ក្នុងទំព័រហ្វេសប៊ុករបស់ខ្លួននាថ្ងៃទី ១៤ ខែ មករា លោក សម រង្ស៊ី បានលើកឡើងថាលោកជំរុញ ផ្ដួចផ្ដើមនូវចលនាសង្គ្រោះជាតិថ្មីមួយ ដោយលោកថាដើម្បី រកដំណោះស្រាយមួយ លើកទឹកចិត្ត និងបំផុសបំផុលឡើងវិញនូវ កម្លាំងស្នេហាជាតិ និងកម្លាំងប្រជាធិបតេយ្យនៅកម្ពុជា។
លោកសម រង្ស៊ីលើកឡើងថា៖ «យើងត្រូវតែផ្តួចផ្តើមគំនិតថ្មីមួយ និងរកដំណោះស្រាយមួយ ដើម្បីលើកទឹកចិត្ត និងបំផុសបំផុលឡើងវិញ កម្លាំងស្នេហាជាតិ និងកម្លាំងប្រជាធិបតេយ្យ ក្នុងគោលបំណងបង្កើនប្រសិទ្ធភាព នៃការតស៊ូរបស់យើង ក្នុងដំណាក់កាល ដ៏លំបាកនេះ»។
លោកបន្ថែមថាការបង្កើតចលនាសង្គ្រោះជាតិ នឹងផ្តល់ផលប្រយោជន៍ ដូចជាចលនាសង្គ្រោះជាតិ ជាក្របខណ្ឌថ្មីមួយដែលមិនរងការរំលាយ ហើយអាចអំពាវនាវ “ឲ្យប្រជាពលរដ្ឋ រៀបចំធ្វើបាតុកម្ម និងកូដកម្ម ដោយមានការគាំទ្រពីកងកម្លាំងប្រដាប់អាវុធ”។
លោក សម រង្ស៊ីបន្ថែមថាចលនានេះក៏ជាការបង្ហាញពីការបន្តសកម្មភាពរបស់ គណបក្សសង្គ្រោះ ជាតិ ការប្រមូលកម្លាំងគាំទ្រពីគ្រប់មជ្ឈដ្ឋាន ទាំងជាតិ អន្តរជាតិ និង សង្គមស៊ីវិល ដែលមានការ រៀបចំក្បាលម៉ាស៊ីន មកពីគណបក្សសង្គ្រោះជាតិ ដើម្បីធានាឲ្យមានការទំនាក់ទំនងគ្នា ដោយ សេរីភាព ចំហ និងរលូន ហើយក៏អាចធ្វើសេចក្តីសម្រេច ប្រកបដោយតម្លាភាព ប្រសិទ្ធភាព និង រហ័សទាន់ពេលវេលា។
ជាមួយគ្នានោះលោកសម រង្ស៊ីក៏បានលើកឡើងដែរថាចលនាសង្គ្រោះជាតិនេះក៏ជំរុញ ឲ្យមានការដោះលែងលោក កឹម សុខា និងអ្នកទោសមនះសិការទាំងអស់ និងឲ្យមានការបោះឆ្នោត ដោយ សេរី ត្រឹមត្រូវ និងយុត្តិធម៌ដែល មានការចូលរួមពីគណបក្សសង្គ្រោះជាតិ។
ភ្លាមៗនេះ សារព័ត៌មានជាតិខ្មែរមិនអាចទាក់ទង លោក សុខ ឥសានអ្នកនាំពាក្យគណបក្ស ប្រជាជនកម្ពុជា ដេីម្បីឆ្លេីយតបនឹងការប្រកាសបង្កេីតចលនាថ្មីរបស់លោកសម រង្ស៊ីនេះបានទេ នៅថ្ងៃ ចន្ទនេះ៕
0 comments:
Post a Comment