លោក ប្រាក់ សុខុនរដ្ឋមន្ត្រី ក្រសួងការបរទេសកម្ពុជា
បន្ទាប់ពីត្រូវបានជួយសង្គ្រោះដោយស្ថានទូតកម្ពុជាប្រចាំនៅប្រទេសជប៉ុនអោយរួចផុតពីករណីជួញដូរផ្លូវភេទ មកស្ត្រីខ្មែរចំនួន ៦នាក់ នឹងវិលមកដល់កម្ពុជា វិញនៅរសៀលថ្ងៃទី១៩ ខែមករា នេះ។
ក្រសួងការបរទេសកម្ពុជាឲ្យដឹងថាស្ត្រីខ្មែរ ៧នាក់ ត្រូវបានស្ថានទូតកម្ពុជា ប្រចាំនៅប្រទេសជប៉ុន ជួយសង្គ្រោះ នៅពេលពួកគេត្រូវបង្ខំអោយបម្រើសេវាផ្លូវភេទនៅក្នុងភោជនីយដ្ឋានមួយនៅក្នុងខេត្តហ្គុនម៉ា (Gunma) ប្រទេសជប៉ុន ហើយស្ត្រីម្នាក់ក្នុងចំណោមនោះបានវិលមកកម្ពុជា វិញ កាល
ពីចុងខែធ្នូ ឆ្នាំ២០១៦។
នេះជាករណីទី១ ដែលអាជ្ញាធរបានជួយសង្គ្រោះស្ត្រីខ្មែររងគ្រោះពីប្រទេសជប៉ុន ក្នុងករណីជួញដូរផ្លូវភេទនៅក្នុងប្រទេសមហាអំណាចសេដ្ឋកិច្ចនៅតំបន់អាស៊ីមួយនេះ។
អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ លោក ជុំ សុន្ទរី មានប្រសាសន៍ថា ស្ត្រីរងគ្រោះបានផ្ដល់ដំណឹងពីបញ្ហារបស់ពួកគេទៅស្ថានទូតខ្មែរប្រចាំនៅប្រទេសជប៉ុន តាមរយៈទំព័រហ្វេសប៊ុក (Facebook) របស់ស្ថានទូត ទើបស្ថានទូតសហការជាមួយអាជ្ញាធរជប៉ុន ជួយសង្គ្រោះ។
លោក ជុំ សុន្ទរីឲ្យដឹងទៀតថាស្ត្រីខ្មែរទាំង ៧នាក់នោះ មកស្នាក់នៅក្នុងស្ថានទូតក្នុងការថែទាំរបស់ស្ថានទូត កាលពីខែធ្នូ ប៉ុន្តែ រហូតមកដល់ពេលនេះទើបបានធ្វើមាតុភូមិនិវត្តន៍ ដោយសារយើងត្រូវរៀបចំសំណុំឯកសារធ្វើការប្ដឹងផ្ដល់ទៅអាជ្ញាធរសមត្ថកិច្ចរបស់ជប៉ុន ដើម្បីស្វែងរកជនដែលបានប្រព្រឹត្តទោសឧក្រិដ្ឋហ្នឹងហើយយកទៅផ្ដន្ទាទោសនិងដើម្បីទាមទារសំណង និងប្រាក់បៀវត្សដែលម្ចាស់ភោជនីយដ្ឋានមិនទាន់បានផ្ដល់ឲ្យពួកគេបានគ្រប់គ្រាន់»។
នៅក្នុងសេចក្ដីថ្លែងការណ៍ចេញដោយក្រសួងការបរទេស កាលពីថ្ងៃទី១៧ ខែមករា អោយដឹងថា ស្ត្រីទាំង ៧នាក់នោះ មាន ២នាក់ ទៅពីភ្នំពេញ ២នាក់ពីខេត្តព្រៃវែង ម្នាក់ពីខេត្តពោធិ៍សាត់ ម្នាក់ពីខេត្តកំពង់ស្ពឺ និងម្នាក់ទៀតពីខេត្តតាកែវ។ ពួកគេត្រូវបានមេខ្យល់បោកបញ្ឆោតនាំទៅដល់ប្រទេសជប៉ុន កាលពីខែវិច្ឆិកា ឆ្នាំ២០១៦ ដោយមានការរៀបចំឯកសារសុំទិដ្ឋាការ និងសំបុត្រយន្តហោះ ពីបុរសជនជាតិជប៉ុន ម្នាក់ ដែលជាម្ចាស់ភោជនីយដ្ឋានមួយនៅក្នុងខេត្តហ្គុនម៉ា។ ពួកគេបានរៀបរាប់ប្រាប់ស្ថានទូតថា បុរសនោះបានសន្យាផ្ដល់ការងារធ្វើនៅភោជនីយដ្ឋាន ដែលមានប្រាក់ខែខ្ពស់ តែផ្ទុយទៅវិញ បានគំរាមកំហែង និងបង្ខំអោយពួកគេបម្រើសេវាផ្លូវភេទដល់ភ្ញៀវនៅភោជនីយដ្ឋានទៅវិញ ហើយថែមទាំងមិនបានផ្ដល់ប្រាក់បៀវត្សអោយទៀត។
លោក ជំ សុន្ទរី អំពាវនាវអោយពលរដ្ឋដែលមានបំណងទៅរកការងារនៅក្រៅប្រទេសប្រុងប្រយ័ត្នចំពោះការឆបោក ដោយសន្យាផ្ដល់ការងារមានប្រាក់ខែខ្ពស់នោះ។
លោកសង្ឃឹមថា នឹងមិនមានបញ្ហាបែបនេះកើតឡើងទៀតទេទៅលើស្ត្រីខ្មែរនៅក្នុងប្រទេសជប៉ុនុ។
នៅពេលអ្នកកាសែតជាច្រើនអង្គភាពកំពុងធ្វើដំណើរទៅព្រលានយន្តហោះអន្តរជាតិភ្នំពេញដើម្បី
ផ្តិតយករូបភាពរបស់ស្ត្រីខ្មែរទាំង៦នាក់នោះដែលគេរំពឹងថានឹងមកដល់កម្ពុជានៅរសៀលនេះ៕
0 comments:
Post a Comment