លោក កឹម សុខាត្រូវបានសមត្ថកិច្ចចាប់ វាយខ្នោះយ៉ាងអនោចអធម ជាទីបំផុត
កាលពីយប់ម៉ោង១២ និង៣៥នាទី នាគេហដ្ឋានរបស់លោក។
លោក កឹម សុខា ប្រធានគណបក្សសង្គ្រោះជាតិ ត្រូវបានសមត្ថកិច្ចបញ្ជូនទៅឃុំខ្លួននៅពន្ធនាគារត្រពាំងផ្លុង ខេត្តត្បូងឃ្មុំ ជាប់ព្រំប្រទល់វៀតណាម។
អ្នកនាំពាក្យក្រសួងមហាផ្ទៃ លោក ខៀវ សុភ័គ បានអះអាងថាបន្ទាប់ពីកងកម្លាំងសមត្ថកិច្ចចាប់ខ្លួនលោក កឹម សុខា និងកងអង្គរក្ស ៨នាក់ទៀតដល់ផ្ទះរបស់លោក ប្រធានគណបក្សប្រឆាំងនេះ នៅយប់រំលងអធ្រាត្រចូលថ្ងៃទី៣ កញ្ញា ឆ្នាំ ២០១៧ ក៏បានបញ្ជូនទៅឃុំខ្លួននៅគុកត្រពាំងថ្លុង តែម្តង។
ទីប្រឹក្សារបស់លោក កឹម សុខា និងជានាយខុទ្ទកាល័យគណបក្សសង្គ្រោះជាតិ លោក មុត ចន្ថា មានប្រសាសន៍ថា លោក កឹម សុខា ប្រធានគណបក្សសង្គ្រោះជាតិ និងអង្គរក្សចំនួន ៨នាក់ទៀត ត្រូវសមត្ថកិច្ចចាប់ខ្លួនដល់គេហដ្ឋានរបស់លោក កឹម សុខា ស្ថិតនៅផ្ទះលេខ៩៧ ផ្លូវ៣១៣ សង្កាត់បឹងកក់២ ខណ្ឌទួលគោក។
លោកបន្តថា ការចាប់ខ្លួនមេដឹកនាំបក្សប្រឆាំងរូបនេះ គឺជាស្ថានការណ៍ដ៏ធំមួយដែលនាំឲ្យប៉ះពាល់ដល់ដំណើរការប្រជាធិបតេយ្យនៅកម្ពុជា និងការបោះឆ្នោតជាតិនៅពេលខាងមុខ។ លោកថា មេធាវីរបស់គណបក្សនឹងពិនិត្យមើលចំពោះបញ្ហានេះ។
ភ្លាមៗក្រោយការចាប់ខ្លួនប៉ុន្មាននាទី រដ្ឋាភិបាលអំពាវនាវឲ្យពលរដ្ឋរក្សាភាពស្ងៀមស្ងាត់ ហើយទុកឲ្យករណីចាប់ខ្លួនមេបក្សប្រឆាំងលោក កឹម សុខា ដើម្បីអោយតុលាការចាត់ការតាមច្បាប់។ សេចក្ដីថ្លែងការណ៍របស់រដ្ឋាភិបាលអះអាងថា ករណីចាប់ខ្លួននេះ មន្ត្រីនគរបាលផ្អែកហេតុផលថាជាករណីជាក់ស្ដែងទៅតាមក្រមនីតិវិធីព្រហ្មទណ្ឌ។
រដ្ឋាភិបាលបញ្ជាក់ទៀតថា តាមរយៈវីដេអូឃ្លីបដែលផ្សព្វផ្សាយដោយបណ្ដាញផ្សាយព័ត៌មានកម្ពុជា ដែលហៅខ្លីថា ស៊ីប៊ីអិន(CBN =Cambodian Broadcasting Network) មានប្រភពនៅប្រទេសអូស្ត្រាលី (Australia) និងភស្តុតាងដទៃទៀត អាជ្ញាធរចោទថាលោក កឹម សុខា មានផែនការសម្ងាត់ឃុបឃិតជាមួយបរទេសដែលធ្វើអោយប៉ះពាល់ដល់ព្រះរាជាណាចក្រកម្ពុជា។ រដ្ឋាភិបាលចាត់ទុកការឃុបឃិតនេះថាជាអំពើ “ក្បត់ជាតិ”ដែលជាបទល្មើសមានចែងក្នុងមាត្រា៤៤៣ ក្នុងក្រមព្រហ្មទណ្ឌ។
បើទោះបីជាអាជ្ញាធរអះអាងថា លោក កឹម សុខាត្រូវបានចាប់បញ្ជូនទៅឃុំខ្លួននៅពន្ធនាគារត្រពាំងថ្លុង ក្នុងខេត្តត្បូងឃ្មុំ ជាប់ព្រំដែនវៀតណាមក៏ដោយ ក៏ក្រុមគ្រួសារលោកកឹម សុខា មិនទាន់អាចដឹងពីទីកន្លែងឃុំខ្លួនលោកកឹម សុខាពិតប្រាកដនោះទេ។
កញ្ញា កឹម សមាធីតា កូនស្រីពៅរបស់លោក កឹម សុខា បានបង្ហោះសារនៅលើទំព័រហ្វេសប៊ុករបស់នាងថា ក្រុមគ្រួសារ និងមេធាវីលោក កឹម សុខា នៅមិនទាន់បានដឹងពីកន្លែងឃុំខ្លួនមេបក្សប្រឆាំងរូបនេះនៅឡើយទេរហូតមកដល់ព្រឹកថ្ងៃនេះ។
ចំណែកឯកញ្ញា កឹម មនោវិទ្យា កូនស្រីច្បងលោក កឹម សុខា បានបង្ហោះសារនៅលើ Twitter ថា កញ្ញាក៏មិនទាន់បានដឹងពីទីកន្លែងឃុំខ្លួនលោក កឹម សុខា ជាក់លាក់នៅឡើយដែរ។ កញ្ញាបន្តថា ក្រុមគ្រួសារចង់ទៅឲ្យដល់មណ្ឌលឃុំឃាំងត្រពាំងផ្លុងភ្លាមៗ។
កញ្ញា កឹម មនោវិទ្យា បានបញ្ជាក់ដូច្នេះ បន្ទាប់ពីសារព័ត៌មានក្នុងស្រុកចុះផ្សាយថា លោក កឹម សុខា ត្រូវបានបញ្ជូនទៅឃុំខ្លួននៅពន្ធនាគារត្រពាំងផ្លុង ស្ថិតនៅក្នុងខេត្តត្បូងឃ្មុំ ជាប់ព្រំដែនវៀតណាម។
លោក កឹម សុខា ត្រូវបានសមត្ថកិច្ចចាប់ខ្លួនកាលពីម៉ោង ១២ និង ៣៥នាទីរំលងអធ្រាត្រឈានចូលថ្ងៃទី០៣ ខែកញ្ញានេះ នៅឯគេហដ្ឋានរបស់លោក៕
0 comments:
Post a Comment