អ្នកស្រី បូ ឆវី សកម្មជនដីធ្លីបឹងកក់ម្នាក់ក្នុងចំណោម៤នាក់ទ្រហូយំនៅមុខតុលាការភ្នំពេញ
បន្ទាប់ពីត្រូវបានផ្តន្ទាទោសឲ្យជាប់ពន្ធនាគារ៦ខែនៅព្រឹកមិញនេះ
អ្នកស្រីបូ ឆវីជាសកម្មជនដីធ្លីម្នាក់ក្នុងចំណោមស្រ្តីសកម្មជនដីធ្លីបឹងកក់៤នាក់បានទ្រហូយំបន្ទាប់
ពីចៅក្រមសាលាដំបូងរាជធានីភ្នំពេញ សម្រេចផ្ដន្ទាទោសពួកគេទាំង៤ នាក់ ដាក់ពន្ធនាគារ៦ខែ ពីបទប្រមាថអ្នករាជការសាធារណៈ និងបទប្រឆាំងនឹងអ្នករាជការសាធារណមានស្ថានទម្ងន់ទោស។
ក្នុងសវនាការនៅថ្ងៃទី១៩ កញ្ញានេះ ស្ត្រីសកម្មជនដីធ្លីបឹងកក់ ៤នាក់ដែលត្រូវតុលាការផ្ដន្ទាទោសនោះមានវត្តមានតែបីនាក់ប៉ុណ្ណោះ គឺអ្នកស្រី ទេព វន្នី អ្នកស្រី បូ ឆវី អ្នកស្រី គង់ ចន្ថា។ ចំណែកអ្នកស្រី ហេង មុំ ពុំមានវត្តមានក្នុងសវនាការឡើយ។
អ្នកនាំពាក្យសាលាដំបូងរាជធានីភ្នំពេញ លោក លី សុផាណា ឲ្យដឹងថា ការផ្ដន្ទាទោសអ្នកទាំង៤តាមមាត្រា ៥០២ និងមាត្រា ៥០៤ នៃក្រមព្រហ្មទណ្ឌ ប្រព្រឹត្តនៅមុខសាលារាជធានីភ្នំពេញ កាលពីថ្ងៃទី២៨ ខែវិច្ឆិកា ឆ្នាំ២០១១។
យ៉ាងណាក៏ដោយ ស្ដ្រីសកម្មជនបឹងកក់ទាំង៣នាក់ រួមនឹងសកម្មជនដទៃទៀត ដែលតវ៉ានៅខាងក្រៅរបងតុលាការ ហៅការសម្រេចរបស់តុលាការនៅពេលនេះ ជារឿងអយុត្តិធម៌បំផុត។
មាត្រា៥០២ នៃក្រមព្រហ្មទណ្ឌ ចែងពីបទប្រមាថ ថា ជនដែលប្រមាថមន្ត្រីរាជការសាធារណៈ ឬពលរដ្ឋទទួលអាណត្តិសាធារណៈដោយការបោះឆ្នោត នៅក្នុងក្របខ័ណ្ឌមុខងារ ដោយវាចា កាយវិការ សំណេរ គំនូរ ឬវត្ថុដែលប៉ះពាល់ដល់សេចក្ដីថ្លៃថ្នូរនៃបុគ្គល ត្រូវផ្ដន្ទាទោសដាក់ពន្ធនាគារពី១ថ្ងៃ ដល់៦ថ្ងៃ និងពិន័យជាប្រាក់ ពី១ពាន់រៀល ដល់១សែនរៀល។
ចំណែកមាត្រា៥០៤ នៃក្រមព្រហ្មទណ្ឌ ដែលចែងអំពីស្ថានទម្ងន់ទោសនៃបទប្រឆាំងនឹងអ្នករាជការសាធារណៈ ត្រូវផ្ដន្ទាទោសដាក់ពន្ធនាគារពី៦ខែ ដល់១ឆ្នាំ និងពិន័យជាប្រាក់ ពី១លានរៀល ដល់២លានរៀល។ ក្នុងករណីអ្នកប្រព្រឹត្តិមានច្រើនគ្នា ធ្វើសកម្មភាពក្នុងឋានជាចារី សហចារី អ្នកផ្ដើមគំនិត ឬជាអ្នកសមគំនិត ហើយចារីមានអាវុធ។
ទោះជាយ៉ាងណាគណបក្សប្រឆាំងនិងអង្គការសង្គមស៊ីវិលចាត់ទុកថាការកាត់ទោសនេះគឺជា
រឿងនយោបាយហើយក្នុងគោលបំណងបិទសិទ្ធិសេរីភាពបញ្ចេញមតិនិងសេរីភាពប្រមូលផ្តុំ៕
0 comments:
Post a Comment