ប្រតិកម្មរបស់អ្នកស្រី មួរ សុខហួរ បានកើតឡើងបន្ទាប់ពីក្រុមតំណាងរាស្ត្រ ៦៧រូបរបស់គណ
បក្សប្រជាជនកម្ពុជា បានសម្រេចអនុញ្ញាតឲ្យតុលាការបន្តនីតិវិធីប្រឆាំងនឹងមេដឹកនាំបក្សប្រឆាំង លោក កឹម សុខា ដែលត្រូវបានសមត្ថកិច្ចចាប់ខ្លួន ក្រោមការចោទពីរដ្ឋាភិបាលថា«ក្បត់ជាតិ»។
ថ្លែងបន្តផ្ទាល់ពីទីតាំងនៅជិតពន្ធនាគារត្រពាំងផ្លុងនៅព្រឹកថ្ងៃនេះ អនុប្រធានគណបក្សសង្គ្រោះជាតិ អ្នកស្រី មួរ សុខហួរ បានប្រាប់អ្នកសារព័ត៌មានថា សេចក្ដីសម្រេចបែបនោះរបស់ក្រុមតំណាងរាស្ត្របក្សកាន់អំណាច ត្រូវបានធ្វើឡើងដោយខុសច្បាប់ និងរំលោភរដ្ឋធម្មនុញ្ញកម្ពុជា។
អ្នកស្រីក៏បានអំពាវនាវទៅសហគមន៍អន្តរជាតិឲ្យជួយអន្តរាគមន៍ក្នុងករណីនេះ ដោយថា លោក កឹម សុខា ត្រូវបានចោទប្រកាន់ក្រោមហេតុផលនយោបាយ។
ការចាប់ខ្លួនលោក កឹម សុខា កាលពីយប់ឈានចូលថ្ងៃទី០៣ ខែកញ្ញា បានជំរុញឲ្យមានប្រតិកម្មយ៉ាងខ្លាំងពីបណ្ដាប្រទេសប្រជាធិបតេយ្យលោកខាងលិច លើកលែងតែប្រទេសចិនកុម្មុយនីស្ត ដែលបានថ្លែងការពារចំណាត់ការរបស់រដ្ឋាភិបាលកម្ពុជាថា ជាការថែរក្សាសន្តិសុខ និងស្ថេរភាពជាតិ។
សារព័ត៌មានជាតិខ្មែរនៅព្រឹកនេះ មិនទាន់អាចទាក់ទងលោកសុខ ឥសានអ្នកនាំពាក្យគណបក្ស ប្រជាជនកម្ពុជាបាននៅឡើយទេ ដោយអ្នកទទួលទូរសព្ទឆ្លើយលោកកំពុងជាប់រវល់៕
0 comments:
Post a Comment