លោកនាយករដ្ឋមន្ត្រី ហ៊ុន សែនសម្លឹងមើលលោក វីល្លៀម ហៃដ្ត ឯកអគ្គរដ្ឋទូត
សហរដ្ឋអាមេរិក ប្រចាំកម្ពុជា នៅក្នុងពិធីមួយនាពេលកន្លងមក។
រដ្ឋាភិបាលកម្ពុជាបានចេញសេចក្ដីថ្លែងការណ៍មួយ កាលពីថ្ងៃពុធទី ១៣ កញ្ញា ឆ្នាំ ២០១៧ ដោយ ស្នើឲ្យរដ្ឋាភិបាលទីក្រុងវ៉ាស៊ីនតោន ពិចារណាទណ្ឌកម្មផ្នែកទិដ្ឋាការមកលើក្រុមមន្ត្រីក្រសួងការ បរទេសឡើងវិញ។
ការស្នើនេះ ធ្វើឡើងបន្ទាប់ពីរដ្ឋាភិបាលសហរដ្ឋអាមេរិក បានសម្រេចផ្អាកការចេញទិដ្ឋាការ ដោយ ហាមមិនឲ្យរដ្ឋមន្ដ្រី និងមន្ត្រីក្នុងក្រសួងការបរទេសខ្មែរជាច្រើនរូប និងក្រុមគ្រួសាររបស់ពួកគេ ធ្វើ ដំណើរទៅប្រទេសមហាអំណាចមួយនេះបន្ដទៀត។
ក្នុងសេចក្ដីថ្លែងការណ៍ ចេញផ្សាយកាលពីថ្ងៃពុធទី១៣ខែកញ្ញាម្សិលមិញ ក្រសួងការបរទេស កម្ពុជា អះអាងថា ការដែលខ្លួនមិនបាននាំយកជនជាតិដើមខ្លួន ដែលមានទោសលើទឹកដី អាមេរិក ត្រឡប់មកមាតុភូមិវិញនោះ គឺជាវិធានការមនុស្សធម៌មួយរបស់រដ្ឋាភិបាលកម្ពុជា និងធ្វើតាមការស្នើសុំរបស់ពួកគេ ដែលថា ចង់បន្ដរស់នៅជាមួយគ្រួសារនៅទីនោះ។
ក្រសួងការបរទេសកម្ពុជា សម្តែងការសោកស្ដាយ ដែលរដ្ឋាភិបាលអាមេរិក សម្រេចផ្អាកលែង ចេញទិដ្ឋាការដល់មន្ដ្រីក្រសួងការបរទេសកម្ពុជា ដោយថា នេះជាការបំពានស្មារតីកិច្ច សហប្រតិ បត្តិការក្នុងកម្មវិធីមាតុភូមិនិវត្ត រវាងប្រទេសទាំងពីរ។
ទណ្ឌកម្មផ្នែកទិដ្ឋាការនេះ ហាក់ធ្វើឡើងចំពេល រដ្ឋាភិបាលកម្ពុជា បានចោទសហរដ្ឋអាមេរិកថា នៅពីក្រោយនិងគាំទ្របក្សប្រឆាំង ក្នុងគោលបំណងដើម្បីផ្ដួលរំលំរដ្ឋាភិបាលលោកហ៊ុន សែន។ ហើយ ករណីនេះ ត្រូវបានឯកអគ្គរដ្ឋទូតអាមេរិកប្រចាំនៅកម្ពុជា លោក វីល្លៀម ហៃដ្ត បានចេញ សេចក្ដីថ្លែងការណ៍ច្រានចោល ដោយថា ជាការចោទប្រកាន់គ្មានមូនដ្ឋាន និងប្រាស់ចាកពីការពិត ទាំងស្រុង។
ទូតអាមេរិកប្រចាំកម្ពុជា អះអាងថា ចាប់ពីថ្ងៃទី១៣ខែកញ្ញាឆ្នាំ២០១៧ ស្ថានទូតនេះ នឹងលែងចេញទិដ្ឋាការប្រភេទ B1 ប្រភេទ B2 និង B1/B2 ដល់មន្ត្រីក្នុងក្រសួងការបរទេសកម្ពុជា ដែលមានឋានៈចាប់ពីថ្នាក់អគ្គនាយកដ្ឋាន រហូតដល់ថ្នាក់ដឹកនាំកំពូល(រដ្ឋមន្ត្រី) រួមទាំងសមាជិកក្នុងក្រុមគ្រួសារ របស់ពួកគេ។ នេះ បើតាមសេចក្ដីប្រកាសព័ត៌មាន ចេញផ្សាយលើគេហទំព័រស្ថានទូតអាមេរិកប្រចាំ កម្ពុជា នៅថ្ងៃទី១៣កញ្ញា។
ការផ្អាកចេញទិដ្ឋាការនេះ ទូតអាមេរិកលើកហេតុផលថា «មានប្រទេសមួយចំនួន បានបដិសេធ មិនទទួលយក ឬ ប្រើប្រាស់ហេតុផល ដែលមិនសមស្រប ដើម្បីពន្យារពេលទទួលយកពលរដ្ឋ នៃប្រទេសរបស់ពួកគេវិញនោះ»។
កាលពីខែសីហាឆ្នាំ២០១៧ រដ្ឋាភិបាលអាមេរិក បានប្រកាសថា នឹងដាក់ទណ្ឌកម្មផ្នែកទិដ្ឋាការ លើកម្ពុជា និងប្រទេស ៣ផ្សេងទៀត រួមមាន អេរីទ្រា ហ្គីណេ និងសេរ៉ាឡេអូន បន្ទាប់ពីប្រទេសទាំងនេះ បានបដិសេធទទួលយកជនជាតិខ្លួន ដែលមានទោសលើទឹកដីអាមេរិក ឲ្យត្រឡប់ទៅមាតុភូមិ កំណើតវិញ។
នៅពេលនេះ ទំនាក់ទំនងអាមេរិក-កម្ពុជា ហាក់កាន់តែតានតឹងឡើង ដោយស្ថានទូតអាមេរិកប្រចាំ កម្ពុជា កាលពីថ្ងៃទី១៣កញ្ញាម្សិលមិញនេះដែរ បានចេញសេចក្ដីប្រកាសព័ត៌មានមួយទៀត ដោយ ប្រាប់ឲ្យពលរដ្ឋអាមេរិកកាំង ដែលកំពុងរស់នៅក្នុងប្រទេសកម្ពុជា បង្កើនការប្រុងប្រយ័ត្ន សុវត្ថិភាព។ ស្ថានទូតនេះ ពន្យល់ថា ស្ថានការណ៍នយោបាយបច្ចុប្បន្ន នឹងធ្វើឲ្យមានភាព តានតឹង ខ្លាំង ក្នុងប្រទេសកម្ពុជា ដែលពលរដ្ឋអាមេរិកត្រូវតែប្រុងប្រយ័ត្នខ្ពស់បំផុត៕
0 comments:
Post a Comment