.jpg)
អ្នកនាំពាក្យអគ្គស្នងការនគរបាលជាតិ លោក គៀត ច័ន្ទថារិទ្ធ ដែលបានថ្លែងក្នុងវគ្គបណ្តុះ បណ្តាលថ្នែកសន្តិសុខមួយកាលពីម្សិលមិញថា រដ្ឋាភិបាលនឹងដាក់ពង្រាយកម្លាំងនគរបាលជាតិ កម្លាំងកងយោធពលខេមរភូមិន្ទ និងកម្លាំងកងរាជអាវុធហត្ថ សរុបរហូតដល់ ៨ម៉ឺននាក់ រួមទាំងមានកម្លាំងប្រជាការពារប្រមាណ ២ម៉ឺននាក់បន្ថែមទៀត ដើម្បីការពារសន្ដិសុខ សណ្ដាប់ធ្នាប់ សាធារណៈសម្រាប់ការបោះឆ្នោតជ្រើសរើសតំណាងរាស្ត្រនាថ្ងៃទី២៩ ខែកក្កដាខាងមុខ។
គម្រោងដាក់ពង្រាយកម្លាំងសន្តិសុខដ៏ច្រើនបែបនេះ ត្រូវបានក្រុមអ្នកតាមដានការបោះឆ្នោតមើលឃើញថា ខុសទៅនឹងច្បាប់បោះឆ្នោត ហើយជំរុញឲ្យការចំណាយថវិកាសម្រាប់ការបោះឆ្នោតជាតិខាងមុខនេះ កាន់តែរីកធំឡើង។
នាយកប្រតិបត្តិអង្គការណិចហ្វិច លោក សំ គន្ធាមី បានពន្យល់ថា ច្បាប់បោះឆ្នោត បានកំណត់
ឲ្យប្រើប្រាស់កម្លាំងការពារត្រឹមតែ ៣នាក់ប៉ុណ្ណោះ សម្រាប់ការិយាល័យបោះឆ្នោតមួយ ដោយក្នុងនោះ កម្លាំងប្រដាប់អាវុធមួយរូប បោះទីតាំងការពារនៅខាងក្រៅបរិវេណការិយាល័យ និង ២នាក់ទៀត ត្រូវការពារខាងក្នុងបរិវេណការិយាល័យបោះឆ្នោតដោយពុំតម្រូវឲ្យកាន់អាវុធនោះឡើយ។
ករណីនេះ លោក គន្ធាមី បញ្ជាក់ថា ការប្រើកម្លាំងការពារសុវត្ថិភាពអ្នកបោះឆ្នោតរហូតដល់ ១០ម៉ឺននាក់ នៅទូទាំងប្រទេស អាចធ្វើឲ្យប៉ះពាល់ដល់អារម្មណ៍អ្នកបោះឆ្នោត និងខាតថវិកាជាតិ ទៅវិញ។
លោកបញ្ជាក់ថា៖ «ការដែលដាក់កម្លាំងសន្តិសុខច្រើនលើសលុបនេះ ក៏មិនមែនជាចំណុចល្អទេ… ជាចំណុចដែលប៉ះពាល់អារម្មណ៍អ្នកបោះឆ្នោត ហើយការងារហ្នឹងដែលគាត់ចុះទៅធ្វើ ការមួយថ្ងៃ ថ្ងៃបោះឆ្នោត ថ្ងៃរាប់សន្លឹកឆ្នោត ត្រូវចំណាយថវិកា លុយបេសកម្ម លុយមានរបប របស់គាត់»។
ចំនួនកងកម្លាំង១០ម៉ឺននាក់ ដែលរដ្ឋាភិបាលគ្រោងដាក់ការពារប្រជាពលរដ្ឋអំឡុងពេលបោះឆ្នោត ថ្នាក់ជាតិនេះ មានការកើនឡើងពាក់កណ្តាល បើធៀបនឹងកម្លាំងដាក់ការពារប្រជាពលរដ្ឋ បោះ ឆ្នោតក្រុមប្រឹក្សាឃុំ-សង្កាត់កាលពីខែមិថុនា ឆ្នាំ២០១៧។
ការបោះឆ្នោតថ្នាក់ជាតិកាលពីឆ្នាំ២០១៣ ក្រុមបាតុករបានដុតរថយន្តកងរាជអាវុធហត្ថចំនួន ២គ្រឿងកម្ទេចទាំងស្រុងនៅមុខវត្តស្ទឹងមានជ័យ ក្រោយពីពួកគេចោទថាមានភាពមិនប្រក្រតីអំឡុង ពេលបោះឆ្នោតនោះ។
ម្យ៉ាងទៀតការប្រកាសពីការដាក់ពង្រាយកងកម្លាំងសន្តិសុខដ៏ច្រេីន ក្នុងអំឡុងពេលបោះឆ្នោត ជាតិខាងមុខនេះ ខណះវាសនារបស់គណបក្សសង្គ្រោះជាតិ មិនទាន់ត្រូវបានមេីលឃេីញ ថាអាចចូលរួមប្រកួតក្នុងការបោះឆ្នោតនេះនៅឡេីយទេ៕
0 comments:
Post a Comment