លោកនាយករដ្ឋមន្ត្រី ហ៊ុន សែននិងលោកឧបនាយករដ្ឋមន្ត្រី ស ខេងកំពុងរងនូវ
ទណ្ឌកម្មទិដ្ឋកាពីប្រទេសអាល្លឺម៉ង់។
កាសែតភ្នំពេញ ប៉ុស្តិ៍
បានចុះផ្សាយនៅថ្ងៃនេះថា
រដ្ឋាភិបាលអាល្លឺម៉ង់ កាលពីពាក់កណ្ដាលខែកុម្ភៈនេះ បានសម្រេចផ្អាកផ្ដល់ទិដ្ឋាការអនុគ្រោះចំពោះការធ្វើដំណើរលក្ខណៈឯកជនរបស់លោកនាយករដ្ឋមន្ត្រី ហ៊ុន
សែន និងក្រុមគ្រួសាររបស់លោក
និងសមាជិករដ្ឋាភិបាលមួយចំនួនទៀត។
រដ្ឋាភិបាលអាល្លឺម៉ង់ បានសម្រេចចាត់វិធានការប្រឆាំងនឹងក្រុមមេដឹកនាំកម្ពុជាបែបនេះ ខណៈដែលរដ្ឋាភិបាលកម្ពុជាពុំបានកែប្រែស្ថានការណ៍នយោបាយឲ្យវិលត្រឡប់ទៅដូចដើមវិញនោះ។
បើតាមការចុះផ្សាយដដែលនេះ
ជំហររដ្ឋាភិបាលអាល្លឺម៉ង់បែបនេះ
បានកើតឡើងនៅមុនដំណើររបស់រដ្ឋមន្ត្រីក្រសួងមហាផ្ទៃ
លោក ស ខេង ទៅកាន់ប្រទេសអាល្លឺម៉ង់
នៅក្នុងខែវិច្ឆិកាចុងឆ្នាំនេះ។
អ្នកវិភាគនយោបាយជើងចាស់ លោកបណ្ឌិត
ឡៅ ម៉ុងហៃ យល់ថា ជំហរបែបនេះរបស់អាល្លឺម៉ង់ ទំនងជាចង់បង្ហាញទៅមេដឹកនាំបក្សកាន់អំណាចនៅកម្ពុជា ឲ្យងាកទៅគោរពតាមកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ស្របតាមគោលការណ៍លទ្ធិប្រជាធិបតេយ្យសេរីពហុបក្ស។
បើតាមអ្នកវិភាគនយោបាយរូបនេះ ប្រទេសកម្ពុជានឹងខាតបង់ផ្នែកសេដ្ឋកិច្ច
និងការទូត ប្រសិនបើមេដឹកនាំកម្ពុជា
នៅតែប្រកាន់ជំហរដដែល
ដោយមិនសម្របសម្រួលតាមសេចក្ដីសម្រេចរបស់បណ្ដាប្រទេសលោកសេរីទេនោះ។
លោកយល់ថា៖«ជាតិមួយ មេដឹកនាំ គេបិទទ្វារមិនឲ្យចូលផ្ទះគេ វាអត់ល្អទាល់តែសោះ ប្រហែលជាគិតតែពីរឿងអំណាចច្រើនជាង
ហើយនឹងពឹងផ្អែកលើមហាអំណាចមួយពីរ ដូចជាប្រទេសចិន ទៅមកទៅមក
យើងរស់នៅក្នុងពិភពតូច។ ពីមុន ពិភពលោកទាំងមូល ឥឡូវរួញមកទៀត»។
អ្នកស្រាវជ្រាវពីការអភិវឌ្ឍសង្គម លោក
មាស នី មានប្រសាសន៍ថា ដំណាក់កាលនេះអ្នកនយោបាយខ្មែរហាក់កំពុងជួយការពិបាកក្នុងការរកដំណោះស្រាយនយោបាយឲ្យបានល្អដូចសភាពដើមវិញ ខណៈការបោះឆ្នោតថ្នាក់
ជាតិខិតជិតមកដល់។ យ៉ាងណាក៏ដោយលោកថា
ដើម្បីកុំឲ្យកម្ពុជារងសម្ពាធអន្តរជាតិ អ្នកនយោបាយខ្មែរត្រូវយកបញ្ហាដោះស្រាយគ្នា
ដោយគិតប្រយោជន៍ជាតិជាធំ ទើបនាំនាវាកម្ពុជាឈានទៅរកឯកភាពជាតិពិតប្រាកដ។
លោកមានប្រសាសន៍ថា«ខ្ញុំចង់ឃើញ ការផ្លាស់ប្តូរ ដោយសុចិត ដោយសុឆន្ទៈពិតប្រាកដពីអ្នកដឹកនាំខ្មែរ ជាជាងការទទួលរងពីសម្ពាធ ពីខាងក្រៅ ដូចយើងឃើញហើយសម្ពាធពីក្រៅ ពេលខ្លះវាមានប្រសិទ្ធិភាពនៅពេលគេធ្វើ ប៉ុន្តែក្រោយមកខ្មែរយើងវិលទៅរកក្រឡាចាស់វិញដដែល
ដូចគេថា និយាយថាកន្ទុយខ្វៀន មកខាំតែកន្ទយខ្លួនឯងដដែល»។
ក្រសួងការបរទេសអាមេរិក
កាលពីថ្ងៃទី៦ខែធ្នូថា បានសម្រេចដាក់ទណ្ឌកម្មផ្នែកទិដ្ឋាការលើមន្ត្រីជាន់ខ្ពស់កម្ពុជា និងសមាជិកក្រុមគ្រួសាររបស់ពួកគេ បន្ទាប់ពីគណបក្សប្រឆាំងដ៏ធំនៅកម្ពុជាត្រូវបានរំលាយចោល ហើយមេដឹកនាំបក្សនេះ
នៅតែបន្តស្ថិតនៅក្រោមការឃុំខ្លួននៅឡើយ។
ក្រោយមកទៀត កាលពីថ្ងៃទី១៤ ខែធ្នូ សហគមន៍អឺរ៉ុបបានបោះឆ្នោតដោយឯកច្ឆន្ទលើសេចក្ដីសម្រេចដាក់ទណ្ឌកម្មដកប្រព័ន្ធអនុគ្រោះពន្ធផ្នែកពាណិជ្ជកម្មជាមួយកម្ពុជា រួមទាំងការនាំចេញផលិតផលពីវិស័យរោងចក្រកាត់ដេរសម្លៀកបំពាក់ និងស្បែកជើង
និងទំនិញដទៃទៀតជាបណ្ដោះអាសន្នសិន ដោយថា ការទណ្ឌកម្មនេះគឺ ចង់ឲ្យរដ្ឋាភិបាលកម្ពុជាស្តារស្ថានភាពរំលោភសិទ្ធិមនុស្ស និងប្រជាធិបតេយ្យឡើងវិញ។
ប៉ុន្តែលោក នាយករដ្ឋមន្ត្រីហ៊ុន សែន កាលពីថ្ងៃទី១៥ ខែធ្នូបានថ្លែងក្នុងកម្មវិធីមួយថា
លោកមិនខ្វល់ចំពោះការដាក់ទណ្ឌកម្មនេះទេ
ហើយថា ការដាក់ទណ្ឌកម្មនោះមិនប៉ះពាល់ដល់រូបលោកនោះឡើយ។
លេីសពីនេះ គេសង្កេតឃេីញលោកហ៊ុន
សែនចេញមុខប្រឆាំងនឹងអាមេរិកដោយប្រេីពាក្យធ្ងន់ៗទៀតផង៕
0 comments:
Post a Comment