ក្នុងសេចក្ដីជូនដំណឹងកាលពីថ្ងៃម្សិលមិញនេះ អ្នកនាំពាក្យរដ្ឋសភា ដែលមានតែក្រុមតំណាងរាស្ត្រគណបក្សប្រជាជនកម្ពុជានោះ បានប្រាប់ទៅក្រុមតំណាងរាស្ត្រគណបក្សសង្គ្រោះជាតិ ឲ្យប្រគល់សម្ភារៈទៅអគ្គលេខាធិការដ្ឋានរដ្ឋសភាវិញ នៅត្រឹមថ្ងៃទី២៤ ខែវិច្ឆិកានេះ។
គណបក្សសង្គ្រោះជាតិ ដែលជាសំឡេងជំទាស់ធំបំផុតនៅក្នុងប្រទេសកម្ពុជា ត្រូវបានតុលាការកំពូលសម្រេចរំលាយចោលកាលពីថ្ងៃទី១៦ ខែវិច្ឆិកា ទៅតាមបណ្ដឹងរបស់ក្រសួងមហាផ្ទៃ ហើយ
ថ្នាក់ដឹកនាំ និងសមាជិកសរុប ១១៨រូបរបស់បក្សនេះ ក៏ត្រូវបានហាមឃាត់ការធ្វើនយោបាយរយៈពេល ៥ឆ្នាំទៀតផង។
ទោះជាយ៉ាងណា បន្ទាប់ពីគណបក្សប្រឆាំងដ៏ធំនៅកម្ពុជា ត្រូវបានរំលាយកាលពីសប្ដាហ៍មុន សហគមន៍អន្តរជាតិ មានទាំងអាមេរិក ចក្រភពអង់គ្លេស និងសហភាពអឺរ៉ុប បានថ្កោលទោសចំពោះរដ្ឋាភិបាលកម្ពុជា និងបានលើកឡើងថា កម្ពុជាបានដើរឃ្លាតពីគន្លងលទ្ធិប្រជាធិបតេយ្យ។
សហគមន៍អន្តរជាតិ ក៏បានព្រមានដាក់ទណ្ឌកម្មសេដ្ឋកិច្ចលើប្រទេសកម្ពុជាផងដែរ បន្ទាប់ពីបក្សប្រឆាំងត្រូវបានរំលាយ ហើយមេដឹកនាំបក្សនេះ នៅតែបន្តស្ថិតនៅក្រោមការឃុំខ្លួននៅឡើយនោះ។
ប៉ុន្តែ លោកនាយករដ្ឋមន្ត្រី ហ៊ុន សែននិងរដ្ឋាភិបាលព្រមទាំងគណបក្សប្រជាជកម្ពុជារបស់លោក មិនព្រមធ្វតាមការទាមទារនិងការគំរាមរបស់បណ្តាបរទេសទាំងអស់នោះទេ។
ភ្លាមៗនេះ សារព័ត៌មានជាតិខ្មែរមិនអាចទាក់ទង អតីតតំណាងរាស្ត្របក្សប្រឆាំងក្នុងការសាកសួរ ថាពួកគេនឹងប្រគល់ជូនរដ្ឋសភាតាមការទាមទារដែរឬទេ ដោយសារពួកគេមួយចំនួនកំពុងស្ថិតនៅ ក្រៅប្រទេស៕
0 comments:
Post a Comment