ប្រមុខរាជរដ្ឋាភិបាលកម្ពុជាជួបពិភាក្សាការងារជាទ្វេភាគីជាមួយប្រធានាធិបតីស្វីសលោកស្រី
Doris Leuthard កាលពីម្សិលមិញ។
ដោយ លោក ជា វិបុល
នៅទីបំផុតអង្គការ Global Witness ដែលជាអង្គការអន្តរជាតិមានមូលដ្ឋាននៅសហរដ្ឋអាមេរិក នោះបានបរាជ័យនូវការអំពាវនាវឲ្យប្រទេសស្វីសដែលជាម្ចាស់ផ្ទះនៃវេទិកាសេដ្ឋកិច្ចអន្តរជាតិ បិទទ្វារ និង បណ្តេញកុំឲ្យប្រមុខរដ្ឋាភិបាលកម្ពុជាចូលរួមនៅក្នុងវេទិកាពិភពលោកមួយនេះ។
ផ្ទុយពីការអំពាវនាវនេះប្រមុខរាជរដ្ឋាភិបាលកម្ពុជាក៏បានជួបសវនាការជាមួយប្រធានាធិបតីនៃ
ប្រទេសស្វីសហើយស្នើឲ្យប្រទេសស្វីសបង្កើនការវិនិយោគជាមួយកម្ពុជាឲ្យបានលើសពីទំហំ៣០
លានដុល្លារ ជាទំហំពាណិជ្ជកម្មរបស់ប្រទេសបច្ចុប្បន្ននិងស្នើឲ្យមានការជួយលើវិស័យមួយចំនួនទៀតដែលជាផ្នែកនៃកិច្ចសហប្រតិបត្តិការនៃប្រទេសទាំងពីរទៀតផង។
ក្នុងឱកាសនៃការចូលរួមវេទិកាសេដ្ឋកិច្ចពិភពលោកនៅប្រទេសស្វីស លោកនាយករដ្ឋមន្ត្រី ហ៊ុន សែន ក៏មានការណាត់ជួបជាទ្វេភាគីជាមួយប្រធានាធិបតីស្វីសលោកស្រី Doris Leuthard កាលពី
ម្សិលមិញ។ ក្នុងជំនួបនោះ ប្រមុខរដ្ឋាភិបាលកម្ពុជាបានស្នើអោយពង្រីកទំហំពាណិជ្ជកម្មនៃ
ប្រទេសទាំងពីរដែលសព្វថ្ងៃមានប្រមាណជាង៣០លានដុល្លារ អោយមានទំហំធំឡើង។ លោកនាយករដ្ឋមន្ត្រី ក៏បានស្នើឲ្យជួយបន្តបណ្តុះបណ្តាលធនធានមនុស្សនៅកម្ពុជាផងដែរ។
លោកនាយករដ្ឋមន្រ្តីអរគុណរដ្ឋាភិបាលស្វីសដែលបានជួយនិងផ្តល់ជំនួយដល់កម្ពុជាកន្លងមក រួមទាំងជំនួយផ្នែកដោះមីន សុខាភិបាល និងជំនួយផ្នែកតុលាការកាត់ក្តីខ្មែរក្រហមជាដើម។
នៅក្នុងកិច្ចពិភាក្សាទ្វេភាគីនោះ ក្នុងនាមព្រះមហាក្សត្រកម្ពុជា លោកប្រមុខរាជរដ្ឋាភិបាល បានអញ្ជើញ លោក ស្រីប្រធានាធិបតីស្វីសមកទស្សនៈកិច្ចកម្ពុជា នៅពេលសមរម្យមួយនិងស្នើ
អោយលោកស្រីជួយជំរុញអ្នកវិនិយោគទុនស្វីសមកចូលរួមនៅក្នុងវេទិកាសេដ្ឋកិច្ចពិភពលោកស្តី
ពីអាស៊ាន ដែលនឹងធ្វើនៅកម្ពុជានៅខែ ឧសភា ឆ្នាំ២០១៧ ខាងមុខនេះផងដែរ។
សូមបញ្ជាក់ថាអង្គការ Global Witness ជាអង្គការអន្តរជាតិដែលមានមូលដ្ឋាននៅសហរដ្ឋអាមេរិក បានអំពាវនាវឲ្យប្រទេសស្វីសដែលជាម្ចាស់ផ្ទះនៃវេទិកាសេដ្ឋកិច្ចអន្តរជាតិ បិទទ្វារ និង បណ្តេញកុំឲ្យលោកប្រមុខរដ្ឋាភិបាលកម្ពុជាចូលរួមវេទិកាពិភពលោកនេះដោយអង្គការនេះ ចាត់ទុក
នាយករដ្ឋមន្ត្រីខ្មែរ ជាជនផ្តាច់ការធ្វើបាបពលរដ្ឋទៅវិញ។
សេចក្តីថ្លែងការណ៍របស់អង្គការនេះ ចេញផ្សាយកាលពីថ្ងៃពុធទី១៨បានលើកឡើងថា អ្នករៀបចំ វេទិកាសេដ្ឋកិច្ចពិភពលោកនៅទីក្រុងដាវ៉ូស ប្រទេសស្វីស មិនគួរអនុញ្ញាតឲ្យលោកនាយករដ្ឋមន្ត្រី ហ៊ុន សែន កាន់កម្មវិធីនៅក្នុងវេទិកានោះ ដើម្បីឃោសនាទាក់ទាញ អ្នកវិនិយោគពីក្រៅប្រទេសធ្វើ
ជាដៃគូរពាណិជ្ជកម្មនោះទេ។
Global Witness លើកឡើងថា លោក ហ៊ុន សែន ដឹកនាំធ្វើឲ្យប្រទេសកម្ពុជាស្ថិតនៅឆ្ងាយពី
គោលដៅនៃការចង់បានរបស់អ្នកវិនិយោគ ដោយសារការបង្កើតជាប្រព័ន្ធនៃការធ្វើទុក្ខបុកម្នេញលើអ្នកនយោបាយប្រឆាំង ការធ្វើទារុណកម្ម សម្លាប់ រំលោភសិទ្ធិមនុស្ស និងចាប់អ្នករិគន់ដាក់
ពន្ធនាគារជាដើម។
អង្គការនេះ ក៏បានរិះគន់ថា គ្រួសារលោកនាយករដ្ឋមន្ត្រី ហ៊ុន សែន កំពុងតែក្តោបក្តាប់សេដ្ឋកិច្ច
ជាតិផងដែរ។
អ្នកស្រី Alice Harrison ទីប្រឹក្សាផ្នែកសារគមនាគមន៍របស់អង្គការ Global Witness ថ្លែងក្នុងសេចក្តី
ថ្លែងការណ៍នោះថា៖ «វា មិនមានអ្វីចម្លែកទេ សម្រាប់នាយករដ្ឋមន្ត្រី ហ៊ុន សែន ដែល គៀងគរអ្នក
មានទ្រព្យសម្បត្តិនៅទីក្រុងដាវ៉ូសនោះ។ លោកនឹងក្រុមគ្រួសាររបស់លោកកំពុងក្តោបក្តាប់
សេដ្ឋកិច្ចជាតិ ប្រមូលផលដាក់ក្នុងហោប៉ៅផ្តាល់ខ្លួន។ កិច្ចប្រជុំនៅដាវ៉ូស ត្រូវមានការប្តេជ្ញាឲ្យ
ពិភពលោកឆ្ពោះទៅរកការរីកចម្រើនត្រឹមត្រូវ ដូច្នេះត្រូវបិទទ្វារមិនឲ្យជនផ្តាច់ការដូច ហ៊ុន សែន ចូលរួមនោះទេ »។
ទោះជាយ៉ាងណា លោក ផៃ ស៊ីផាន អ្នកនាំពាក្យទីស្តីការ គណៈរដ្ឋមន្ត្រី បានសរសេរនៅលើហ្វេស
ប៊ុករបស់លោកថា ការលើកឡើងរបស់ Global Witness គឺជាការញុះញង់ ខុសពីការពិតដែលកំពុង
មាននៅកម្ពុជា។
លោកសរសេរថា៖ «សំណូមពរឲ្យអង្គប្រជុំសេដ្ឋកិច្ចអន្តរជាតិ នៅទីក្រុង Davos ប្រទេសស្វីសបិទ
ទ្វារ បណ្តេញកម្ពុជានោះ គឺជា “សំដីរបស់ជនពាល និងបិសាចអន្តរជាតិ” ដែលតែងតែញុះញង់ ប្រឌិតខុសពីការពិត។ កម្ពុជាទទួល បានការគោរព និងឃើញថាជា ខ្លាសេដ្ឋកិច្ចមួយប្រចាំអាស៊ាន
(ASEAN )ដែលមានផលិតផលសរុបក្នុងស្រុកក្នុងរង្វង់ជាង ៧ភាគរយ ក្នុងរយៈពេលមួយទសវត្ស
ចុងក្រោយនេះ។ កម្ពុជា ក៏ជាទិសដៅ ដល់អ្នកបណ្តាក់ទុនអន្តរជាតិ ដែលមានភាពកក់ក្តៅ និងបរិមាណខ្ពស់ប្រចាំតំបន់»។
វេទិកាសេដ្ឋកិច្ចពិភពលោកនោះ មានការចូលរួមពីបណ្តាមេដឹកនាំនានា អ្នកជំនួញ អ្នកស្រាវជ្រាវ មន្ត្រីអង្គការសង្គមស៊ីវិល និងអ្នកសារព័ត៌មានប្រមាណ ៣០០០នាក់ មកពីប្រទេសចំនួន៣២។ តាមហ្វេសប៊ុករបស់ប្រមុខរាជរដ្ឋាភិបាលបញ្ជាក់ថា ក្រៅពីការចូលប្រជុំនោះ លោកក៏មានគម្រោង
ជួបជាមួយប្រជាពលរដ្ឋខ្មែររស់នៅទីនោះនិងជួបជាមួយមេដឹកនាំផ្សេងៗទៀតជាលក្ខណៈទ្វេរភាគី
ផងដែរ៕
ប្រមុខរាជរដ្ឋាភិបាលកម្ពុជាចូលរួមវេទិកាសេដ្ឋកិច្ចពិភពលោកដោយជោគជ័យនៅ
ប្រទេសស្វីស។
0 comments:
Post a Comment