លោកនាយករដ្ឋមន្ត្រី ហ៊ុន សែន នៅថ្ងៃ សុក្រនេះទាមទារឲ្យសហរដ្ឋអាមេរិកបកស្រាយរឿងអាមេរិកបង្រៀនមេដឹកនាំបក្សប្រឆាំងលោក កឹម សុខា មកផ្ដួលរំលំរបបដឹកនាំរបស់លោក
ដោយយកគំរូនៅប្រទេសយូហ្គោស្លាវី (Yugoslavia) និងស៊ែបី (Serbia) ជាដើម។
នៅចំពោះមុខកម្មករ-កម្មការនីរោងចក្រជាច្រើនរយនាក់ នៅថ្ងៃទី១៥ កញ្ញានេះ លោក នាយករដ្ឋ មន្ត្រី ហ៊ុន សែនថ្លែងសារខ្លាំងៗថា “រដ្ឋបាលអាមេរិក៤ជំនាន់ចុងក្រោយនេះ មិនអាចគេចពីការទទួលខុសត្រូវដោយមិនបកស្រាយករណីនេះទេ”។ លោកថា លោក កឹម សុខា និយាយទទួលស្គាល់ខ្លួនឯងថា បានទទួលការបណ្ដុះបណ្ដាលពីអាមេរិក ដើម្បីធ្វើការផ្លាស់ប្ដូរនៅកម្ពុជា។
លោកបញ្ជាក់ខ្លាំងៗថា៖ «តើ កឹម សុខា និយាយពិត ឬភូត?»។
បន្ថែមពីនេះលោក ហ៊ុន សែន សួរទៅអគ្គរដ្ឋទូតអាមេរិកប្រចាំកម្ពុជា ថា៖ «តើគិតដូចម្ដេចបានជាប្រាប់ពលរដ្ឋខ្លួនអោយប្រុងប្រយ័ត្នពីសុវត្ថិភាពនៅកម្ពុជា? តើអាមេរិកដឹងថាមានការវាយប្រហារដោយភេរវកម្មនៅកម្ពុជា ឬអាមេរិកចង់វាយមីស៊ីលមកកម្ពុជា? បើអាមេរិកដឹងព័ត៌មានពីភេរវកម្មនៅកម្ពុជាមែន សូមឲ្យអាមេរិកប្រាប់មក ក្នុងនាមជាដៃគូរប្រឆាំងភេរវកម្ម»។
លោក ហ៊ុន សែន ក៏ប្រាប់ទៅអគ្គរដ្ឋទូតអាមេរិកប្រចាំកម្ពុជា កុំតាំងខ្លួនជាឪម៉ែរបស់កម្ពុជា ហើយលោកអំពាវនាវអោយពលរដ្ឋខ្មែរក្រោកឈរឡើង ដោយប្រកាន់ជាតិនិយមប្រឆាំងការជ្រៀតជ្រែកពីបរទេសដើម្បីការពារឯករាជ្យ និងសេរីភាព និងអធិបតេយ្យរបស់ខ្លួន។ លោក ហ៊ុន សែន រំលឹកថា លោកមិនចង់ឲ្យប្រវត្តិសាស្ត្រឆ្នាំ១៩៦៥ ដែលពលរដ្ឋខ្មែរតវ៉ាប្រឆាំងអាមេរិកកើតឡើងវិញទេ។
អាជ្ញាធររដ្ឋាភិបាលរបស់លោក ហ៊ុន សែន បានចាប់ខ្លួនលោក កឹម សុខា ទាំងយប់រំលងអធ្រាត្រ ចូលថ្ងៃទី៣ ខែ កញ្ញា ឆ្នាំ ២០១៧ហើយចោទប្រកាន់ជាផ្លូវការពីបទឃុបឃិតជាមួយបរទេស ក្នុងអំពើក្បត់ជាតិ ដែលលោក ហ៊ុន សែន ចោទអាមេរិកដោយត្រង់ៗថា “នៅពីក្រោយខ្នង បក្ស ប្រឆាំង” បន្ទាប់ពីសារព័ត៌មានគាំទ្ររដ្ឋាភិបាលបញ្ចេញវីដេអូលោក កឹម សុខា ថ្លែងនៅប្រទេសអូស្ត្រាលី(Australia) កាលពីឆ្នាំ២០១៣ ថាលោកមានមន្ត្រី NGO អាមេរិកនិងសាស្ត្រាចារ្យសាក ល
វិទ្យាល័យ នៅអាមេរិក បានបង្រៀនលោកពីយុទ្ធសាស្ត្រតាមបែបបដិវត្តន៏ នៅប្រទេសយូហ្គោស្លាវី (Yugoslavia) និងស៊ែបី (Serbia) ជាដើម។
ភ្លាមៗនេះ សារព័ត៌មានជាតិខ្មែរ មិនទាន់អាចទាក់ទងមន្ត្រីស្ថានទូតអាមេរិកប្រចាំកម្ពុជា ដើម្បី ឆ្លើយតបនឹងការទាមទាររបស់លោកនាយករដ្ឋមន្ត្រី ហ៊ុន សែនបាននៅឡើយទេ។ ក៏ប៉ុន្តែកាល
ពីដើមសប្រាហ៏នេះ លោក វីល្លៀម ហៃដ្ត ឯកអគ្គរដ្ឋទូតប្រចាំកម្ពុជាបានបដិសេធការចោទប្រកាន់ របស់រដ្ឋាភិបាលកម្ពុជា ដែលថា សហរដ្ឋអាមេរិកនៅពីក្រោយលោក កឹម សុខានិងគណបក្ស សង្គ្រោះជាតិ ដើម្បីរៀបចំយុទ្ធសាស្ត្រធ្វើបដិវត្តន៏ពណ៌នៅកម្ពុជា៕
0 comments:
Post a Comment