លោកនាយករដ្ឋមន្រ្តី ហ៊ុន សែន បានជំរុញទៅអាមេរិកឲ្យកាត់ជំនួយទាំងអស់ ដោយថា ការកាត់ជំនួយនេះធ្វើឲ្យប៉ះពាល់ដល់អង្គការក្រៅរដ្ឋាភិបាលដែលស្ថិតនៅក្រោមការឧបត្ថម្ភពីអាមេរិក ទៅ វិញនោះទេ។
លោក ហ៊ុន សែន បានលើកឡើងបែបនេះនៅថ្ងៃទី១៩ ខែវិច្ឆិកា ក្នុងពិធីសំណេះសំណាលជាមួយកម្មករកម្មការិនីជាង ៤ពាន់នាក់នៅឯកោះពេជ្រ។
លោក ហ៊ុន សែន បានលើកឡើងថា៖ «ហើយយកល្អអំពាវនាវឲ្យអាមេរិកកាត់ជំនួយទាំងអស់តែ ម្ដង ព្រោះកាត់ទៅវាងាប់អា NGO [អង្គការក្រៅរដ្ឋាភិបាល] ក្នុងស្រុកទាំងអស់។ ទៅសម្លាប់កូន របស់ឯងតែម្ដងទៅ ស្អីឡើងកាត់ៗ កាត់ទៅ»។
លោក ហ៊ុន សែន ថា កម្ពុជាមិនអាចឱនក្បាល និងធ្វើឲ្យបាត់បង់អធិបតេយ្យភាព ឯករាជ្យជាតិ នោះទេ ដោយគ្រាន់តែចង់បានជំនួយបរទេសបន្តិចបន្ទួចនោះ។
លោក ហ៊ុន សែន បន្ថែមថា បន្ទាប់ពីអាមេរិកប្រកាសកាត់ជំនួយដល់មជ្ឈមណ្ឌលកម្ចាត់មីនកម្ពុជា ហៅកាត់ថា ស៊ីម៉ាក់ (CMAC)មក លោកបានទៅចរចាជាមួយចិន ហើយចិនបានយល់ព្រមផ្ដល់ជំនួយដល់ស៊ីម៉ាក់ទាំងអស់ ទើបអាមេរិកបានព្រមផ្ដល់ជំនួយឲ្យកម្ពុជាវិញ ព្រោះអាមេរិកព្រួយបារម្ភខ្លាចចិនដើរតួនាទីជំនួសខ្លួននៅកម្ពុជា។
ជាមួយគ្នានោះដែរ លោក ហ៊ុន សែន បន្ថែមថា លោកមិនខ្លាចនឹងការគម្រាមដាក់ទណ្ឌកម្មលើ ការបញ្ជារទិញទំនិញពីកម្ពុជានោះទេ ដោយសារចំនួនអ្នកបញ្ជាទិញមានខ្ពស់ជាងឆ្នាំមុន ហើយលោកថា អ្នកដែលគម្រាមបិទបញ្ជាទិញនោះ នឹងប្រឈមមុខជាមួយវិស័យឯកជនរបស់ខ្លួនដែល បានចុះកិច្ចសន្យាជាមួយកម្ពុជារួចហើយ។
ចក្រភពអង់គ្លេស សហភាពអឺរ៉ុប និងសហរដ្ឋអាមេរិកជាដើម បានព្រមានដាក់ទណ្ឌកម្មសេដ្ឋកិច្ចលើប្រទេសកម្ពុជា បន្ទាប់ពីមេដឹកនាំគណបក្សសង្គ្រោះជាតិ លោក កឹម សុខា ត្រូវបានចាប់ខ្លួនកាលពីដើមខែកញ្ញា ក្រោមការចោទប្រកាន់ពីរដ្ឋាភិបាលថា «ក្បត់ជាតិ» ហើយគណបក្សប្រឆាំងដ៏ធំមួយនេះ ត្រូវបានតុលាការកំពូលសម្រេចរំលាយចោលកាលពីថ្ងៃទី១៦ ខែវិច្ឆិកា។
បណ្ដាប្រទេសអឺរ៉ុបទាំងនោះ បានលើកឡើងថា កម្ពូជាកំពុងឃ្លាតឆ្ងាយពីគន្លងលទ្ធិប្រជាធិបតេយ្យ និងបានរំលោភសិទ្ធិពលរដ្ឋយ៉ាងធ្ងន់ធ្ងរ ប៉ុន្តែលោកនាយករដ្ឋមន្ត្រី ហ៊ុន សែននៅតែបន្តចាត់ការ គណបក្សប្រឆាំងទៅតាមច្បាប់ដដែល រហូតដល់ថ្ងៃនេះក្រុមមន្ត្រីគណបក្សកាន់អំណាចបាននាំគ្នាតម្លាក់ស្លាក និងពាក្យស្លោករបស់ គណបក្សប្រឆាំងចោលនៅទូទាំងប្រទេសទៀតផង៕
0 comments:
Post a Comment