តម្កល់ក្នុងព្រះបរមរាជវាំងថៃ
ដោយ កញ្ញាប្រាក់ ដាលីន
នៅទីបំផុតព័ត៌មានចម្រូងចម្រាសថាព្រះមហាក្សត្រថៃ ភូមិបុល អាដុលយ៉ាដេ (Bhumibol
Adulyadej) បានសោយទិវង្គតនោះគឺក្លាយជាការពិតមែនទែនហើយដោយនៅថ្ងៃទី១៣ តុលា ទ្រង់បានលាចាកលោកនេះនៅឯមន្ទីរពេទ្យស៊ីរីរ៉ាត (Siriraj) ក្នុងក្រុងបាងកក ក្នុងជន្មាយុ
៨៨ព្រះវស្សា។
ព្រះអង្គបានឡើងគ្រងរាជ្យអស់រយៈពេលជាង ៧០ព្រះវស្សា និងក្លាយជាព្រះមហាក្សត្រមួយ
អង្គគ្រងរាជ្យសម្បត្តិយូរជាងគេបំផុតនៅលើពិភពលោក។
ទីភ្នាក់ងារសារព័ត៌មានអេភី (AP) បានស្រង់សំដីនាយករដ្ឋមន្ត្រីថៃ លោក ប្រាយុទ្ធ ចាន់អូចា (Prayuth Chan-ocha) ដែលប្រកាសនៅថ្ងៃនេះថា ព្រះអង្គម្ចាស់ មហា វ៉ាជីរ៉ាឡុងកន (Maha Vajiralongkorn) ព្រះជន្ម ៦៤ ព្រះវស្សា នឹងត្រូវគ្រងរាជ្យបន្តពីព្រះបិតា ដោយយោងតាមរដ្ឋធម្មនុញ្ញថៃ។ ប៉ុន្តែព្រះអង្គម្ចាស់មិនសូវមានប្រជាប្រិយភាព ឬទទួលបានគោរពខ្លាំងដូចព្រះរាជបិតារបស់ព្រះអង្គឡើយ។
ទីផ្សារភាគហ៊ុនរបស់ថៃ បានធ្លាក់ចុះយ៉ាងគំហុក។ ចំណែកប្រាក់បាតថៃ ក៏ធ្លាក់ថ្លៃខ្លាំងភ្លាមៗមួយរំពេចផងដែរ ដោយសារដំណឹងអំពីការសោយទិវង្គតរបស់ព្រះអង្គជាទីគោរពសក្ការះរបស់
ប្រជាជាតិថៃទាំងមូលអង្គនេះ។ សាកសពរបស់ទ្រង់កំពុងត្រូវបានដាក់តម្កល់ក្នុងព្រះបរមរាជវាំង
ថៃដើម្បីរៀបចំព្រះរាជពិធីទៅតាមប្រពៃណីព្រះរាជវង្សារបស់ប្រទេសនេះ៕
0 comments:
Post a Comment