លោកនាយករដ្ឋមន្ត្រី ហ៊ុន សែនប្រើម្រាមដៃពីរចង្អុលទៅលើមេបក្សប្រឆាំងទាំងពីរ
បន្ទាប់កិច្ចប្រជុំចរចានៅព្រឹទ្ធសភាកន្លងមក។ នៅពេលមេបក្សប្រឆាំងទាំងពីរមិន
អាចចុះមូលដ្ឋានបានទេដោយកំពុងជាប់បណ្តឹងនៅតុលាការ។
ដោយ កញ្ញា សុខ ឆេង
លោកនាយករដ្ឋមន្ត្រីហ៊ុន សែន នៅព្រឹកមិញនេះបានចាប់ផ្តើមបន្តយុទ្ធនាការចុះទៅកាន់បណ្តា
ខេត្តទិសពាយ័ព្យនៃប្រទេសកម្ពុជាខណះមេដឹកនាំបក្សប្រឆាំងទាំងពីរគឺលោកសម រង្ស៊ីនិងលោក
កឹម សុខាមិនអាចបំពេញកិច្ចការនយោបាយរបស់ខ្លួននៅតាមមូលដ្ឋានបានឡើយដោយសារ
កំពុងជាប់បណ្តឹងនៅតុលាការ។
លោកនាយករដ្ឋមន្ត្រីអះអាងថាយុទ្ធនាការរបស់លោកនៅតំបន់ពាយ័ព្យនេះគឺជាផ្នែកមួយនៃ
ដំណើរចុះមូលដ្ឋានរបស់លោកដើម្បីពិនិត្យមើលនិងដោះស្រាយបញ្ហាប្រឈមមួយចំនួនដល់
មន្ត្រីរាជការ និងប្រជាពលរដ្ឋនៅទីនោះ។
នៅលើទំព័រហ្វេសប៊ុកផ្លូវការរបស់លោកបង្ហោះនៅព្រឹកថ្ងៃអង្គារនេះមានខ្លឹមសារថា “ខ្ញុំកំពុងធ្វើ
ដំណើរទៅកាន់ខេត្តសៀមរាប ខេត្តបន្ទាយមានជ័យ និងខេត្តមួយចំនួនទៀតនាទិសពាយ័ព្យ
នៃមាតុប្រទេសដើម្បីពិនិត្យសមិទ្ឋផលជាតិ និងចុះសួរសុខទុក្ខប្រជាពលរដ្ឋ មន្រ្តីរាជការ និង
កងកម្លាំងប្រដាប់អាវុធនៅតាមបណ្តាខេត្តទាំងនោះ នឹងពិនិត្យដោះស្រាយបញ្ហាប្រឈមជាក់ស្តែង
មួយចំនួនជូនប្រជាពលរដ្ឋ លោកគ្រូ អ្នកគ្រូ និងសិស្សានុសិស្សផងដែរ”។
តាមវីដេអូមួយបានបង្ហោះលើហ្វេសប៊ុករបស់លោក ឃើញថាលោកនាយករដ្ឋមន្ត្រីចុះសួរសុខទុក្ខ
សិស្សានុសិស្សនៅសាលាបឋមសិក្សាគោកលុន ស្ថិតក្នងភូមិភ្នំជញ្ជាំង ឃុំជប់វារី ស្រុកព្រះនេត្រ
ព្រះ ខេត្តបន្ទាយមានជ័យ ខណៈជំនន់ទឹកភ្លៀងបានជនលិចនៅក្នុងបរិវេណសាលារៀននោះ។
លោកនាយករដ្ឋមន្ត្រី ហ៊ុន សែន បានធ្វើដំណើរចុះទៅតាមបណ្ដាខេត្តនានាចាប់តាំងពីចុងខែ
កក្កដាកន្លងមក នៅក្នុងយុទ្ធនាការចុះមើលសមិទ្ធផលជាតិនៅទូទាំង២៥ខេត្តក្រុង។
អ្នកតាមដាននយោបាយកម្ពុជាមើលឃើញថាលោកនាយករដ្ឋមន្ត្រីបើកយុទ្ធនាការធ្វើដំណើរចុះតាម
បណ្ដាខេត្តរបស់លោកនេះគឺដើម្បីស្វែងរកការគាំទ្រពីប្រជាពលរដ្ឋនៅមុនការបោះឆ្នោតក្រុមប្រឹក្សា
ឃុំ-សង្កាត់នៅឆ្នាំ២០១៧និងការបោះឆ្នោតជាតិនៅឆ្នាំ២០១៨ខាងមុខ បន្ទាប់ពីគណបក្សកាន់
អំណាចរបស់លោកបានប្រើប្រាស់ប្រព័ន្ធតុលាការគាបសង្កត់មេដឹកនាំគណបក្សសង្ក្រោះជាតិ
មិនអាចចុះមូលដ្ឋានជួបអ្នកគាំទ្ររបស់ខ្លួនបាននាពេលនេះ៕
0 comments:
Post a Comment