ទិដ្ឋភាពរថភ្លើង២ខ្សែរបស់ក្រុមហ៊ុន Royal Railway បុកគ្នានៅស្រុកស្ទឹងហាវ ខេត្តព្រះសីហនុ
កាលពីយប់មិញ។
រថភ្លើងដឹកទំនិញពីរខ្សែ របស់ក្រុមហ៊ុនឧកញ៉ាគិត ម៉េងបានបុកគ្នានៅខេត្តព្រះសីហនុ ខណៈដែលនាយកដ្ឋានផ្លូវដែកបន្ទោសថា មកពីក្រុមហ៊ុនទទួលសិទ្ធដឹកជញ្ជូនធ្វើការធ្វេសប្រហែស ទើបមាន គ្រោះថ្នាក់នេះកើតឡើង កាលពី យប់ថ្ងៃ ចន្ទម្សិលមិញ។
ប្រធាននាយកដ្ឋានផ្លូវដែក លោក ច័ន្ទ សំលេង បានឲ្យដឹងថា រថភ្លើងពីរខ្សែប្រភេទដឹកទូរកុងតឺន័រ នេះជារបស់ក្រុមហ៊ុន Royal railway បានបុកគ្នាកាលពីពាក់កណ្តាលយប់មិញនៅក្នុងស្រុកស្ទឹងហាវ ខេត្តព្រះសីហនុ ដែលព័ត៌មានបឋមគឺមិនទាន់ដឹងថាមានអ្នកស្លាប់ ឬរងរបួសនៅឡើយទេ។ លោកមិនអាចបញ្ជាក់បាននៅឡើយទេពីហេតុការណ៍ដែលបណ្តាលឲ្យមានគ្រោះថា្នក់នេះ ដោយសារការគ្រប់គ្រងផ្លូវរថភ្លើងនេះ រដ្ឋាភិបាលបានផ្ទេរឲ្យក្រុមហ៊ុន Royal railway របស់ឧកញ៉ាគិត ម៉េង ជាអ្នកគ្រប់គ្រង។ តែលោកបានបន្ទោសក្រុមហ៊ុននេះថាបានធ្វេសប្រហែសក្នុងការចាត់ចែងដឹកជញ្ជូនដែលបានបណ្តាលមានគ្រោះថ្នាក់នេះ។
ខណៈពេលនេះលោកថានាយកដ្ឋានកំពុងទាក់ទងទៅក្រុមហ៊ុន Royal Railway ដើម្បីសាកសួរពីព័ត៌មានលំអិត និងអ្នកទទួលខុសត្រូវដែលបណ្តាលឲ្យមានគ្រោះថា្នក់នេះ។
សារព័ត៌មានជាតិខ្មែរមិនអាចទាក់ទងឧកញ៉ា គិត ម៉េងនៅបំភ្លឺពីករណីនេះបានទេ នៅព្រឹកថ្ងៃ អង្គារ៍នេះ៕
0 comments:
Post a Comment