លោកស្រី រ៉ូ ណាស្មីត និងលោក កឹម សុខាជួបគ្នានៅស្នាក់ការបក្សសង្គ្រោះជាតិ
កាលពីថ្ងៃ ពុធ
ដោយ កញ្ញា សុខ ឆេង
គណបក្សសង្គ្រោះជាតិស្នើទៅអ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិ
មនុស្សនៅកម្ពុជា ជួយដោះស្រាយវិបត្តិនយោបាយនៅកម្ពុជា ដោយថាដើម្បីឲ្យការបោះឆ្នោត
ទទួលបានសេរី ត្រឹមត្រូវ និងយុត្តិធម៌។
ក្រោយពីជំនួបបិទទ្វារប្រហែល១ម៉ោងរវាងលោកស្រីរ៉ូណា ស្មីតនិងលោកកឹម សុខានៅថ្ងៃពុធ តំណាងរាស្ត្រគណបក្សសង្គ្រោះជាតិលោក អេង ឆៃអ៊ាង បានថ្លែងប្រាប់អ្នកសារព័ត៌មាននៅ
ទីស្នាក់ការកណ្តាលគណបក្សថា អ្នករាយការណ៍ពិសេសអង្គការសហប្រជាជាតិទទួលបន្ទុក
សិទ្ធិមនុស្សលោកស្រី រ៉ូណា ស្មីត មកជួបថ្នាក់ដឹកនាំគណបក្សសង្គ្រោះជាតិ ដើម្បីស្តាប់ពី
ស្ថានភាពនយោបាយនៅកម្ពុជា ពីអភ័យឯកសិទ្ធិតំណាងរាស្ត្រស្ថានភាពច្បាប់ទាក់ទងនឹង
សកម្មជន ថ្នាក់ដឹកនាំគណបក្សសង្គ្រោះជាតិ ជាពិសេសរឿងបណ្តឹងប្រឆាំងលោក កឹម សុខា
នៅតុលាការជាដើម។
លោក អេង ឆៃអ៊ាង ថ្លែងទៀតថា គណបក្សសង្គ្រោះបានស្នើទៅ លោកស្រី រ៉ូណា ស្មីតជួយ
អន្តរាគមន៍ទៅរដ្ឋាភិបាលកម្ពុជាដើម្បីឲ្យស្ថានការណ៍នយោបាយនៅកម្ពុជាវិលទៅរកប្រក្រតីភាព
ឡើងវីញ។
លោកបញ្ជាក់ថា៖ «យើងស្នើសុំឲ្យគាត់ជួយធ្វើម៉េចឲ្យទប់ស្កាត់នូវរាល់ស្ថានភាពនៃការរំលោភសិទ្ធិ
មនុស្ស សិទ្ធិនយោបាយ ធ្វើម៉េចឲ្យបរិយាកាសនយោបាយឲ្យវិលទៅរកភាពប្រក្រតីឡើងវិញ ហើយ
ដើម្បីធានាឲ្យមានការបោះឆ្នោតដោយសេរី ត្រឹមត្រូវ និងស្មើភាព»។
ទាក់ទងនឹងករណីនេះ លោកស្រី រ៉ូណា ស្មីត បានថ្លែងប្រាប់អ្នកសារព័ត៌មានយ៉ាងខ្លីថា កម្ពុជានៅ
មានការងារច្រើនដែលត្រូវជជែកគ្នា ដើម្បីឲ្យការអនុវត្តច្បាប់ស្របតាមរដ្ឋធម្មនុញ្ញកម្ពុជា។
លោកស្រីបញ្ជាក់ថា៖ «ខ្ញុំគិតថា កម្ពុជា មានបញ្ហាជាច្រើនដែលត្រូវបានពិភាក្សាគ្នា ដើម្បីធ្វើឱ្យ
ប្រាកដថារដ្ឋធម្មនុញ្ញអនុវត្តឱ្យបានត្រឹមត្រូវ»។
ភាពតានតឹងផ្នែកនយោបាយនៅកម្ពុជាបានកើនឡើងខ្លាំងនៅពេលដែលតុលាការកាត់ទោស លោក កឹម សុខា ឲ្យជាប់ទោស៥ខែនិងពិន័យជាប្រាក់៨សែនរៀលពីបទបដិសេធមិនចូល
ខ្លួនពាក់ព័ន្ធសំណុំរឿងស្នេហាជាមួយនាងខុមចាន់តារាទីហៅស្រីមុំ។
ក្រោយពីតុលាការសម្រេចទោសនេះរួចមក គណបក្សប្រឆាំងបានប្រកាសឲ្យអ្នកគាំទ្រខ្លួនត្រៀម
ធ្វើបាតុកម្មដោយទាមទារឲ្យមានការការពារសិទ្ធិសេរីភាពបញ្ចេញមតិ របបប្រជាធិបតេយ្យសេរី
ពហុបក្ស និងអភ័យឯកសិទ្ធិសភា ដែលចែងនៅក្នុងរដ្ឋធម្មនុញ្ញ។ក៏ប៉ុន្តែលោកនាយករដ្ឋមន្ត្រី ហ៊ុន សែន បានព្រមានប្រើកម្លាំងប្រដាប់អាវុធបង្ក្រាបបាតុកម្មនេះ។
អ្នកនាំពាក្យគណបក្សប្រជាជនកម្ពុជាលោក សុខ ឥសាន មានប្រសាសន៍ថា ដើម្បីកុំឲ្យស្ថានភាព
នយោបាយនៅកម្ពុជាឡើងកម្តៅ លោកថា ថ្នាក់ដឹកនាំ មន្ត្រី និងអ្នកគំាទ្របក្សប្រឆំាង ឈប់ប្រព្រឹត្ត
បទល្មើសបន្តទៀត ដោយលោកថា អ្នកប្រព្រឹត្តបទល្មើសពីមុន ទុកឲ្យតុលាការចាត់វិធានការតាម
នីតិវិធីច្បាប់។ ផ្ទុយទៅវិញលោកថា បើតំណាងUN ជួយអន្តរាគមន៍លើរឿងអ្នកប្រព្រឹត្តល្មើសនៅ
កម្ពុជា លោកថារំលោភលើនីតិរដ្ឋនៅកម្ពុជាហើយ។
លោកបញ្ជាក់ថា៖ «បើគាត់ចូលអន្តរាគមន៍លូកដៃចូលទៅក្នុងបញ្ហានេះ(លូកដៃលើអ្នកប្រព្រឹត្តបទ
ល្មើសព្រហ្មទណ្ឌ)បានសេចក្តីថាគាត់យកវប្បធម៌និទណ្ឌភាពមកជំនួសឲ្យនីតិរដ្ឋ ដែលជាស្មារតីនៃ
កិច្ចព្រមព្រៀងសន្តិភាពទីក្រុងបារីស»។
លោកស្រី រ៉ូណា ស្មីត ត្រូវបំពេញទស្សនកិច្ចរយៈពេល១០ថ្ងៃនៅកម្ពុជា ចាប់ពីថ្ងៃទី១០ រហូតដល់ ថ្ងៃទី១៩ ខែតុលា ឆ្នាំ២០១៦។ អ្នកស្រីនឹងផ្តោតដំណើរបេសកកម្មនេះលើស្ថានភាពបច្ចុប្បន្ននៃសិទ្ធិមនុស្ស និងតាមដានការអនុវត្ត
អនុសាសន៍នានាដែលបានផ្តល់ជូនរដ្ឋាភិបាលកម្ពុជាកន្លងមក។
លោកស្រីក៏បានជួបលោកប៉ា សុជាតិវង្សអភិបាលរាជធានីភ្នំពេញកាលពីថ្ងៃអង្គារបន្ទាប់ពីក្រុម
សន្តិសុខខណ្ឌដូនពេញបានវាយលោកអំសំអាតមន្ត្រីការពារសិទ្ធិមនុស្សជាន់ខ្ពស់របស់អង្គការ
លីកាដូ។ក៏ប៉ុន្តែលោកប៉ាសុជាតិវង្សអះអាងថាអាជ្ញាធររកមិនឃើញភស្តុតាងបញ្ជាក់ថាក្រុម
សន្តិសុខខាងលើបានវាយទៅលើមន្ត្រីសិទ្ធិរូបនេះទេ៕
0 comments:
Post a Comment