.jpg)
លោក សម រង្ស៊ី ដែលកំពុងនិរទេសខ្លួននៅឯក្រៅប្រទេសនោះ បានបង្ហោះវីដេអូឃ្លីបលើ គេហទំព័រហ្វេសប៊ុក របស់លោក កាលពីថ្ងៃម្សិលមិញថា តាមគណៈកម្មាការព្រំដែនខ្មែរ របស់ លោក ស៊ាន ប៉េងសែ មានទីតាំងនៅប្រទេសបារាំង បានបញ្ជាក់ថា សន្ធិសញ្ញាព្រំដែននៅចន្លោះឆ្នាំ១៩៧៩ ដល់ឆ្នាំ១៩៨៥ ជាសន្ធិសញ្ញាកាត់ដីឲ្យទៅវៀតណាម ។ លោកថា “ពិសេស កោះ ត្រល់”។
លោកថា៖ «នរណាធ្វើឲ្យបាត់កោះត្រល់គឺ ហ៊ុន សែន។ លោក ឌី ការ៉េត ដែលធ្វើការជាមួយលោក ស៊ាន ប៉េងសែ បានបញ្ជាក់ថា សន្ធិសញ្ញាព្រំដែនឆ្នាំ១៩៨២ ដែល ហ៊ុន សែន ប្រគល់កោះត្រល់ឲ្យទៅយួន គ្រប់គ្រង ហើយយើងបាត់បង់កោះត្រល់ គឺដោយសារ ហ៊ុន សែន។ ហ៊ុន សែន គឺជាជនក្បត់ជាតិ បងប្អូន!»។
ប្រធានក្រុមអ្នកស្រាវជ្រាវកិច្ចការព្រំដែន និងជាប្រធានរាជ្យបណ្ឌិត្យសភា របស់រដ្ឋាភិបាល លោកបណ្ឌិត សុខ ទូច មិនយល់ស្របទៅនឹងការចោទប្រកាន់បែបនេះរបស់លោក សម រង្ស៊ី នេះឡើយ ដោយលោកចាត់ទុកថា ការនិយាយនេះ ខុសពីការពិត ហើយថា លោក សម រង្ស៊ី កំពុងយកបញ្ហាព្រំដែនសម្រាប់កេងចំណេញនយោបាយ ។
លោក សម រង្ស៊ី បានចោទលោក ហ៊ុន សែន បែបនេះ បន្ទាប់ពីលោកបានបង្កើតចលនាសង្គ្រោះជាតិ ដែលអតីតមេដឹកនាំបក្សប្រឆាំងរូបនេះ អះអាងថា ដើម្បីធ្វើយុទ្ធនាការប្រឆាំងនឹងរដ្ឋាភិបាលលោក ហ៊ុន សែន និងដើម្បីទាមទារយកគណបក្សសង្គ្រោះជាតិមកវិញ សម្រាប់ចូលរួមនៅក្នុងការបោះឆ្នោតនាពេលខាងមុខ។
ប៉ុន្តែ លោក នាយករដ្ឋមន្ត្រីហ៊ុន សែន បានព្រមានកាលពីសប្ដាហ៍មុនថា នឹងចាប់ខ្លួនលោក សម រង្ស៊ី ប្រសិនបើអតីតមេដឹកនាំបក្សប្រឆាំងរូបនេះ ហ៊ានចូលមកកាន់តំបន់អាស៊ី ដោយចោទថា លោក សម រង្ស៊ី កំពុងតាំងខ្លួនជាមេភេរវករ។
លោកថ្លែងថា៖ «ខ្ញុំសូមផ្តាំ កុំមកក្បែអាស៊ីឲ្យសោះ! បើអ្នកឯងតាំងខ្លួនជាភេរវករហើយ ខ្ញុំនឹងតាម យកអ្នកឯងឲ្យទាល់តែបាន។ ឥឡូវនេះ គេកំពុងតែប្រកាសខ្លួនជាភេរវករ ហើយមិនមែនគ្រាន់តែ អង្គការក្រៅច្បាប់ទេ ជាភេរវករតែម្តង ជាអង្គការភេរវកម្ម សុំអញ្ជើញធ្វើចុះ។ ខ្ញុំថា មិនចង់ផ្ញើសារ ហ្នឹងចេញទៅទេ ព្រោះខ្ញុំចង់ឲ្យវាស្ងប់ ឲ្យវាមក ប៉ិនថា ជ្រុលមាត់ហើយ ថាទៅ កុំឲ្យវាមក»។
ទោះយ៉ាងណា អតីតបក្សប្រឆាំង បានចោទលោក ហ៊ុន សែន ថា បានធ្វើឲ្យសន្ធិសញ្ញាចាស់ៗរស់ឡើងវិញ បន្ទាប់ពីកម្ពុជាបានចុះសន្ធិសញ្ញាបំពេញបន្ថែមជាមួយប្រទេសវៀតណាម នៅឆ្នាំ២០០៥ បន្ថែមលេីសន្ធិសញ្ញាឆ្នាំ ១៩៨៥ ដែលបានអនុម័តដោយរដ្ឋសភា៕
0 comments:
Post a Comment