ក្រុមសន្តិសុខខណ្ឌដូនពេញ ដឹកនាំដោយអភិបាលខណ្ឌ លោកសុខ ពេញវុធ បាននាំគ្នា
កាត់ ដកស្លាកនិងបកស្ទីកឃ័រឃោសនា របស់គណបក្សប្រឆាំងតាមដើមឈើ និងបង្គោល
ភ្លើងកាលពីម្សិលមិញ។
គណបក្សសង្គ្រោះជាតិ ដែលជាគូប្រជែងនយោបាយដ៏ធំបំផុតរបស់គណបក្សប្រជាជនកម្ពុជានៅ
ព្រឹកនេះសម្រេចរៀបចំដាក់ពាក្យប្ដឹងអាជ្ញាធរខណ្ឌដូនពេញ ដែលចុះកាត់ ដកស្លាក និងបកស្ទីក
ឃ័រឃោសនារបស់គណបក្សមួយនេះនៅព្រឹកថ្ងៃទី២៧ ខែឧសភាកាលពីម្សិលមិញ។នេះបើតាមការ
អះអាងរបស់អ្នកនាំពាក្យគណបក្សសង្គ្រោះជាតិ លោក យឹម សុវណ្ណ។
លោក យឹម សុវណ្ណយល់ថា ទង្វើរបស់អាជ្ញាធរ គឺរំលោភច្បាប់ ព្រោះថាទីធ្លាសាធារណៈ គណបក្សអាចផ្សព្វផ្សាយខិត្តប័ណ្ណដោយសេរី។ លោកបន្តថា ពេលនេះលោកបានប្រាប់មន្ត្រីគណបក្ស
សង្គ្រោះជាតិប្រចាំរាជធានីភ្នំពេញ ឲ្យដាក់ពាក្យបណ្ដឹងរួចហើយ។
លោកបញ្ជាក់ថា៖ «ខ្ញុំសុំសួរសំណួរថា តើបារីស្រាដែលដាក់តាំងនៅទីសាធារណៈ វាមានប្រយោជន៍ជាងសារនយោបាយរបស់គណបក្ស ឬយ៉ាងម៉េច? កាលពីឆ្នាំ២០១៣ យើងដាក់តាមបង្គោលភ្លើងតាមអីបាន រួចហើយពេលដែលចប់ឃោសនា យើងប្រមូលយកមកទុកវិញ អត់មានបញ្ហាអ្វីទាំង
អស់ ហើយឥឡូវនេះម្ដេចក៏មានការរឹតត្បិតខ្លាំងម្ល៉េះ? បើមិនឲ្យដាក់កន្លែងហ្នឹង តើដាក់នៅកន្លែងណា? ហើយអ្វីទៅដែលហៅថាការឃោសនាតាមទីធ្លាសាធារណៈបាន»។
នៅថ្ងៃទី២៧ ខែឧសភា អាជ្ញាធរខណ្ឌដូនពេញ ក្រោមការបញ្ជាផ្ទាល់ពីលោកសុខ ពេញវុធអភិបាល
ខណ្ឌ ចុះទៅកាត់ និងដកស្លាកស្ទីកឃ័ររបស់គណបក្សសង្គ្រោះជាតិ ដែលអាជ្ញាធរអះអាងថាបានបំពានច្បាប់របស់គណៈកម្មាធិការជាតិរៀបចំការបោះឆ្នោត ហាមមិនឲ្យគណបក្សនយោបាយយកស្លាកទៅបិទនៅតាមដើមឈើ និងបង្គោលភ្លើងជាដាច់ខាត។
ផ្ទុយពីការលើកឡើងរបស់អាជ្ញាធរនេះ អ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា មានប្រសាសន៍ថា នីតិវិធីនៃការឃោសនាបោះឆ្នោតនេះ គឺមានការហាមប្រាមមិនឲ្យ
បិទផ្សាយនៅតាមអគាររបស់រដ្ឋ។ ចំពោះការបិទផ្សាយនៅតាមដើមឈើ និងបង្គោលភ្លើងនោះ គឺ
គ.ជ.ប មិនមែនជាអ្នកចេញបម្រាមឡើយ។
ទោះជាយ៉ាងណា លោក ហង្ស ពុទ្ធា បន្តថា ការបិទផ្សាយប័ណ្ណឃោសនានៅលើបង្គោលភ្លើង និងលើដើមឈើនេះ គឺអាស្រ័យលើអាជ្ញាធរ ប្រសិនបើអាជ្ញាធរថាការបិទនោះនាំឲ្យខូចសោភ័ណភាពផ្សេងៗ គឺអាជ្ញាធរត្រូវជម្រាបប្រាប់ទៅគណបក្សនយោបាយនោះវិញ។
សកម្មភាពចុះកាត់ ដកស្លាក និងបកស្ទីកឃ័រឃោសនារបស់គណបក្សមួយនេះនៅព្រឹកថ្ងៃទី២៧ ខែឧសភាកាលពីម្សិលមិញ ក៏បានធ្វើឲ្យមានការរិះគន់យ៉ាងខ្លាំងពីមហាជនលើបណ្តាញសង្គមផង
ដែរ៕
0 comments:
Post a Comment