បើទោះបីជាឆ្នាំចាស់ ឆ្នាំរកា ទើបនឹងបានឆ្លងផុតទៅហើយក៏ដោយ ក៏ក្រុមអ្នកកាន់អំណាចនៅ កម្ពុជា
មិនទាន់បេីកភ្លេីងខៀវ ឲ្យក្រុមមន្ត្រីបក្សប្រឆាំងវិលចូលស្រុកដេីម្បីបន្តអាជីព នយោបាយ របស់ខ្លួន ឡេីងវិញដែរ
ហេីយសារជូនពររបស់មេដឹកនាំនៃបក្សកាន់អំណាចលោក នាយករដ្ឋមន្ត្រី ហ៊ុន សែននិងលោក សម
រង្ស៊ី មេដឹកនាំបក្សប្រឆាំង គឺប្រៀបដូច <<ទឹក និងប្រេង>> ដែលមិន អាច ចូលគ្នាជាថ្លុងមួយបានឡេីយ ហេីយតាមរយះសាររបស់មេដឹកនាំកំពូលទាំងពីរ បង្ហាញឲ្យ ឃេីញថាវិបត្តិវឹកវរផ្នែកនយោបាយ
នៅមិនទាន់រសាត់ទៅណាឆ្ងាយពីសង្គមកម្ពុជាឡើយ។ បញ្ហានេះ ហាក់បន្តតាមលងបន្លាចក្រុមមេដឹកនាំនយោបាយខ្មែរ
គ្រប់ពេលវេលា ដែលមិនអាចធ្វើឲ្យពួកគេឈប់និយាយ និងគិតដល់ឡើយ បើទោះបីជាពេលវេលានោះ
ជាពេលវេលាដែលពលរដ្ឋខ្មែរកំពុងនាំគ្នាអបអរ ប្រារព្ធពិធី បុណ្យចូលឆ្នាំខ្មែរ
និងទទួលប្រសិទ្ធពរជ័យ សព្វសាធុការពរពីទេវតា ឆ្នាំថ្មី ក៏ដោយ។
ថ្លែងក្នុងឱកាសពិធីបើកព្រឹត្តិការណ៍អង្គរសង្ក្រាន្ត ឆ្នាំថ្មី
ឆ្នាំច ពីខេត្តសៀមរាប នៅគ្រាពលរដ្ឋទូទាំងប្រទេសជូនពរគ្នាទៅវិញទៅមកចង់បានសេចក្ដីសុខសប្បាយនោះ
លោកនាយករដ្ឋមន្ត្រី ហ៊ុន សែន មិនភ្លេចលេីកឡេីង អំពីបញ្ហាសង្គ្រាម ដោយលើកយកពីឧទាហរណ៍សង្គ្រាមស៊ីវិលរ៉ាំរ៉ៃនៅប្រទេសស៊ីរីមកនិយាយ។
លោកអះអាងថា គ្មានការសប្បាយរីករាយណាមួយ អាចកើតមានឡើងក្រោមភ្នក់ភ្លើងសង្គ្រាមនោះឡើយ។
លោកបន្តថា៖ «វាពិតណាស់ គ្មានសន្តិភាព
វាក៏គ្មានការអភិវឌ្ឍណាមួយ ហើយក៏គ្មានការជួបជុំសប្បាយរីករាយណាមួយដែរ។ គេមិនអាចឃើញនូវអ្វីដែលជាព្រឹត្តិការណ៍
នៃការជួបជុំសប្បាយ រីករាយក្រោមគ្រាប់បែក ក្រោមគ្រាប់ផ្លោង។ សូមក្រឡេកមើលទៅប្រទេសស៊ីរី
តើប្រទេសស៊ីរី មានលទ្ធភាពដើម្បីនឹងរៀបចំនូវការសប្បាយរីករាយនោះទេ
បើប្រទេសនេះ នៅតែហែកហួរដោយសង្គ្រាម?»។
បន្ថែមពីលើនេះ ទំនងជាភ័យខ្លាចពលរដ្ឋខ្មែរធ្វើពហិការមិនទៅចូលរួមបោះឆ្នោតខាងមុខនេះក៏មិនដឹង
ក្រោយពីលោកបានរម្លាយដៃគូប្រកួតប្រជែងនយោបាយ ដ៏ស្វិតស្វាញចោលពីសង្វៀននយោបាយ
ដើម្បីធានានិរន្តភាពនៃជ័យជម្នះគណបក្សរបស់លោក លោក ហ៊ុន សែន លើកឡើងនៅផ្នែកខាងដើមបង្អស់នៃសារជូនពររបស់លោកថា
ឆ្នាំច ដែលជាឆ្នាំថ្មីនេះ គឺជាឆ្នាំ ដែល រដ្ឋាភិបាលរបស់លោក នឹងត្រូវរៀបចំការបោះឆ្នោតជ្រើសតាំងតំណាងរាស្ត្រនីតិកាលទី៦
នៃរដ្ឋសភា។ លោកបានឆ្លៀតឱកាសអំពាវនាវដល់ប្រជាពលរដ្ឋខ្មែរនៅទូទាំងប្រទេស ឲ្យទៅចូលរួមបោះឆ្នោតជ្រើសតាំងតំណាងរាស្ត្រ
នៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ ឲ្យបានគ្រប់គ្នាកុំបីខាន ដើម្បីអនុវត្តសិទ្ធិពលរដ្ឋ
ក្នុងឋានៈជាអ្វីមួយ ដែលលោកហៅថា ជាម្ចាស់ជោគវាសនានៃប្រទេសរបស់ខ្លួន។ លោក
ហ៊ុន សែន ក៏បានលើកឡើងនៅក្នុងសារនោះដែរថា របបរបស់លោកបានទប់ស្កាត់ដោយជោគជ័យ
តាមរយៈវិធានការច្បាប់ដ៏ម៉ឺងម៉ាត់ ធ្វើឲ្យបដិវត្តពណ៌ត្រូវបានបរាជ័យយ៉ាងធ្ងន់ធ្ងរព្រមទាំងបញ្ចៀសបាននូវគ្រោះមហន្តរាយជាថ្មីនេះ។
ចំណែកប្រធានចលនាសង្គ្រោះជាតិ លោក សម រង្ស៊ី នៅឯនាយសមុទ្រវិញ លោកបានសរសេរសារជូនពរពលរដ្ឋខ្មែរនៅលើទំព័រគណនេយ្យហ្វេសប៊ុករបស់លោកថា
លោក និងក្រុមអ្នកតស៊ូទាំងអស់ ក្នុងជួរគណបក្សសង្គ្រោះជាតិ និងចលនាសង្គ្រោះជាតិ
នឹងខិតខំធ្វើយ៉ាងណាឲ្យប្រជារាស្ត្រខ្មែរ ចាប់ផ្ដើមបានឃើញនូវពន្លឺប្រជាធិបតេយ្យ
សេរីភាព និងយុត្តិធម៌ យ៉ាងពិតប្រាកដ។ លោកសូមឲ្យដំណើរការបោះឆ្នោតសព្វថ្ងៃ
ដែលលោកថា ជាការបោះឆ្នោតក្លែងក្លាយ ឲ្យក្លាយទៅជាដំណើរការបោះឆ្នោតត្រឹមត្រូវវិញ
ក្នុងពេលមួយសមស្រប ដើម្បីឲ្យប្រជារាស្ត្រខ្មែរ
មានឱកាសបង្ហាញឆន្ទៈរបស់ពួកគេ បានយ៉ាងពិតប្រាកដ ដែលអ្នកនយោបាយទាំងអស់
ត្រូវតែគោរពដាច់ខាត។
នៅថ្ងៃ ទី ១៧ មេសានេះ ឆ្នាំចាស់បានកន្លងផុតទៅ មួយថ្ងៃពេញហេីយ តែលោកនាយករដ្ឋមន្ត្រី ហ៊ុន សែនមិនទាន់បង្ហាញជំហរណាមួយដែលអាចឲ្យលោកសម រង្ស៊ីនិងគណបក្សប្រឆាំងវិល
ចូលឆាកនយោបាយវិញនោះទេ៕
0 comments:
Post a Comment