មន្ត្រីជាន់ខ្ពស់គណបក្សសង្គ្រោះជាតិ លោកសុន ឆ័យបានឲ្យដឹងថា សមាជិកសភាបក្សនេះ នឹង
ធ្វើពហិការកិច្ចប្រជុំគណៈកម្មាធិការអចិន្ត្រៃយ៍រដ្ឋសភា ជុំវិញការសម្រេចលើករណីលោកកឹម សុខា ប្រធាន គណបក្សសង្គ្រោះជាតិ នៅថ្ងៃច័ន្ទស្អែកនេះ ដោយថា “ជាកិច្ចប្រជុំរំលោភរដ្ឋធម្មនុញ្ញ”។
ក្នុងសន្និសីទកាសែតកាលពីថ្ងៃទី៧ ខែកញ្ញា អ្នកនាំពាក្យរដ្ឋសភាមកពីគណបក្សប្រជាជនកម្ពុជា លោក ឈាង វុន បានថ្លែងថា គណៈកម្មាធិការអចិន្ត្រៃយ៍រដ្ឋសភានឹងបើកកិច្ចប្រជុំវិសាមញ្ញបន្ទាន់ មួយនៅថ្ងៃទី១១ ខែកញ្ញា លើការបន្តឲ្យតុលាការចាត់ការតាមនីតិវិធី ឬក៏ផ្អាកនិតិវិធី ពាក់ព័ន្ធនឹង របាយការណ៍ពីក្រសួងយុត្តិធម៌ ជុំវិញចោទថា មេដឹកនាំបក្សប្រឆាំងលោក កឹម សុខា “ក្បត់ជាតិ” ។
តំណាងរាស្រ្តគណបក្សប្រឆាំង លោក សុន ឆ័យ បានឲ្យដឹងថា សមាជិកសភាគណបក្ស សង្គ្រោះ ជាតិបានសម្រេចមិនចូលប្រជុំសភានៅថ្ងៃស្អែកទេ។ លោកបន្ថែមថា បើសមាជិកសភាគណបក្ស ប្រឆាំងចូលរួមប្រជុំ ហាក់ដូចជាគាំទ្រឲ្យគណបក្សកាន់អំណាចសម្រេចក្នុងការបំពានលើអភ័យ ឯកសិទ្ធិរបស់តំណាងរាស្ត្រគណបក្សប្រឆាំង លោក កឹម សុខា។
លោក សុន ឆ័យ អះអាងថា ការអនុម័តក្នុងអង្គប្រជុំនោះ នឹងខុសច្បាប់ និងរំលោភរដ្ឋធម្មនុញ្ញ មាត្រា ៨០ ដោយលោកថា គណបក្សកាន់អំណាចមិនមានសំលេងគាំទ្រពីរភាគបី (២ភាគ៣) ក្នុង ការសម្រេចព្យូរអភ័យឯកសិទ្ធិ ឬមានសំលេង ៣ ភាគ៤ នៃសមាជិករដ្ឋសភា ក្នុងការគាំទ្រឲ្យ តុលាការចាត់ការលើករណីលោក កឹម សុខា នោះទេ។
ទាក់ទងនឹងការដកអភ័យឯកសិទ្ធិនេះ អ្នកនាំពាក្យរដ្ឋសភាមកពីគណបក្សប្រជាជនកម្ពុជា លោក ឈាង វុន អះអាងថា លោក កឹម សុខា ប្រព្រឹត្តបទល្មើសជាក់ស្តែង មិនបាច់ដកអភ័យឯកសិទ្ធិនោះ ទេ ដោយលោកថា យោងតាមមាត្រា ១២ នៃលក្ខន្តិកៈតំណាងរាស្ត្រ និងមាត្រា ៨០ នៃរដ្ឋធម្មនុញ្ញ។
លោក កឹម សុខា ត្រូវបានចាប់ខ្លួនទាំងកណ្តាលយប់ដោយគ្មានដីកាកាលពីយប់ថ្ងៃទី០២ ចូលដល់ថ្ងៃទី០៣ ខែកញ្ញានេះ។
តំណាងអង្គការសហប្រជាជាតិ និងស្ថានទូតធំៗរួមមាន អង់គ្លេស អូស្ត្រាលី អាមេរិក សហភាពអឺរ៉ុប និងប្រទេសមួយចំនួនទៀត បានសម្តែងការព្រួយបារម្ភជាខ្លាំង ជុំវិញការចាប់ខ្លួនមេបក្សរូប នោះ ហើយពួកគេជំរុញឲ្យរដ្ឋាភិបាលកម្ពុជា បញ្ឈប់ការគំរាមកំហែងលើគណបក្សប្រឆាំង។ ប៉ុន្តែ រដ្ឋាភិបាលកម្ពុជាមិនចាប់អារម្មណ៏នឹងប្រតិកម្មរបស់បណ្តាប្រទេសលោកខាងលិចទាំងអស់នោះទេ ហើយប្រទេស កុម្មុយនីស្តិ៍ចិនបានគាំទ្រចំណាត់ការរបស់រដ្ឋាភិបាលកម្ពុជាយ៉ងពេញទំហឹងដោយ ពោលពាក្យថា “សុខទុក្ខរបស់រដ្ឋាភិបាលកម្ពុជា គឺជាសុខទុក្ខរបស់ប្រទេសចិនដែរ” ៕
0 comments:
Post a Comment