ក្រសួងការបរទេសកម្ពុជា បានចេញរបាយការណ៍ការពារទង្វើដឹកនាំរបស់របបលោក នាយក រដ្ឋមន្ត្រីហ៊ុន សែន ដែលបានចាប់ខ្លួនលោក កឹម សុខា ប្រធានគណបក្សសង្គ្រោះជាតិ ពីបទ”ក្បត់ជាតិ” នោះថា ជា “ការអនុវត្តច្បាប់ត្រឹមត្រូវរបស់កម្ពុជា”។
នៅក្នុងរបាយការណ៍ចំនួន ១១ទំព័រ ចេញផ្សាយកាលពីថ្ងៃទី១៥ ខែកុម្ភៈ របស់ក្រសួងការបរទេសនេះ ជាការឆ្លើយតបទៅនឹងការរិះគន់យ៉ាងធ្ងន់ធ្ងររបស់សហគមន៍អន្តរជាតិ រួមមានអង្គការសហប្រជាជាតិ អង្គការសិទ្ធិមនុស្សអន្តរជាតិ សហរដ្ឋអាមេរិក សហភាពអឺរ៉ុប និងបណ្តាប្រទេសកាន់លទ្ធិប្រជាធិបតេយ្យជាច្រើនទៀត។ លោក កឹម សុខា ដែលកំពុងជាប់ឃុំក្នុងពន្ធនាគារត្រពាំងផ្លុង ត្រូវបានសមត្ថកិច្ចចាប់ខ្លួនកាលពីថ្ងៃទី៣ ខែកញ្ញា ពីបទចោទប្រកាន់ថា ក្បត់ជាតិ ឃុបឃិតជាមួយសហរដ្ឋអាមេរិក ដើម្បីផ្ដួលរំលំរដ្ឋាភិបាលកម្ពុជា តាមរយៈការធ្វើបដិវត្តន៍ពណ៌។
របាយការណ៍ក្រោមចំណងជើងថា "ស្ថិរភាពនិងការអភិវឌ្ឍចម្បងនៅកម្ពុជា" ក្រសួងការបរទេសបានអះអាងថា ប្រសិនបើគេនៅចងចាំច្បាស់នៅឡើយ អ្វីដែលកើតឡើងកាលពីទសវត្សឆ្នាំ៧០នោះ គឺប្រទេសកម្ពុជា រងគ្រោះដោយសារការឈ្លានពានពីបរទេស ជំរុញឲ្យមានរដ្ឋប្រហាររបស់លោកសេនាប្រមុខ លន់ នល់ កាលពីឆ្នាំ១៩៧០ និងបន្ទាប់មកគឺរបបខ្មែរក្រហម។
របាយការណ៍បញ្ជាក់ថា ការចាប់ខ្លួនលោក កឹម សុខា និងការរំលាយគណបក្សសង្គ្រោះជាតិនេះ គឺធ្វើឡើងតាមច្បាប់របស់កម្ពុជា ដែលសមត្ថកិច្ចមានភស្តុតាងគ្រប់គ្រាន់ក្នុងការចោទប្រកាន់លោក កឹម សុខា ពីបទក្បត់ជាតិ។
តុលាការកំពូល កាលពីខែវិច្ឆិកា បានសម្រេចរំលាយគណបក្សសង្គ្រោះជាតិ និងហាមមន្ត្រីជាន់ខ្ពស់គណបក្សសង្គ្រោះជាតិ ចំនួន ១១៨នាក់ មិនឲ្យចូលរួមក្នុងសកម្មភាពនយោបាយចំនួន ៥ឆ្នាំ។ ក៏ប៉ុន្តែទង្វើរបបដឹកនាំរបស់លោក នាយករដ្ឋមន្ត្រីហ៊ុន សែន នេះ ត្រូវបានមតិជាតិ អន្តរជាតិ និងសហគមន៍អន្តរជាតិ នៅតែថ្កោលទោសយ៉ាងខ្លាំង ថាកំពុងដឹកនាំប្រទេសទៅរករបបផ្ដាច់ការ ក្រោមការគ្រប់គ្រងរបស់គណបក្សកាន់អំណាច។
ក៏ប៉ុន្តែលោកនាយករដ្ឋមន្ត្រី ហ៊ុន សែនផ្ទាល់និងក្រុមមន្ត្រីរដ្ឋាភិបាលរបស់លោកនៅតែមិនខ្វល់
ខ្វាយពីការរិះគន់ទាំងនេះទេ ហេីយនៅតែបន្តអះអាងថាកម្ពុជាកំពុងតែដឹកនាំប្រទេសតាមបែប ប្រជាធិបតេយ្យ សេរីពហុបក្ស ដោយសំដៅទៅលេីបក្សតូចៗដទៃទៀតដែលកំពុងចូលរួមការ
បោះឆ្នោត ព្រឹទ្ធសភា៕
0 comments:
Post a Comment