លោក សុខ ពុទ្ធិវុធ ត្រូវបានតែងតាំងជាប្រធានក្រុមប្រឹក្សាភិបាលទូរគមនាគមន៍កម្ពុជា
សម្រាប់អាណត្តិទី៥ ឆ្នាំ២០១៨។
ការតែងតាំងនេះ គឺជាការបន្ថែមទៅលើមុខតំណែងមួយចំនួនធំរបស់លោក ដែលមានស្រាប់ ក្នុងតំណែងទាំងនោះ រួមមាន ជាអនុរដ្ឋលេខាធិការក្រសួងប្រៃសណីយ៍ និងទូរគមនាគមន៍ និងជាប្រធានសហព័ន្ធស្រូវអង្ករកម្ពុជា។ ពិធីតែងតាំងលោក សុខ ពុទ្ធិវុធ នេះ ត្រូវមន្រ្តីជួររដ្ឋាភិបាល លោក នាយករដ្ឋមន្ត្រីហ៊ុន សែន អះអាងថា គឺដើម្បីពង្រឹង និងពង្រីកការងារអាជីវកម្មក្នុងទីផ្សារ ប្រកួតប្រជែង និងបន្តអភិវឌ្ឍន៍វិស័យទូរគមនាគមន៍នៅកម្ពុជា។
ទូរគមនាគមន៍កម្ពុជា ឬហៅជាភាសាអង់គ្លេសថា Telecom Cambodia គឺជាក្រុមហ៊ុនរបស់រដ្ឋ ដែលត្រូវបានបង្កើតឡើង កាលពីឆ្នាំ២០០៥ ដើម្បីធ្វើប្រតិបត្តិការបណ្តាញ និងផ្តល់សេវាកម្មទូរគមនាគមន៍ដ៏ទូលំទូលាយ ទាំងនៅក្នុង និងនៅក្រៅប្រទេស និងចូលរួមចំណែកអភិវឌ្ឍន៍ហេដ្ឋារចនាសម្ព័ន្ធទូរគមនាគមន៍ និងបច្ចេកវិទ្យាព័ត៌មានវិទ្យានៅកម្ពុជា។ កាលពីពេលអតីតកាល ក្រុមហ៊ុនរដ្ឋមួយនេះ ធ្លាប់ជួបប្រទះនូវរឿងរ៉ាវអាស្រូវពុករលួយផ្ទៃក្នុង កឹបកេងប្រាក់ចំណូលរដ្ឋ ដោយសារការគ្រប់គ្រងមិនត្រឹមត្រូវ និងបានបណ្តាលឲ្យមានការផ្ទុះការតវ៉ាពីបុគ្គលិក ជាច្រើនលើកច្រើនសា។ ដោយសារមូលហេតុនេះ ក្រុមហ៊ុនរដ្ឋមួយនេះ នៅតែមិនទាន់អាចដាក់បញ្ចូលទៅក្នុងបញ្ជីដាក់លក់ទីផ្សារមូលបត្រកម្ពុជា CSX ដូចក្រុមហ៊ុនរដ្ឋដទៃទៀតបាននៅឡើយទេ រហូតមកទល់សព្វថ្ងៃនេះ។
លោក សុខ ពុទ្ធិវុធ កើតក្នុងឆ្នាំ១៩៨០ គឺជាកូនប្រុសម្នាក់ក្នុងចំណោមកូន ៥នាក់ របស់សម្តេច វិបុលបញ្ញា សុខ អាន។ លោកបានរៀបការជាមួយកូនស្រីពៅរបស់លោក នាយករដ្ឋមន្ត្រីហ៊ុន សែន គឺអ្នកស្រី ហ៊ុន ម៉ាលី៕
0 comments:
Post a Comment