លោកសម រង្ស៊ី ដែលត្រូវបានគេមេីលឃេីញថាបានបរាជ័យទាំងស្រុងនៅទាំងនៅលេីសមរភូមិ ហ្វេសប៊ុក និងសមរភូមិតុលាការខ្មែរនោះ បានអះអាងនៅថ្ងៃ ចន្ទ ទី ១២ កុម្ភះនេះថា លោកមិនមែនជា «ភេរវករ» និង «ឧទ្ទាម»ដូចទៅនឹងការចោទប្រកាន់ពីលោកនាយករដ្ឋមន្ត្រី ហ៊ុន សែន នោះឡើយ ហើយលោកផ្ដាំទៅមេដឹកនាំបក្សកាន់អំណាចវិញថា «ឈប់ឆ្កួតទៅ!»។
តាមរបាយការណ៏របស់សហគ្រាសទំនាក់ទំនងសាធារណះនៃក្រុមហ៊ុន Burson –Marsteller ដែលមានមូលដ្ឋាននៅសហរដ្ឋអាមេរិក បានប្រកាសជាផ្លូវការកាលពីថ្ងៃ ទី ៩ កុម្ភះ ឆ្នំា ២០១៨ ថា លោកនាយករដ្ឋមន្ត្រី ហ៊ុន សែនគឺជាមេដឹកនាំសាធារណះពិភពលោក ជាប់ចំណាត់ថ្នាក់ទី៣ ដែលមានប្រជាប្រិយភាពជាងគេបំផុតលេីបណ្តាញផ្សព្វផ្សាយសង្គមហ្វេសប៊ុក (Facebook) បន្ទាប់ពីប្រធានាធិបតីឥណ្ឌា លោក ណារិនដ្រា ម៉ូឌី ដែលជាប់ចំណាត់ថ្នាក់លេខ២ ហេីយលោក ដូណាល់ ត្រាំ ប្រធានាធិបតីសហរដ្ឋអាមេរិក ជាប់ចំណាត់ថ្នាក់លេខ១។
លោក សម រង្ស៊ី បានប្រតិកម្មបែបនេះនៅលើទំព័រហ្វេសប៊ុកផ្លូវការរបស់លោកនៅថ្ងៃនេះ ជាងមួយសប្ដាហ៍បន្ទាប់ពីលោក ហ៊ុន សែន បានចោទលោកសម រង្ស៊ីដែលទេីបបង្កេីតចលនាសង្គ្រោះជាតិ ជាផ្លូវការកាលពីថ្ងៃ ទី ២៨ មករា កន្លងមកថា ជា«មេភេរវករ»ដ៏ធំ ដែលមានចេតនាបង្កអសន្តិសុខដល់កម្ពុជា។
លោក ហ៊ុន សែន ថ្លែងក្នុងជំនួបជាមួយកម្មករ-កម្មការិនីកាលពីថ្ងៃទី០១កុម្ភៈថា៖ «ហើយខ្ញុំសូមផ្ដាំកុំមកអាស៊ីឲ្យសោះ! សូមកុំមកក្បែរអាស៊ី! បើអ្នកឯងតាំងខ្លួនជាភេរវករហើយ ខ្ញុំនឹងតាមយកអ្នកឯងទាល់តែបាន។ ឥឡូវនេះ គេកំពុងប្រកាសខ្លួនជាមេភេរវករហើយ មិនមែនត្រឹមតែជាអង្គការក្រៅច្បាប់ ប៉ុន្តែ ជាភេរវករតែម្ដង ជាអង្គការភេរវកម្ម»។
ជាប្រតិកម្មតបទៅវិញ លោក សម រង្ស៊ី ដែលកំពុងរស់នៅនិរទេសខ្លួនឯងនៅឯក្រៅប្រទេសដើម្បី គេចចេញពីបណ្ដឹងជាច្រើននៅតុលាការកម្ពុជានោះ បានបញ្ជាក់ថា លោកមិនមែនជា «ភេរវករ» និងជា «ឧទ្ទាម»ទេ។
លោក សម រង្ស៊ី រៀបរាប់ថា៖ «ហ៊ុន សែន អើយ! ឈប់ឆ្កួតទៅ! បើខ្ញុំជាភេរវករ និងជាឧទ្ទាមមែន ដូចលោកឯងថានោះ មិនមែនប្រជាពលរដ្ឋខ្មែរគ្រប់មជ្ឈដ្ឋាន អបអរសាទរវត្តមានខ្ញុំនៅគ្រប់ ទីកន្លែង ជាពិសេស នៅតាមវត្តអារាមខ្មែរទូទាំងពិភពលោក ហើយក៏មិនមែនឥស្សរជនជាន់ខ្ពស់នៅគ្រប់ប្រទេសជាមិត្ត ដែលខ្ញុំទៅធ្វើទស្សនកិច្ច គេផ្តល់ការលើកទឹកចិត្តឲ្យខ្ញុំក្នុងការតស៊ូ ដើម្បី នាំមកនូវលទ្ធិប្រជាធិបតេយ្យនៅកម្ពុជា»។
លោក សម រង្ស៊ី បានចោទលោក ហ៊ុន សែន វិញថា ជា«ភេរវករ» និងជា«ឧក្រិដ្ឋជនក្បត់ជាតិ» ដោយថា បានសម្លាប់មនុស្សជាច្រើនក្នុងប្រព័ន្ធរដ្ឋមួយដែលលោក សម រង្ស៊ី ហៅថា «ព្រៃផ្សៃ»។
លោក ហ៊ុន សែន បានចោទលោកសម រង្ស៊ីដែលជាគូប្រជែងនយោបាយរបស់លោកថាជា «ភេរវករ» បន្ទាប់ពីលោក សម រង្ស៊ី បានប្រកាសបង្កើតចលនាសង្គ្រោះជាតិនៅឯសហរដ្ឋអាមេរិក កាលពីចុងខែមករាកន្លងមក ក្រោយពីគណបក្សសង្គ្រោះជាតិត្រូវបានតុលាការកំពូលសម្រេចរំលាយចោលកាលពីពាក់កណ្ដាលខែវិច្ឆិកាឆ្នាំមុន។
នៅពេលនេះ លោកនាយករដ្ឋមន្ត្រី ហ៊ុន សែនមិនទាន់មានប្រតិកម្មអ្វីចំពោះការលេីកឡេីងងរបស់ លោកសម រង្ស៊ីនៅឡេីយទេ៕
0 comments:
Post a Comment