លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រម៉ាញ និងនេសាទ
ក្រសួងកសិកម្មបានបន្ថែមក្រុមអ្នកនាំពាក្យនិងឆ្លើយឆ្លងព័ត៌មានជាមួយអ្នកសារព័ត៌មានដោយតែង
តាំងមន្ត្រីជំនាញរបស់ខ្លួនចំនួន៤៦នាក់។
ទន្ទឹមនឹងនេះដែរ ក្រសួងបរិស្ថានក៏បានបន្ថែមអ្នកនាំពាក្យរបស់ខ្លួនដល់ទៅ៩នាក់សម្រាប់ធ្វើការ
ឆ្លើយតបជាមួយអ្នកសារព័ត៌មានជាតិនិងអន្តរជាតិ។
ក្នុងសេចក្តីសម្រេចចុះថ្ងៃទី២ មករា ឆ្នាំ២០១៧ ក្រសួងកសិកម្មបានឲ្យដឹងថាខ្លួនបានសម្រេចកែសម្រួលនិងបំពេញបន្ថែមក្រុមអ្នកនាំពាក្យនិងឆ្លើយឆ្លងព័ត៌មានរបស់ក្រសួងចំនួន៤៦នាក់ ក្នុងការងារឆ្លើយឆ្លងជាមួយអ្នកសារព័ត៌មាន ស្រាវជ្រាវ ចងក្រង និងរក្សាទុកព័ត៌មានការងាររបស់ក្រសួងកសិកម្ម។
ក្រុមអ្នកនាំពាក្យនិងឆ្លើយឆ្លងទាំងនោះ រាប់ចាប់ពីអគ្គលេខាធិការរហូតដល់នាយកសាកលវិទ្យាល័យកសិកម្ម ប្រធាននាយកដ្ឋានជំនាញនីមួយៗ រហូតដល់ប្រធានមន្ទីរកសិកម្មតាមខេត្តទាំងអស់។
អនុប្រធានក្រុមអ្នកនាំពាក្យក្រសួងកសិកម្ម លោក ចាន់ ហេង បានឲ្យដឹងថា មូលហេតុដែលក្រសួងសម្រេចឲ្យមានអ្នកនាំពាក្យនិងអ្នកឆ្លើយឆ្លងព័ត៌មានរហូតដល់ទៅជិត៥០នាក់នេះ ក៏
ព្រោះតែក្រសួងចង់សម្រួលដល់អ្នកសារព័ត៌មានក្នុងការផ្តល់ព័ត៌មានឲ្យចំជំនាញនិងចំខេត្ត
ដែលអ្នកសារព័ត៌មានចង់ដឹងពីបញ្ហា។ លោកបន្ថែមថា កន្លងទៅការដែលមានតែអ្នកនាំពាក្យ
នៅត្រឹមថ្នាក់ក្រសួង បានធ្វើឲ្យការឆ្លើយឆ្លងព័ត៌មានជាមួយអ្នកកាសែតមានការលំបាក ដោយ
ហេតុថាមិនសូវច្បាស់ដូចជាអ្នកធ្វើការនៅថ្នាក់ខេត្តដោយផ្ទាល់។
លោកថា៖ «ដោយសារតែក្រសួងកសិកម្មធំ ហើយព័ត៌មានវាមានពាក់ព័ន្ធផ្សេងៗគ្នាច្រើន ឧទាហរណ៍ព័ត៌មានវាមានពាក់ព័ន្ធក្នុងខេត្តណាអញ្ចឹងទៅយើងអាចមានមន្ទីរកសិកម្មណាមួយយើងអាចបំភ្លឺជូន ហើយវាពាក់ព័ន្ធជំនាញណានោះ»។
លោកបន្តថាពាក់ព័ន្ធនឹងរឿងព្រៃឈើ ខាងជលផលគឺឲ្យព្រៃឈើ និងជលផលបំភ្លឺជូន មានជំនាញច្រើន។ ពីមុនដោយសារមានតែនៅខាងថ្នាក់កណ្តាល វាមិនដល់តាមខេត្តក្រោម អញ្ចឹងទេនៅពេលមានព័ត៌មាននៅតាមខេត្តតាមអីយើងក៏មិនច្បាស់ដូចគេនៅតាមមូលដ្នានដូច្នេះបានជាចាត់បញ្ចូលប្រធានមន្ទីរតាមរាជធានីខេត្តទាំង២៥ជាសមាជិកអ្នកនាំពាក្យរបស់ក្រសួងផងដែរ។
នាយកវិទ្យាស្ថានកម្ពុជាសម្រាប់ការសិក្សាផ្នែកសារព័ត៌មានលោក មឿន ឈានណារិទ្ធិ បានគាំទ្រ
ទៅនឹងការបង្កើតឲ្យមានអ្នកនាំពាក្យនេះ តែលោកបារម្ភថាចំនួនអ្នកនាំពាក្យនិងឆ្លើយឆ្លងព័ត៌មានច្រើនមិនប្រាកដថាមានប្រសិទ្ធភាពនោះទេ។
លោក មឿន ឈានណារិទ្ធិ បន្តថាកន្លងមកមានអ្នកសារព័ត៌មានមួយចំនួនថាខ្លួនមានការលំបាក
ក្នុងការទំនាក់ទំនងទៅកាន់ក្រសួងមួយចំនួនដោយសារក្រសួងមួយចំនួនមិនមានអ្នកនាំពាក្យ ហើយអ្នកនាំពាក្យខ្លះឆ្លើយតបទៅកាន់អ្នកសារព័ត៌មានគឺមានការបិទបាំងច្រើន។
កន្លងមកគេសង្កេតឃើញថាអ្នកនាំពាក្យរបស់ក្រសួងមួយចំនួនមិនហ៊ានបញ្ចេញព័ត៌មានឬប្រាប់
អ្នកកាសែតពីព័ត៌មានដែលអ្នកកាសែតចង់បាននោះទេដោយខ្លាចថ្នាក់លើរបស់ខ្លួនស្តីបន្ទោសនិង
ដកចេញពីដំណែងហើយការខកខានមិនបានផ្តល់ព័ត៌មានដល់អ្នកកាសែតទាន់ពេលនោះក៏ជា
ឧបសគ្គមួយសម្រាប់ដំណើរការផ្សាយរបស់អង្គភាពសារព័ត៌មាននោះដែរ៕
0 comments:
Post a Comment