មេឈ្មួញសាន ចយ និងគំនរឈេីរបស់ខ្លួន ដែលត្រៀមដឹកយកទៅលក់នៅ
ស្រុកយួន យ៉ាងគឃ្លេីន។
មេឈ្មួញ សាន ចយ ដែលត្រូវជាពូបង្កេីតរបស់ឧកញ៉ា លឹម ប៊ុនណា ហៅខ្នា ដល្បីឈ្មោះ នៅខេត្ត ត្បូងឃ្មុំនោះ កំពុងកាប់ឈើនិងដឹកជញ្ជូនឈើខុសច្បាប់ចេញពីតំបន់ព្រៃសហគមន៍អូរល្វាក់
ជាប់ព្រំប្រទល់ស្រុកលំផាត់ ខេត្តរតនគិរី និងស្រុកកោះញែក ខេត្តមណ្ឌលគិរី ដ៏វិនាសហិនហោច។
ប្រភពពីប្រជាសហគមន៏ឲ្យដឹងថា រយៈពេលប្រមាណ១ខែកន្លងទៅនេះមេឈ្មួញ សាន ចយ បានកាប់ឈើនិងដឹកជញ្ជូនឈើចេញពីតំបន់ព្រៃសហគមន៍អូរល្វាក់
យកទៅស្តុកទុកក្នុងចម្ការដូងប្រេងដីក្រុមហ៊ុនសម្បទានសេដ្ឋកិច្ចដូនពេញ ហើយបន្ទាប់មកដឹកជញ្ជូនចេញទៅស្រុកយួនយ៉ាងរលូន។
លោក កែប កត់ នាយខណ្ឌរដ្ឋបាលព្រៃឈើខេត្តរតនគិរី
និងលោក ថង សាវុន អភិបាលខេត្តរតនគិរី ត្រូវមជ្ឈដ្ឋាននានារិះគន់ថា គិតតែពីរឿងផលប្រយោជន៍ហើយបណ្ដោយឲ្យឈ្មួញបំផ្លាញព្រៃឈើឈ្មោះ
សាន ចយ យ៉ាងមហន្តរាយ។
ថ្មីៗនេះប្រភពពីប្រជាសហគមន៍ការពារព្រៃឈើនៅតំបន់អូរល្វាក់
ជាប់ព្រំប្រទល់រវាងស្រុកលំផាត់ ខេត្តរតនគិរី និងស្រុកកោះញែក ខេត្តមណ្ឌលគិរី
បានឲ្យដឹងថា ព្រៃសហគមន៍ក្នុងមូលដ្ឋានពួកគាត់កំពុងត្រូវបានមេឈ្មួញ សាន ចយ បំផ្លាញយ៉ាងមហន្តរាយ
ហើយមិនឃើញមន្ត្រីបរិស្ថាន មន្ត្រីរដ្ឋបាលព្រៃឈើ និងសមត្ថកិច្ចពាក់ព័ន្ធចាត់វិធានការទប់ស្កាត់នោះទេ។
មន្ត្រីអង្គការក្រៅរដ្ឋាភិបាលនិងសកម្មជនព្រៃឈើក្នុងខេត្តមណ្ឌលគិរី បានឲ្យដឹងថា
ទាល់តែមានការឃុបឃិតជាប្រព័ន្ធពីសំណាក់មន្ត្រីបរិស្ថាន មន្ត្រីរដ្ឋបាលព្រៃឈើ
និងសមត្ថកិច្ចពាក់ព័ន្ធទើបមេឈ្មួញ សាន ចយ អាចកាប់ឈើនិងដឹកឈើតាមរថយន្តយីឌុបធំៗចំណុះរាប់សិបតោនចេញពីតំបន់អូរល្វាក់
ឆ្លងកាត់ស្រុកលំផាត់ ក្រុងបានលុង តាមផ្លូវជាតិលេខ៧៨ ចេញទៅស្រុកយួនតាមច្រកទ្វារអន្តរជាតិអូរយ៉ាដាវ
យ៉ាងរលូន។
ប្រជាសហគមន៍ការពារព្រៃឈើនៅតំបន់អូរល្វាក់
បានឲ្យដឹងថា មួយរយៈពេលកន្លងទៅនេះមេឈ្មួញ សាន
ចយ បានប្រមូលកម្មករនិងពលរដ្ឋក្នុងមូលដ្ឋានឲ្យចូលកាប់ឈើនិងដឹកជញ្ជូនឈើចេញពីព្រៃសហគមន៍ដោយប្រើប្រាស់រថយន្តប្រភេទវ៉េអង(V1)
ដែលមានចំណុះរាប់សិបម៉ែត្រគូបឬរាប់សិបតោន។ ប្រជាសហគមន៍ការពារព្រៃឈើបានលើកឡើងថា
ទំនងជាមេឈ្មួញ សាន ចយ ចេះបែងចែកផលប្រយោជន៍ដល់មន្ត្រីជំនាញនិងសមត្ថកិច្ចពាក់ព័ន្ធទើបអាចកាប់ឈើនិងដឹកជញ្ជូនឈើចេញពីតំបន់អូរល្វាក់
យ៉ាងរលូនហើយប្រធានមន្ទីរបរិស្ថានខេត្តរតនគិរី ក៏ដូចជាប្រធានមន្ទីរកសិកម្ម
និងមេរដ្ឋបាលព្រៃឈើខេត្តរតនគិរី សុទ្ធតែរក្សាភាពស្ងៀមស្ងាត់។
ប្រភពពីមន្ត្រីអាជ្ញាធរមូលដ្ឋានក្នុងស្រុកលំផាត់
បានឲ្យដឹងថា មួយផ្នែកនៃឈើដែលមេឈ្មួញ សាន ចយ ចូលកាប់និងប្រមូលទិញក្នុងព្រៃសហគមន៍អូរល្វាក់
ត្រូវបានដឹកជញ្ជូនយកទៅស្តុកទុកនៅក្នុងចម្ការដូងប្រេងរបស់ក្រុមហ៊ុនដូនពេញ។
នៅពេលប្រមូលបានច្រើនទើបមេឈ្មួញ សាន ចយ ប្រើប្រាស់រថយន្តប្រភេទវ៉េអង ចំណុះរាប់សិបម៉ែត្រគូបដឹកចេញពីចម្ការដូងប្រេងក្រុមហ៊ុនដូនពេញ
ឆ្ពោះទៅស្រុកយួនតាមច្រកទ្វារអន្តរជាតិអូរយ៉ាដាវ យ៉ាងរលូនដោយគ្មានសមត្ថកិច្ចណាប៉ះពាល់ឡើយ។
សូម្បីតែមន្ត្រីគណៈកម្មការបង្ក្រាបនិងទប់ស្កាត់បទល្មើសព្រៃឈើដែលកំពុងឈរជើងនៅក្នុងខេត្តរតនគិរី
ក៏មិនហ៊ានប៉ះពាល់មេឈ្មួញ សាន ចយ ដែលកំពុងបំផ្លាញព្រៃឈើនៅតំបន់អូរល្វាក់
ឲ្យវិនាសសាបសូន្យនោះទេ។ ទន្ទឹមនឹងនេះមេឈ្មួញ ស្រេង
ម៉េង ហៅម៉េង៣ពូថៅ ដែលជាមេការក្រុមហ៊ុនលឹមរ៉ូយ៉ាល់គ្រុប ក៏កំពុងសម្រុកកាប់ឈើនិងដឹកជញ្ជូនឈើចេញពីតំបន់អូរល្វាក់
ចេញពីតំបន់ដែនជម្រកសត្វព្រៃលំផាត់ ចូលទៅស្រុកយួនតាមច្រកទ្វារអន្តរជាតិអូរយ៉ាដាវ
យ៉ាងពេញបន្ទុកផងដែរព្រោះមានការឃុបឃិតជាប្រព័ន្ធពីសំណាក់មន្ត្រីជំនាញនិងសមត្ថកិច្ចពុករលួយជាច្រើនស្ថាប័ននៅក្នុងខេត្តនេះ។
សារព័ត៌មានជាតិខ្មែរមិនអាចទាក់ទងលោក
សាន ចយ និងលោក ស្រេង ម៉េងដេីម្បីសម្ភាស បន្ថែមពីព័ត៌មានខាងលេីនេះបានទេ នៅថ្ងៃនេះ៕
0 comments:
Post a Comment