.jpg)
ប្រធានគណៈកម្មាធិការសិទ្ធិមនុស្សកម្ពុជាលោក កែវ រ៉េមី ស្នើឲ្យ បរទេសផ្ដល់មេដាយសរសើរ
ជូនដល់លោកនាយករដ្ឋមន្ត្រីហ៊ុន សែន ដែលមានស្នាដៃធំធេងស្មើមេឃផ្នែកការពារសិទ្ធិមនុស្សនៅកម្ពុជា និងមិនគួរត្រូវបានស្ដីបន្ទោសនោះទេ។
លោក កែវ រ៉េមីថា “លោកនាយករដ្ឋមន្ត្រី ហ៊ុន សែន មានស្នាដៃស្មើ មេឃខាងការពារសិទ្ធិមនុស្ស។ ដូច្នេះ បរទេសគួរតែជូនមេដាយសរសើរដល់លោក”។
លោក កែវ រ៉េមី ថ្លែងដូចនេះក្នុងសន្និសីទសារព័ត៌មាននៅព្រឹកថ្ងៃទី២៧ មីនា គឺជាការឆ្លើយតបនឹង
របាយការណ៍របស់សមាជិកសភាអាស៊ានដើម្បីសិទ្ធិមនុស្ស
(APHR) កាលពីថ្ងៃទី២០ ខែមីនា ដែលរិះគន់ការដឹកនាំរបស់លោក
ហ៊ុន សែន ដោយបង្កើតឲ្យមាន “ការប្រើអំពើហិង្សានិងគំរាមកំហែង”
ដូចជាការបង្ក្រាបសកម្មជនសិទ្ធិមនុស្ស
សកម្មជនដីធ្លី និងមន្ត្រីគណបក្សប្រឆាំង ស្របពេលដែល
ការបោះឆ្នោតឃុំ-សង្កាត់កាន់តែខិតចូលមកដល់។
របាយការណ៍នេះត្រូវបានផ្សព្វផ្សាយបន្ទាប់ពីក្រុមសមាជិកសភាអាស៊ានដើម្បីសិទ្ធិមនុស្សមួយក្រុមដែលរួមមានសមាជិកសភាមកពីប្រទេសម៉ាឡេស៊ី និងសមាជិកសភាហ្វីលីពីន ផង បញ្ចប់បេសកកម្មស្វែងរកការពិតមួយនៅប្រទេសកម្ពុជា។ របាយការណ៍នេះចងក្រង និងវិភាគលើរលកវាយប្រហារសមាជិកសភាបក្សប្រឆាំងកាលពីពេលកន្លងទៅ រួមទាំងការធ្វើទុក្ខបុកម្នេញតាមផ្លូវតុលាការការរំលោភនីតិវិធីជុំវិញអភ័យឯកសិទ្ធិសភា និងការរំលោភបំពានលើរូបរាងកាយរបស់
តំណាងរាស្ត្រនិងសកម្មជនបក្សប្រឆាំងផងដែរ។
លោក កែវ រ៉េមីបានហៅការលើកឡើងរបស់ក្រុមសមាជិកសភាអាស៊ាន ជុំវិញបញ្ហាសិទ្ធិមនុស្ស
នៅកម្ពុជាថា ជាវាយតម្លៃរបស់មនុស្សមួយក្រុមតូច និងកំពុងជ្រៀតជ្រែកកិច្ចការផ្ទៃក្នុងរបស់
កម្ពុជា។ លោក កែវ រ៉េមី ក៏បានហៅរបាយការណ៍របស់ក្រុមសមាជិកសភាអាស៊ានដើម្បីសិទ្ធិមនុស្ស (APHR) និងប្រធានរបស់អង្គការគឺលោក ហ្សាល់ សាន់ឌីអេហ្គូ ថាជាការវាយតម្លៃរបស់មនុស្សមួយ
ក្រុមតូច និងមិនឆ្លុះបញ្ចាំងទស្សនៈរបស់សមាគមអាស៊ានទាំងមូលនោះទេ។
លោកមានប្រសាសន៍ថា៖ «អ្វីដែលខ្ញុំធ្វើប្រតិកម្មទាក់ទងទៅនឹង ប្រធាន APHR ដែលជាក្រុមតូច
មួយដឹកនាំដោយលោក ហ្សាល់ សាន់ឌីអេហ្គូ ហើយក្រុមនេះជាក្រុមបង្កើតឡើងប៉ុន្មាននាក់ទេ។ ខ្ញុំមិនបានជូនតម្លៃគាត់ ទាក់ទងទៅនឹងការឆ្លុះបញ្ចាំងរបស់ប្រទេសជាសមាជិកអាស៊ានទេ ហើយ
អញ្ចឹងគាត់និយាយ ហើយនិយាយចំឈ្មោះកម្ពុជា។ វាជាការជ្រៀតជ្រែកហើយ»។
លោកអះអាងថា មានតែគណៈកម្មការអន្ដររដ្ឋាភិបាលអាស៊ានស្ដីពីសិទ្ធិមនុស្សទេ ដែលជាអង្គការ
មានតួនាទីដោះស្រាយបញ្ហាសិទ្ធិមនុស្ស ក្នុងបណ្ដាប្រទេសសមាជិកអាស៊ាន។
ប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី បន្ដថា អង្គការ ឬភាគីណាមួយពុំគួរវាយ
តម្លៃបញ្ហាសិទ្ធិមនុស្ស ដែលកើតមាន ក្នុងប្រទេសដទៃនោះទេ។ លោកថា នៅលើពិភពលោក ពុំមានស្ដង់ដារកំណត់ពីការគោរពសិទ្ធិមនុស្សបែបណានោះទេ ដោយលោកថា គឺវាអាស្រ័យលើ
ប្រពៃណី ទំនៀមទម្លាប់សង្គម និងសេដ្ឋកិច្ចរបស់ប្រទេសនោះប៉ុណ្ណោះ។ លោកបន្ថែមថាសហគមន៏
អន្ដរជាតិគួរផ្ដល់មេដាយណូប៊ែលសន្ដិភាពដល់លោកនាយករដ្ឋមន្ដ្រី ហ៊ុន សែន ទើបស័ក្តសម
ដោយថា លោក ហ៊ុន សែន បានជួយសង្គ្រោះពលរដ្ឋខ្មែររាប់លាននាក់ពីរបបខ្មែរក្រហម។
កាលពីសប្តាហ៍មុន ក្រសួងការបរទេសកម្ពុជាក៏បានចេញសេចក្តីថ្លែងការណ៍ប្រតិកម្មក្នុងន័យដដែលនេះដែរ៕
0 comments:
Post a Comment