពអសកម្មនានា។
អ្នកស្រាវជ្រាវខាងការអភិវឌ្ឍសង្គម បណ្ឌិត មាស នី យល់ឃើញថា ទន្ទឹមនឹងសេចក្ដីអំពាវនាវនេះ រដ្ឋាភិបាលគួរតែប្រឹងប្រែងអភិវឌ្ឍតំបន់ព្រំដែនឱ្យមានការរីក ចម្រើន។ លោកថា ការជួលដីទៅឱ្យពលរដ្ឋប្រទេសជិតខាងនេះ ដោយសារប្រជាជននៅតំបន់ជាប់ព្រំដែនមានជីវភាពក្រីក្រ ដូច្នេះទើបបង្ខំចិត្តជួលដីឱ្យទៅគេ និងខ្លះទៀតធ្វើចំណាកស្រុក។
កាលពីថ្ងៃទី១៧ ខែវិច្ឆិកា ឆ្នាំ២០១៥ រដ្ឋាភិបាលបានចេញសារាចរហាមប្រជាពលរដ្ឋខ្មែរមិនឱ្យលក់ ឬ ជួលដីស្រែ ដីចម្ការ ឬ ដីលំនៅឋាន នៅតាមព្រំដែនទៅឱ្យប្រជាពលរដ្ឋនៃប្រទេសជិតខាង ទោះបី
ជាក្នុងរូបភាពណាក៏ដោយ។ វិធានការនេះត្រូវបានដាក់ចេញ បន្ទាប់ពីប្រជាពលរដ្ឋខ្មែរមួយចំនួនបានជួលដីស្រែដីចម្ការ ឬដីលំនៅឋានរបស់ខ្លួននៅតាមតំបន់ព្រំដែន ឱ្យទៅប្រជាពលរដ្ឋនៃប្រទេសជិតខាងដូចជា វៀតណាម ឡាវ និងថៃ ដើម្បីបង្កបង្កើនផល ដាំដុះដំណាំ ឬប្រកបអាជីវកម្មផ្សេងៗ ដែលអាចប៉ះពាល់ដល់អធិបតេយ្យភាព បូរណភាពទឹកដី និងផលប្រយោជន៍ប្រជាពលរដ្ឋខ្មែរ។
ទោះបីជាយ៉ាងណា ករណីជួលដីទៅឱ្យពលរដ្ឋប្រទេសជិតខាងនៅបន្តកើតមានដដែល ជាពិសេសនៅតាមបណ្ដោយព្រំដែនកម្ពុជា-វៀតណាម។ ជាឧទាហរណ៍ ពលរដ្ឋនៅក្នុងក្រុងបាវិត ខេត្តស្វាយ
រៀង អះអាងថា ជនជាតិវៀតណាម បន្តចូលមកជួលដីខ្មែរធ្វើកសិកម្មកាន់តែច្រើន ដែលបង្កផលប៉ះពាល់ដល់ជីវភាពរស់នៅរបស់ពួកគាត់។ ប្រជាពលរដ្ឋនោះអះអាងថា ជនជាតិវៀតណាម មិនបានជួលដីដោយផ្ទាល់នោះទេ ប៉ុន្តែបានជួលខ្មែរឱ្យធ្វើជាតំណាងដើម្បីលាក់បាំងការពិត ដែលបញ្ហានេះមិនទាន់ត្រូវបានអាជ្ញាធរដោះស្រាយនៅឡើយ។
ការប្រកាសមិនឲ្យពលរដ្ឋខ្មែរនៅតាមព្រំដែនជួលដីឲ្យទៅប្រទេសជិតខាងនេះត្រូវបានពលរដ្ឋ
ខ្មែរទូទៅស្វាគមន៏យ៉ាងខ្លាំងចំពោះការរំឮករបស់ប្រមុខរដ្ឋាភិបាលនាពេលនេះ៕
0 comments:
Post a Comment