ប្រមុខរាជរដ្ឋាភិបាល ជូនថវិកាដល់កម្មការនីមានផ្ទៃពោះ កាលពីថ្ងៃពុធ នៅខណ្ឌពោធិ៍
សែនជ័យ គឺមុនពេលមួយថ្ងៃ នៃការផ្ទុះបាតុកម្ម កាលពីម្សិលមិញ។
ក្រុមកម្មករបានប្រមូលផ្ដុំគ្នានៅមុខច្រកទ្វារនៃរោងចក្រទាំង ៤ ស្ថិតនៅក្នុងខណ្ឌពោធិ៍សែនជ័យ ដើម្បីស្វែងរកកិច្ចអន្តរាគមន៍ពីអាជ្ញាធរពាក់ព័ន្ធ បន្ទាប់ពីពួកគេឃើញថា សម្ភារៈត្រូវបានដឹកចេញពី រោងចក្រ និងបាត់អ្នកគ្រប់អស់ពីក្រុមហ៊ុន។
កម្មករផ្នែកជាងម៉ាស៊ីនធ្វើការនៅរោងចក្រ យ៉ូដា ហ្គាមេន លោក ធុន ពិសិដ្ឋ ឲ្យដឹងថា គណៈគ្រប់ គ្រងក្រុមហ៊ុន បានបាត់ពីរោងចក្រ និងបានលួចដឹកសម្ភារៈអស់មួយចំនួនផងដែរកាលពីល្ងាចថ្ងៃម្សិលមិញ។
លោកបន្ថែមថា៖«យើងធ្វើការសុខៗស្រាប់តែគេរត់ចោលយើងតែម្តង ទៅចោលដោយយើងអត់ ដឹងខ្លួន ដោយយប់មិញហ្នឹង អ្នកដែលផ្ទះជួលនៅក្បែររោងចក្រហ្នឹង គេឃើញមានការដឹងអីវ៉ាន ចេញ។ អញ្ចឹង គេក៏ឆោរឡោមក ដើម្បីបានកម្លាំងច្រើន កុំឲ្យថៅកែរោងចក្រហ្នឹងដឹកអីវ៉ានចេញ ហើយមុនហ្នឹងថៅកែដឹកអីវ៉ាន់ចេញជាច្រើនឡាន។ ឥលូវយើងឃាត់បាននៅប៉ុណ្ណឹង យើងអត់ឲ្យវា ចេញអីវ៉ានដើម្បីធ្វើម៉េចឲ្យមានដំណោះស្រាយ។ សំខាន់គឺបើកប្រាក់ខែក៏ដូចប្រាក់អត្ថប្រយោជន៍ ជូនកម្មករសិន»។
កម្មករផ្នែកដេរម្នាក់ទៀត អ្នកស្រី ទិត ធឿន ចោទថៅកែរោងចក្រនោះថា បានរត់ចោលនេះដោយមិនបានបើកប្រាក់ឈ្នួលខែចុងក្រោយ និងប្រាក់អត្ថប្រយោជន៍ផ្សេងៗជូនកម្មករទេ ហើយថា កម្មករធ្វើការរោងចក្រនោះ ចន្លោះពី ៧ ទៅ ១០ឆ្នាំ។
អ្នកស្រីបន្ថែមថា៖ «បើសិនបើខាងរោងចក្រគេអត់បើលុយឲ្យ នឹងជួបផលលំបាកច្រើនព្រោះ ចំណាយថ្លៃផ្ទះ ទឹកភ្លើង ខ្វះខាតថ្លៃហូបចុក កូនទៅរៀនយើងខ្វះខាតលុយឲ្យវាចាយព្រោះវារៀន ថ្នាក់ធំយើងត្រូវការលុយ ច្រើន»។
អនុប្រធានផ្នែកអន្តរាគមន៍ និងដោះស្រាយបាតុកម្មកកូដកម្មគ្រប់មុខសញ្ញានៃក្រសួងការងារ លោក អ៊ូ រតនា ដែលចុះដោះស្រាយផ្ទាល់ បានឲ្យដឹងថា ក្រសួងនៅមិនទាន់ស្រាវជ្រាវដឹងច្បាស់នៅឡើយទេថា តើថៅកែរោងចក្រនោះពិតជារត់ចោលមែនឬយ៉ាងណា។ ប៉ុន្តែ លោកថា ក្រសួងត្រូវការពេលវេលា ៤៨ម៉ោង ដើម្បីបញ្ជាក់អំពីបញ្ហានេះ។
លោកបន្ថែមថា៖ «ប្រសិនថៅកែរត់ចោលមែន កម្មករនិយោជិត គាត់អាចធ្វើពាក្យបណ្តឹងប្តឹងករណី ហ្នឹងទៅ តុលាការបាន ដើម្បីឲ្យតុលាការចាត់ការទៅតាមផ្លូវច្បាប់។ តែបើគាត់មិនចង់ប្តឹងទៅ តុលាការ គាត់ធ្វើក្រៅប្រព័ន្ធតុលាការ វាជាសិទ្ធិរបស់បងប្អូនកម្មករ»។
ប្រធានសហព័ន្ធសហជីពស្ថាបនាសិទ្ធិកម្មករ ដែលចុះដោះស្រាយវិវាទការងារនោះដែរ លោក ម៉ាន់ សា បានប្រាប់ថា វាគឺជាទង្វើខុសច្បាប់ ប្រសិនបើថៅកែរោងចក្រនោះ បិទរោងចក្រចោល និងមិនបានទូទាត់ប្រាក់ឈ្នួល និងប្រាក់អត្ថប្រយោជន៍ផ្សេងៗដល់កម្មករនោះ។
ស្ត្រីម្នាក់បម្រើការងារផ្នែករដ្ឋបាលនៅរោងចក្រ យូដា ហ្គាមេន ថ្លែងប្រាប់ក្នុងលក្ខខណ្ឌមិនបញ្ចេញឈ្មោះថា រោងចក្រនេះ ក៏ពុំបានផ្ដល់ប្រាក់ខែដល់គាត់ផងដែរ។
បើតាមមន្ត្រីរដ្ឋបាលរូបនេះ កម្មករសរុបជិត ២ពាន់នាក់ កំពុងធ្វើការនៅរោងចក្រទាំង ៤ ដែលកាន់កាប់ដោយថៅកែជនជាតិតែម្នាក់។
នៅពេលនេះមិនមានប្រតិកម្មអ្វីពីក្រសួងការងារពាក់ព័ន្ធនឹងការផ្ទុះការតវ៉ារបស់កម្មករ-កម្មការនី រាប់ពាន់នាក់នេះនៅឡេីយទេ៕
0 comments:
Post a Comment