.jpg)
លោក កឹម សុខាពេលមកដល់លំនៅដ្ឋានរបស់លោកនៅសង្កាត់ទឹកល្អក់១ ខណ្ឌទួលគោក
នា ព្រឹកមិញនេះ
ដោយ លោក នុប គីម
លោក កឹម សុខាប្រធានស្តីទីគណបក្សសង្គ្រោះជាតិ បានផ្ញើលិខិតអរគុណលោកនាយករដ្ឋមន្ត្រី
ហ៊ុន សែន ដែលបានស្នើសុំព្រះមហាក្សត្រលើកលែងទោសឲ្យលោកកាលពីថ្ងៃ ទី២ ខែធ្នូ។
លោក កឹម សុខា បញ្ជាក់ក្នុងលិខិតថា ការសម្រេចដោយពិចារណាដ៏ត្រឹមត្រូវរបស់លោក ហ៊ុន សែន គឺជាការបង្ហាញឲ្យប្រជាជាតិឃើញថា ខ្មែរចេះដោះស្រាយបញ្ហាជាតិដោយខ្មែរ និងខ្មែរ ព្រមទាំងបង្ហាញឲ្យពិភពលោកមើលឃើញថា អ្នកនយោបាយខ្មែរមានការអធ្យាស្រ័យ អត់ឱន
ឲ្យគ្នាទៅវិញទៅមក ស័ក្ដិសមជាប្រជាជាតិមានអារ្យធម៌ខ្ពស់ និងជាអ្នកកាន់ព្រះពុទ្ធសាសនា។
មុនឈានដល់ការលើកលែងទោសនៅថ្ងៃទី២ ខែធ្នូ លោក កឹម សុខា កាលពីថ្ងៃទី១ ខែធ្នូ ស្នើឲ្យលោក ហ៊ុន សែន ស្នើសុំទៅព្រះមហាក្សត្រលើកលែងទោសឲ្យលោក។ លោក ហ៊ុន សែន បានថ្វាយលិខិតស្នើសុំទៅកាន់ព្រះមហាក្សត្រនៅថ្ងៃទី២ ខែធ្នូ ហើយព្រះមហាក្សត្រចេញព្រះរាជ
ក្រឹត្យលើកលែងទោសឲ្យលោក កឹម សុខា ក្នុងថ្ងៃតែមួយ។
ការលើកលែងទោសឲ្យលោក កឹម សុខា ធ្វើឡើងក្រោយពីលោក សម រង្ស៊ី ប្រធានគណបក្ស
សង្គ្រោះជាតិ បង្ហាញជំហរគាំទ្រចំពោះលោក ហ៊ុន សែន ដែលបានឯកភាពជាមួយវៀតណាម
ក្នុងការស្នើឲ្យអ្នកបច្ចេកទេសបារាំង ជួយបំប្លែងផែនទីបោន (Bonne) ដែលកម្ពុជា មានបច្ចុប្បន្ន
ទៅជាផែនទី យូ.ធី.អឹម (UTM) ដើម្បីប្រើប្រាស់បោះបង្គោលព្រំដែនរវាងប្រទេសទាំងពីរដែលនៅសេសសល់។ ការបំប្លែងផែនទីនេះ ក៏បង្កឲ្យមានការពិភាក្សាថា អាចឈានដល់ការកែប្រែ មាត្រា២ នៃរដ្ឋធម្មនុញ្ញដែលទាមទារឲ្យមានការចូលរួមរបស់បក្សប្រឆាំងនៅពេលខាងមុខ។
ក្នុងពេលជាមួយគ្នាការលើកលែងទោសនេះ ក៏ស្របពេលមានការផ្សព្វផ្សាយព្រោងព្រាតនូវសារឆ្លើយឆ្លងដែលគេសង្ស័យថា រវាងលោក ហ៊ុន សែន និងកូនប្រុសលោក ហ៊ុន សែន គឺលោក ហ៊ុន ម៉ានិត ជាមួយកញ្ញា ធី សុវណ្ណថា ពីផែនការតាមយាយីលោក កឹម សុខា។
មន្ត្រីជាន់ខ្ពស់គណបក្សប្រជាជនកម្ពុជា អះអាងថា ការសម្រេចចិត្តរបស់លោកនាយករដ្ឋមន្ត្រី ហ៊ុន សែន ស្នើព្រះមហាក្សត្រលើកលែងទោសឲ្យលោក កឹម សុខា ប្រធានស្ដីទីគណបក្សសង្គ្រោះជាតិ
គឺមិនមានការដោះដូរអ្វីឡើយ។ ចំណែកបក្សប្រឆាំងចាត់ទុកការលើកលែងទោសនេះថា ជាដំណោះស្រាយនយោបាយរវាងខ្មែរនិងខ្មែរ។
លោក កឹម សុខា ដែលត្រូវបានតុលាការកាត់ទោសឲ្យពន្ធនាគារចំនួន ៥ខែ ពាក់ព័ន្ធនឹងការមិន
ចូលខ្លួនតាមការកោះហៅរបស់តុលាការ ពេលនេះលោកនឹងមានសេរីភាពវិញហើយ ក្រោយមានការលើកលែងទោសពីព្រះមហាក្សត្រ នៅថ្ងៃទី២ ខែធ្នូ។
នៅព្រឹកថ្ងៃ សៅរិ៍នេះលោកកឹមសុខាដែលបានលាក់ខ្លួននៅក្នុងស្នាក់ការកណ្តាលគណបក្ស
សង្គ្រោះជាតិនៅសង្កាត់ចាក់អង្រែលើជាង៥ខែមកនោះបានត្រឡប់ទៅកាន់លំនៅដ្ឋានរបស់
លោកវិញហើយនៅព្រឹកមិញនេះ។
ទោះជាយ៉ាងណាក៏ដោយ អ្នកនាំពាក្យគណបក្សប្រជាជនកម្ពុជា លោក សុខ ឥសាន អះអាងថា ការស្នើរបស់លោក ហ៊ុន សែន សុំព្រះមហាក្សត្រលើកលែងទោសឲ្យលោក កឹម សុខា នៅពេល
នេះ គឺគ្មានការដោះដូរអ្វីឡើយ។ លោក សុខ ឥសាន បញ្ជាក់ថា ការស្នើសុំនេះ គឺដោយសារតែលោក កឹម សុខា បានស្នើទៅលោក ហ៊ុន សែន។ ម្យ៉ាងទៀត លោកថា ការលើកលែងទោសឲ្យលោក កឹម សុខា នៅចំថ្ងៃទី២ ខែធ្នូ គឺជាការបង្កើតនូវប្រវត្តិសាស្ត្រថ្មីមួយទៀតរបស់បក្សកាន់អំណាច។
លោក សុខ ឥសាន៖ «គាត់សរសេរលិខិតទៅសម្ដេចនាយកទទួលស្គាល់ការពិត ម្យ៉ាងវាមិនមែន
ជារឿងចៃដន្យទេ ពីព្រោះថ្ងៃនេះជាថ្ងៃ២ ធ្នូ ហើយថ្ងៃ២ ធ្នូ ជាថ្ងៃប្រវត្តិសាស្ត្រ ជាថ្ងៃប្រមូលផ្តុំកម្លាំងមហាសាមគ្គីជាតិដើម្បីផ្ដួលរំលំរបបប្រល័យពូជសាសន៍។ ទី២ ដោយសារថ្ងៃ២ ធ្នូ នេះហើយ យើងមានកិច្ចចរចា សីហនុ-ហ៊ុន សែន ដើម្បីសម្រេចបានផ្លែផ្កានូវកិច្ចព្រមព្រៀងសន្តិភាពក្រុងប៉ារីស ២៣ តុលា ឆ្នាំ១៩៩១។ ឥឡូវ ២ ធ្នូ នេះទៀត លើកលែងទោសឲ្យមេដឹកនាំបក្សប្រឆាំង»។
អ្នកនាំពាក្យគណបក្សសង្គ្រោះជាតិ នៅរដ្ឋសភា លោក យ៉ែម បុញ្ញឫទ្ធិ មានប្រសាសន៍ថា បក្សប្រឆាំងស្វាគមន៍ចំពោះការលើកលែងទោសនេះ។ លោកថា នេះជាដំណោះស្រាយនយោបាយ
រវាងខ្មែរនិងខ្មែរ។
លោក យ៉ែម បុញ្ញឫទ្ធិ បញ្ជាក់ថា ការស្នើលោក ហ៊ុន សែន ឲ្យសុំព្រះមហាក្សត្រលើកលែងទោសឲ្យលោក កឹម សុខា គឺពុំមានចងលក្ខខណ្ឌអ្វីឡើយ។
លោកសង្កត់ធ្ងន់ថា៖ «គ្មានលក្ខខណ្ឌ គ្មានអ្វីទាំងអស់ ដូច្នេះជាដំណោះស្រាយនយោបាយមួយរវាងខ្មែរ និងខ្មែរ ហើយយើងកំពុងទទួលបានទូរស័ព្ទពីក្រុមគ្រួសារសកម្មជន សង្គមស៊ីវិល គ.ជ.ប លោកចង់ឲ្យឯកឧត្ដម កឹម សុខា ព្យាយាមរកដំណោះស្រាយតាមរយៈការព្រះរាជទានលើកលែងទោសរបស់ព្រះមហាក្សត្រដែរ។ យើងនឹងព្យាយាមខិតខំ យើងមានជំនឿក្នុងដំណោះស្រាយរវាងខ្មែរនិងខ្មែរក្នុងបញ្ហានេះ»៕
0 comments:
Post a Comment