.jpg)
លោកនាយករដ្ឋមន្ត្រី ហ៊ុន សែននិងភរិយា ព្រមទាំងកូនៗប្រសារ។
ព័ត៌មានថាលោកនាយករដ្ឋមន្ត្រី ហ៊ុន សែនមានបញ្ហាសុខភាព
ហើយទៅព្យាបាលនៅក្រៅប្រទេស នោះ វាកាន់តែខ្ចរខ្ចាយឡើងៗ នៅពេលនេះ
ដោយអ្នកលេងហ្វេសប៊ុកខ្លះនៅតែជជីកចង់ដឹងពី
វត្តមានរបស់លោកនាយករដ្ឋន្ត្រី
ដែលខណះនេះមិនមាននរណាម្នាក់បង្ហើបឲ្យដឹង ពីទីតាំងស្នាក់
នៅរបស់លោកនៅឡើយ។
ក៏ប៉ុន្តែជាការឆ្លើយតបទៅនឹងមនុស្សមួយចំនួនដែលកំពុងមានមន្ទិលចំពោះអវត្តមានរបស់លោក (ហ៊ុន សែន) នៅក្នុងប្រទេស លោកនាយករដ្ឋមន្ត្រី ហ៊ុន សែន
កាលពីថ្ងៃទី១០ កក្កដា
បានសរសេរនៅលើទំព័រហ្វេសប៊ុកថា «នេះហើយគឺខ្ញុំជា ហ៊ុន សែន ដែលពួកជនពាលកំពុងស្វែងរក»។
ក្នុងពេលជាមួយគ្នា លោក ហ៊ុន សែន ក៏បានបង្ហោះរូបថតមួយចំនួនជាមួយភរិយា
កូន ចៅ និងមន្ត្រីមួយចំនួនរបស់លោក
មានដូចជាលោក គន់ គីម លោក ជា សុផារ៉ា
និងអ្នកជំនួញ លោក គិត ម៉េង ជាដើម។
អមជាមួយរូបថតទាំងអស់នេះ លោក ហ៊ុន
សែន សរសេរថា
«តើខ្ញុំមានសិទ្ធិសប្បាយរីករាយជួបជុំកូនចៅដូចក្នុងរូបថតនេះដែរឬទេ? តើខ្ញុំត្រូវប្រាប់មនុស្សគ្រប់គ្នា ពិសេសពួកជនពាលថា ខ្ញុំកំពុងឋិតនៅទីនេះ ឬទីនោះដែរឬទេ?»។
បន្ថែមពីលើនេះ លោក ហ៊ុន សែន
ថាបើទោះលោកផ្ទេរសិទ្ធិ
ឬមិនផ្ទេរសិទ្ធិ ទោះលោកឋិតនៅទីណា ក៏លោកនៅតែមានលទ្ធភាពដឹកនាំប្រទេសជាតិ ពិសេសបង្ក្រាបលើការបង្កចលាចលរបស់ក្រុមដែលលោកចាត់ទុកថាជាជនពាល ជាក្រុមជ្រុលនិយម
និងក្រុមកូនអ្នកក្បត់ជាតិ ជាដើម។ លើសពីនេះ លោក ហ៊ុន សែន
បានសរសេរព្រលយពាក្យហាក់ឌឺដងថា បើចង់ដឹង សុំសាកមើលទៀតផង។
រូបថតដែលលោកនាយករដ្ឋមន្ត្រីបង្ហោះកាលពីថ្ងៃទី១០
កក្កដា មានសភាពខុសគ្នាស្រឡះពីរូបដែលលោកបង្ហោះកាលពីចុងសប្ដាហ៍កន្លងទៅ ពេលដែលដំណឹងថាលោកនាយករដ្ឋមន្ត្រីចាប់ផ្ដើមបែកធ្លាយថា លោកមានជំងឺ
ហើយកំពុងព្យាបាលនៅក្រៅប្រទេស។
រូបថតកាលពីចុងសប្ដាហ៍នោះ បង្ហាញរូបលោកនាយករដ្ឋមន្ត្រីកំពុងយារដៃវាយកូនហ្គោល (Golf) ដែលហាក់ដូចជាចង់បង្ហាញថា លោកមានសុខភាពល្អដែលអាចនៅលេងកីឡាបាន និងហាក់ដូចជាមានគោលបំណងច្រានចោលការផ្សព្វផ្សាយថាលោកកំពុងមានជំងឺនោះ។ ប្រហែលជាមិនអាចផ្អឹបព័ត៌មានបានតទៅទៀត
នៅដើមសប្ដាហ៍នេះ លោកក៏បង្ហោះរូបប៉ុន្មានសន្លឹកទៀតដែលលោកថតជាមួយគ្រួសារ និងក្រុមអ្នកហែហមមួយចំនួន។
ទោះជាយ៉ាងណាក៏ដោយ រូបទាំងនេះហាក់មិនបង្ហាញស្ថានភាពស្វាហាប់របស់លោកប៉ុន្មានទេ ហើយឃើញហាក់ដូចជាមានបង់រុំជុំវិញចង្កេះលោកថែមទៀតផង។
កាលពីថ្ងៃទី៣០ មិថុនា
អគ្គលេខាធិការរាជរដ្ឋាភិបាល
បានផ្ញើលិខិតជម្រាបពីការលើកពេលកិច្ច ប្រជុំពេញអង្គគណៈរដ្ឋមន្ត្រីចំនួន ២សប្ដាហ៍
គឺនៅថ្ងៃសុក្រ ទី៧ និងទី១៤ កក្កដា។
ការប្រកាសលើកពេលកិច្ចប្រជុំទៅពេលក្រោយនេះ ស្របពេលដែលមានការលេចឮថា
លោកនាយករដ្ឋមន្ត្រី ហ៊ុន សែន
កំពុងសម្រាកព្យាបាលជំងឺនៅក្រៅប្រទេស។
ទោះជាយ៉ាងណា មន្ត្រីរដ្ឋាភិបាល និងជាអ្នកនាំពាក្យទីស្ដីការគណៈរដ្ឋមន្ត្រី
លោក ផៃ ស៊ីផាន នៅតែប្រកែកថា
លោក ហ៊ុន សែន មិនមានឈឺអ្វីឡើយ
ហើយក៏កំពុងឋិតនៅក្នុងប្រទេសកម្ពុជា។
ចំពោះការលើកពេលប្រជុំចំនួន
២សប្ដាហ៍ទៅពេលក្រោយនេះ លោក ផៃ ស៊ីផាន ថ្លែងថា លោកមិនដឹងមូលហេតុច្បាស់នោះទេ ដោយលោកថាវាជាការចាត់ចែងរបស់អគ្គលេខាធិការរាជរដ្ឋាភិបាល ឬក៏មានរបៀបវារៈរវល់យ៉ាងណា
លោកក៏មិនដឹង។
ជាទូទៅ
កិច្ចប្រជុំពេញអង្គគណៈរដ្ឋមន្ត្រី
ច្រើនធ្វើឡើងនៅរៀងរាល់ថ្ងៃសុក្រ នាវិមានសន្តិភាព ក្រោមការដឹកនាំកិច្ចប្រជុំរបស់លោកនាយករដ្ឋមន្ត្រី
ហ៊ុន សែន។ ស្របពេលដែលគណៈរដ្ឋមន្ត្រីលើកពេលកិច្ចប្រជុំ
២សប្ដាហ៍នេះដែរ នៅពេលរដ្ឋសភា
ក៏មានបើកកិច្ចប្រជុំពេញអង្គកាលពីថ្ងៃទី១០ កក្កដា ដើម្បីពិភាក្សាអនុម័តការកែប្រែច្បាប់គណបក្សនយោបាយ ដែលឈានដល់ការដកហូតសិទ្ធិទណ្ឌិតមិនឲ្យលូកលាន់ជាមួយគណបក្សនយោបាយ តាមសំណើរបស់លោក
ហ៊ុន សែន នោះ គឺពុំមានវត្តមានចូលរួមរបស់លោក ហ៊ុន សែន
ដែលជាអ្នកបញ្ជាឲ្យកែប្រែច្បាប់នេះដូចពេលកន្លងទៅឡើយ។
ខណៈដែលមានហេតុការណ៍កើតឡើងផ្ទួនបែបនេះ ប្រភពច្បាស់ការគួរឲ្យទុកចិត្តបានមួយសុំមិនបញ្ចេញឈ្មោះ ឲ្យដឹងថា
លោក ហ៊ុន សែន កំពុងសម្រាកព្យាបាលរបួសនៅក្រៅប្រទេស។
ប្រភពដដែលឲ្យដឹងថា ក្នុងពេលលេងវាយកូនហ្គោលកាលពីពេលថ្មីៗនេះ លោក ហ៊ុន
សែន បានដួលបាក់ឆ្អឹងត្រគាក រួចបានចេញទៅសម្រាកព្យាបាលរបួសនៅមន្ទីរពេទ្យនៅក្រៅប្រទេស។ ប្រភពដដែលនេះបន្តថា
គ្រូពេទ្យតម្រូវឲ្យលោក ហ៊ុន សែន
នៅសម្រាកព្យាបាលរបួសរហូតដល់រយៈពេល ១ខែ។
ទោះជាយ៉ាងណា ថ្លែងប្រាប់អ្នកកាសែត នៅថ្ងៃទី១១
កក្កដា អ្នកនាំពាក្យគណបក្សប្រជាជនកម្ពុជា
(CPP) លោក
សុខ ឥសាន ថាមិនមានអ្វីកើតឡើងចំពោះលោកនាយករដ្ឋមន្ត្រីឡើយ
ហើយថាលោក ហ៊ុន សែន
កំពុងឋិតនៅក្នុងប្រទេសបំពេញការងារធម្មតា។ លោកថា ដោយសារតែមានអ្នកដុតកំហឹងលោក ហ៊ុន
សែន ពីរឿងអវត្តមាននៅក្នុងប្រទេសនេះហើយ
ទើបលោក ហ៊ុន សែន ឆ្លើយតបវិញតាមរយៈហ្វេសប៊ុករបស់លោក។
ទាក់ទងនឹងការលើកពេលកិច្ចប្រជុំគណៈរដ្ឋមន្ត្រីវិញ
លោក សុខ ឥសាន
ថាវាជាសិទ្ធិរបស់នាយករដ្ឋមន្ត្រី។ ចំពោះអវត្តមានរបស់លោក ហ៊ុន សែន
ក្នុងកិច្ចប្រជុំសភាកាលពីថ្ងៃទី១០ កក្កដា ត្រូវបានលោក សុខ ឥសាន
បកស្រាយថា បើទោះជាលោក ហ៊ុន សែន មិនចូលរួម ក៏បក្សកាន់អំណាចមានសំឡេងគ្រប់គ្រាន់ដើម្បីអនុម័តច្បាប់ដែរ។
លោកបញ្ជាក់ថា៖ «គ្មានអីប្រែប្រួល គ្មានអីចម្លែកទេ នាយករដ្ឋមន្ត្រីលោកមានសិទ្ធិក្នុងការបង្ហាញមុខ ឬមិនបង្ហាញមុខ វាមានទាស់អី
ប៉ុន្តែការដឹកនាំប្រទេសវានៅតែមានដំណើរការនិរន្តរភាពដដែល អត់មានបញ្ហាអីពាក់ព័ន្ធដល់ការដឹកនាំខ្វះចន្លោះអ្វីទេ»។
កន្លងទៅ នៅពេលលោកនាយករដ្ឋមន្ត្រី
ហ៊ុន សែន ធ្វើដំណើរទៅពិនិត្យសុខភាពនៅក្រៅប្រទេស ជាពិសេសនៅមន្ទីរពេទ្យក្នុងប្រទេសសិង្ហបុរី
លោកតែងបង្ហោះហ្វេសប៊ុក
ពេលខ្លះអមដោយរូបថតសម្រាកព្យាបាលនៅមន្ទីរពេទ្យផង ដើម្បីឲ្យពលរដ្ឋដឹងពីស្ថានភាពសុខភាពរបស់លោក។
លោក សុខ ឥសាន ថ្លែងថា ជាគោលការណ៍ នៅពេលនាយករដ្ឋមន្ត្រីទៅបំពេញបេសកកម្ម
ឬអវត្តមាននៅក្នុងប្រទេស
នាយករដ្ឋមន្ត្រីតែងផ្ទេរសិទ្ធិទៅឲ្យនាយករដ្ឋមន្ត្រីស្តីទី។ ប៉ុន្តែលោកថា
ដោយសារតែលោក ហ៊ុន សែន មិនចេញទៅក្រៅប្រទេសនេះហើយ ទើបវាមិនមានការផ្ទេរសិទ្ធិនោះ៕
រូបថតដកស្រង់ពីហ្វេសប៊ុករបស់លោកនាយករដ្ឋមន្ត្រី ហ៊ុន សែន តែមិនបានបញ្ជាក់ថាថតនៅទីណានោះទេ។
0 comments:
Post a Comment