លោក កឹម សុខាចុះជួបអ្នកគាំទ្រនៅស្រុកបរិបូណ៍ ខេត្តកំពង់ឆ្នាំង នាព្រឹកមិញនេ។
ប្រធានគណបក្សសង្គ្រោះជាតិ លោកកឹម សុខាកំពុងបន្តដំណើរយុទ្ធនាការឃោសនាបោះឆ្នោត
ឃុំ-សង្កាត់អណត្តិទី៤នេះ នៅតាមបណ្តាខេត្តនានាទូទាំងប្រទេស ដោយនាព្រឹកនេះលោកចុះឃោសនារកសំឡេងឆ្នោតនៅខេត្តកំពង់ឆ្នាំង ហើយបន្តដំណើរទៅខេត្តពោធិ៍សាត់ទៀត នៅ
រសៀលនេះ។
គ្រាន់តែមកដល់ស្រុកបរិបូណ៌ នាខេត្តកំពង់ឆ្នាំងភ្លាម លោកមេបក្សប្រឆាំងរូបនេះ បានលើកឡើង
ពី ការពង្រឹងលទ្ធិប្រជាធិបតេយ្យ ដែលលោកថាមានន័យថាពង្រឹងសិទ្ធិអំណាចប្រជាពលរដ្ឋ។លោកបញ្ជាក់ថា ប្រជាពលរដ្ឋមានសិទ្ធិអំណាច ទើបអាចការពារផលប្រយោជន៍របស់ខ្លួនបាន។
លោកកឹម សុខាក៏នៅតែបន្តពន្យល់ពីអត្ថន័យនៃពាក្យ «ដូរ ឬមិនដូរ» ដល់សមាជិកគាំទ្រក្នុងខេត្តនេះ និងបានប្រកាសរំលាយក្រសួងអភិវឌ្ឍន៍ជនបទ ចោល ដោយផ្តល់ជំនួសមកវិញនូវថវិកាជាតិជូនឃុំ-សង្កាត់ទាំងអស់នៅទូទាំងប្រទេស ៥០ម៉ឺនដុល្លារ (កន្លះលានដុល្លារ) សហរដ្ឋអាមេរិក សម្រាប់អភិវឌ្ឍមូលដ្ឋាន បើសិនគណបក្សសង្គ្រោះជាតិ ឈ្នះការបោះឆ្នោតជ្រើសរើសតំណាង
រាស្ត្រឆ្នាំ២០១៨ បានដឹកនាំប្រទេសនាថ្ងៃខាងមុខ។
យុទ្ធនាការនេះ លោក កឹម សុខា ប្រធានគណបក្សសង្គ្រោះជាតិ ដែលបានចុះមកឃោសនារកសំឡេងឆ្នោតតាមឃុំ-សង្កាត់មួយចំនួននាខេត្តកលំបង់ឆ្នាំង នៅថ្ងៃទី២៣ ខែឧសភា បានប្រកាសប្រាប់អ្នកគាំទ្រថា បើបក្សនេះឈ្នះការបោះឆ្នោតជាតិឆ្នាំ២០១៨ បានដឹកនាំប្រទេស នឹងលុបក្រសួងអភិវឌ្ឍន៍ជនបទ ចោល ព្រោះមិនបានបម្រើដល់ប្រយោជន៍ពលរដ្ឋ និងចាយថវិកាជាតិខ្ជះខ្ជាយ។
លោកបញ្ជាក់ថា៖ «មិនមែនគណបក្សសង្គ្រោះជាតិ ឈ្នះហើយទៅធ្វើបាបអ្នកចាញ់ទេ មិនមែនអ្នកឈ្នះទៅរាំបទញីកែងជើង ហើយអ្នកចាញ់ដេកគុកទេ គឺមិនមែនអ៊ីចឹងទេ។ សង្គ្រោះជាតិ ឈ្នះ គឺ
ខ្មែរអ្នកឈ្នះទាំងអស់គ្នា។ អ្នកចាញ់ក៏ឈ្នះ អ្នកឈ្នះក៏ឈ្នះ គឺខ្មែរសុខទាំងអស់គ្នា»។
លោក កឹម សុខា បានពន្យល់អត្ថន័យពាក្យ «ដូរ ឬមិនដូរ» ទៅសមាជិកគាំទ្ររាប់រយនាក់នៅតាមមូលដ្ឋាននីមួយៗ។ លោកថា ពាក្យដូរក្នុងន័យនេះ គឺចង់សំដៅទៅលើសកម្មភាពនាថ្ងៃអនាគត
ត្រូវដូរមេឃុំ ចៅសង្កាត់មិនស្អាតស្អំ ដាក់ជំនួសមេឃុំ ចៅសង្កាត់អ្នកស្អាតស្អំ ឬមិនបក្សពួកនិយម ហើយសកម្មភាពការងារជួយដល់ទុក្ខកង្វល់ពលរដ្ឋ ជាដើម។
លោកបន្តថា៖ «ដាក់មេឃុំដែលធ្វើលិខិតជូនប្រជាពលរដ្ឋឲ្យទាន់ពេលវេលា។ ដូរ ឬមិនដូរបង
ប្អូន? ដូរៗៗៗ គ្រាន់តែពាក្យថាដូរប៉ុណ្ណឹងសោះ ខឹងដែរ?»។
ប្រតិកម្មរបស់លោក ផៃ ស៊ីផាន ទាក់ទងការលើកឡើងរបស់លោក កឹម សុខា រឿងលុបក្រសួងអភិវឌ្ឍន៍ជនបទ ចោល នៅពេលដែលគណបក្សសង្គ្រោះជាតិ ឈ្នះឆ្នោត ដោយចាត់ទុកការ
លើកឡើងនេះនាំឲ្យភ្ញាក់ផ្អើលដល់មតិសាធារណជន ជាពិសេសបណ្ដាញសារព័ត៌មានជាតិ និងអន្តរជាតិ។
លោក ផៃ ស៊ីផាន បានចាត់ទុកការប្រកាសលុបចោលក្រសួងអភិវឌ្ឍន៍ជនបទ ថាមិនខុសគ្នាពីយុទ្ធនាការបំបែកឆ្នាំងបាយ និងបំផ្លាញជីវភាពកម្មករកម្ពុជា ដែលអតីតប្រធានគណបក្សសង្គ្រោះជាតិ គឺលោក សម រង្ស៊ី បានញុះញង់កុំឲ្យអ្នកបណ្ដាក់ទុនរបស់សហគមន៍បរទេសមកកាន់កម្ពុជា កន្លងមកដែរ។
លោក ផៃ ស៊ីផាន បានចោទមេដឹកនាំគណបក្សសង្គ្រោះជាតិ ថាមានបំណងបំផ្លាញជីវភាពនៃការរីកចម្រើនរបស់ប្រជាកសិករនៅតាមទីជនបទនាថ្ងៃអនាគត។
នាឱកាសជួបជុំសមាជិកគាំទ្រកាលពីថ្ងៃ ទី២១ -២២ ខែឧសភា នាទីស្នាក់ការធំគណបក្សសង្គ្រោះជាតិ ប្រចាំខេត្តព្រះសីហនុ និងខេត្តកោះកុង លោក កឹម សុខា ក៏បានលើកឡើងពីផែនការ លុបក្រសួងអភិវឌ្ឍន៏ជនបទចោលផងដែរដោយលោកលើកយកគោលនយោបាយ ឬចំណុចល្អចំនួន៥ របស់គណបក្សនេះ នៅពេលគណបក្សសង្គ្រោះជាតិ ឈ្នះជាមេឃុំ ចៅសង្កាត់នៅថ្ងៃទី៤
ខែមិថុនា មានដូចជា ផ្តល់សិទ្ធិអំណាចជូនប្រជាពលរដ្ឋក្នុងការចូលរួមអភិវឌ្ឍឃុំ-សង្កាត់ លើកកម្ពស់ជីវភាពប្រជាពលរដ្ឋ និងអភិវឌ្ឍដោយធានាការការពារធនធានធម្មជាតិសម្រាប់ប្រជាពលរដ្ឋ ផ្តល់សេវាសាធារណៈឲ្យមានប្រសិទ្ធភាព មិនរើសអើង មិនពុករលួយ ធានាការពារសន្តិសុខដោយទប់ស្កាត់បំបាត់គ្រឿងញៀន ល្បែងស៊ីសង និងចោរកម្ម និងវិមជ្ឈការអំណាចសេវាសាធារណៈ ហើយឃុំ-សង្កាត់នៅទូទាំងប្រទេស នឹងទទួលបានថវិកា ៥០ម៉ឺនដុល្លារក្នុងមួយឆ្នាំសម្រាប់អភិវឌ្ឍឃុំ-សង្កាត់នីមួយៗ តាមរយៈគោលនយោបាយរបស់រាជរដ្ឋាភិបាលដឹកនាំដោយគណបក្សសង្គ្រោះជាតិ។
ការឃោសនាបោះឆ្នោតឃុំ-សង្កាត់អាណត្តិទី៤ មានរយៈពេល ១៤ថ្ងៃ ចាប់ពីថ្ងៃទី២០ ខែឧសភា ដល់ថ្ងៃទី២ ខែមិថុនា ឆ្នាំ២០១៧។ ហើយការបោះឆ្នោតនឹងចាប់ផ្តើមនៅថ្ងៃ ទី ៤ មិថុនាខាង
មុខនេះ៕
0 comments:
Post a Comment