.jpg)
លោកហុង លីម លោកនាយករដ្ឋមន្ត្រី ហ៊ុន សែន ប្អូនប្រុសលោកកែម ឡី លោក
កែម រិទ្ធិសិត និងព្រះអង្គប៊ុត ប៊ុនទិញ ព្រមទាំងសពលោកកែម ឡី។
ស្នើ កុំឲ្យលោកកែម រិទ្ធិសិត យកលុយចូលបុណ្យមួយម៉ឺនដុល្លាររបស់លោក នាយករដ្ឋមន្ត្រីហ៊ុន សែន។
លោកបណ្ឌិត កែម ឡី ប្រាប់សារព័ត៌មានជាតិខ្មែរមុននេះបន្តិចថា លោកនិងម្តាយជរារបស់លោក ព្រមទាំងក្រុមគ្រួសារទាំងមូលមិនធ្វើតាមសំណើរបស់លោកហុង លីមបានទេ ដោយលោកពន្យល់ថា ការចូលបុណ្យជាសទ្ធារបស់លោកនាយករដ្ឋមន្ត្រី ដូច្នេះលោកទទួលបានលុយនេះរួចហើយ មិនអាចប្រគល់ត្រឡប់ទៅឲ្យលោក នាយករដ្ឋមន្ត្រី វិញឡើយ។
លោកបញ្ជាក់តាមទូរសព្ទនៅមុននេះបន្តិចថា “ខ្ញុំនិងម្តាយជរារបស់ខ្ញុំគ្មានលុយសងថ្លៃបបរដល់ ទៅជិត ៨ពាន់ដុល្លារនោះបានទេ។ ដូច្នេះបានបញ្ច័យ១ម៉ឺនដុល្លារ ពីសម្តេចហ៊ុន សែន។ ខ្ញុំត្រេក អរណាស់។ ហើយខ្ញុំមិនអាចកាត់និស្ស័យបុណ្យនេះបានទេ”។
ក៏ប៉ុន្តែ សមាជិកសភារដ្ឋវ៉ិកតូរីយ៉ា ប្រទេសអូស្ត្រាលី ដើមកំណើតខ្មែរ លោក ហុង លីម ដែលតែង
តែរិះគន់រដ្ឋាភិបាល លោក ហ៊ុន សែន មិនសំចៃនោះយល់ថា សទ្ធារបស់លោក ហ៊ុន សែន ចូលលុយបុណ្យមួយម៉ឺនដុល្លារជួយចេញថ្លៃបបរជាការប្រមាថវិញ្ញាណក្ខន្ធ លោកបណ្ឌិត កែម ឡី និងវិញ្ញាណក្ខន្ធអ្នកផ្សេងទៀតដែលស្លាប់ព្រោះការបាញ់សម្លាប់។ នេះបើតាមការផ្សាយក្នុងវេទិកាអ្នកស្ដាប់អាស៊ីសេរីកាលពីយប់មិញ។
លោក ហុង លីម អះអាងថា លុយខ្វះថ្លៃបបរជិត ៨ពាន់ដុល្លារនោះ លោកអាចរៃអង្គាសប្រាក់ដើម្បីបង្គ្រប់បាន។ ចំណែកស្ថាបនិកបណ្ដាញព្រះសង្ឃឯករាជ្យដើម្បីយុត្តិធម៌សង្គម ព្រះតេជព្រះគុណ ប៊ុត ប៊ុនតិញ មានថេរដីកាថា ពិធីបុណ្យគម្រប់ខួបមួយឆ្នាំនៃការបាញ់សម្លាប់លោក កែម ឡី ដែលធ្វើនៅខេត្តតាកែវ ដែលមានអ្នកចូលរួមប្រមាណ ៦ពាន់នាក់នោះ មិនសមអស់ថ្លៃបបរដល់ថ្នាក់
នេះទេ។
ការលើកឡើងរបស់លោកសង្ឃអង្គនេះ ក៏ត្រូវបានលោកកែម រិទ្ធិសិតខឹងសម្បាយ៉ាងខ្លាំង រហូត ដល់លោក រិទ្ធិសិតលើកឡើងថា ម្ចាស់ដើមបុណ្យគម្រប់១ឆ្នាំនៃសពលោកកែម ឡី បានគេចយក រួចខ្លួន ខណះថៅកែចុងភៅយកបញ្ចីគិតលុយមកជូន ហើយក៏ទម្លាក់បន្ទុកដ៍ធ្ងន់នេះទៅលើរូប លោក និងម្តាយចាស់ជរា របស់សពលោកកែម ឡីជាអ្នករកលុយសងគេទៅវិញ។
លោកបញ្ជាក់បន្ថែមថា “ខ្ញុំបានពិភាក្សាជាមួយម្តាយរបស់ខ្ញុំរួចហើយ គឺមិនប្រគល់បច្ច័យ១ម៉ឺន ដុល្លារនេះ ជួនទៅនាយករដ្ឋមន្ត្រីវិញទេ”។
ក្រោយពេលប្អូនប្រុសលោក កែម ឡី គឺលោក កែម រិទ្ធិសិត ប្រកាសសុំជំនួយតាមសារព័ត៌មានហ្វ្រេស ញូវ (FreshNews) ក្រោយធ្វើបុណ្យគម្រប់ខួបមួយឆ្នាំ បណ្ឌិត កែម ឡី រួចមកស្រាប់តែមិនបានប៉ុន្មានថ្ងៃផង លោកនាយករដ្ឋមន្ត្រី ហ៊ុន សែនដែលកំពុងស្អប់ក្រុមមនុស្សយកសពលោកកែម ឡីទៅអាជីវកម្មផងនោះ ក៏លោកនាយករដ្ឋមន្ត្រីសម្រេចចូលបុណ្យមួយម៉ឺនដុល្លារដល់ប្អូនលោក កែម ឡី តែម្តង។
លោកកែម រិទ្ធិសិតបញ្ជាក់ថា ថវិកាដែលលោកបានទទួលពីលោកនាយករដ្ឋមន្ត្រីរួចហើយនោះ គឺលោកមិនអាចប្រគល់ទៅវិញបានទេ។ ជាងនេះទៅទៀត លោកថា បើលោក ហុង លីម មាន
សទ្ធាជ្រះថ្លា លោក ហុង លីម អាចចូលរួមថវិកាជួយសាងសង់ចេតិយរបស់លោក កែម ឡី ខណៈការសាងសង់នេះកំពុងជួបការខ្វះខាតថវិកាយ៉ាងច្រើន។
ក្រោយឃាតកបាញ់សម្លាប់លោកបណ្ឌិត កែម ឡី កាលពីថ្ងៃទី១០ ខែកក្កដា ឆ្នាំ២០១៦ ជាងមួយ
ឆ្នាំមកនេះ សមត្ថកិច្ចទើបរកឃើញឃាតកម្នាក់តែប៉ុណ្ណោះមកកាត់ទោស គឺឈ្មោះ អឿត អាង ហៅ ជួប សម្លាប់ ដែលតុលាការក្រុងភ្នំពេញសម្រេចផ្ដន្ទាទោសឲ្យជាប់គុកអស់មួយជីវិត។ អតីតប្រធានគណបក្សសង្គ្រោះជាតិ លោក សម រង្ស៊ី ចោទប្រកាន់ថា ឃាតកម្មនេះ គឺរដ្ឋាភិបាលលោក ហ៊ុន សែន ជាអ្នករៀបចំ។ ដូចគ្នានេះដែរ អ្នកវិភាគនយោបាយ លោក គឹម សុខ ក៏កំពុងជាប់នៅពន្ធនាគារ ព្រោះចោទប្រកាន់ថា គណបក្សប្រជាជនកម្ពុជា ជាអ្នកសម្លាប់លោក កែម ឡី។ ចំណែកសមាជិកព្រឹទ្ធសភា មគពីគណបក្សប្រឆាំង អ្នកស្រី ឡាក់ ថានីក៏កំពុងជ្រកកោន
នយោបាយ នៅប្រទេសហ្វាំងឡង់ ដើម្បីរត់គេចពីចាប់ខ្លួន ក្នុងសំណុំរឿងចោទប្រកាន់ថា លោក នាយករដ្ឋមន្ត្រី ហ៊ុន សែនជាអ្នកសម្លាប់លោកកែម ឡីដែរ៕
0 comments:
Post a Comment