អ្នកបេីកបររថយន្តហាយឡែនឌេី បុកព្រះទីនាំង សម្តេចក្រុមព្រះ ឈ្មោះ ម៉ិល សារ៉េត
ត្រូវបានតុលាការខេត្តព្រះសីហនុ ចេញដីកាឃុំខ្លួន។
តាមដីកាឃុំខ្លួន អ្នកបើករថយន្តរូបនេះមានឈ្មោះ ម៉ិល សារ៉េត អាយុ៣៤ឆ្នាំ រស់នៅភូមិ១ សង្កាត់លេខ១ ក្រុង-ខេត្តព្រះសីហនុ ត្រូវបានចោទប្រកាន់ពីបទ «បើកបរធ្វេសប្រហែស បណ្តាលឲ្យរបួស និងស្លាប់អ្នកដទៃ»។
ស្នងការនគរបាលខេត្តព្រះសីហនុ លោកឧត្តមសេនីយ៍ទោ ជួន ណារិន្ទ បានបញ្ជាក់បន្ថែមថា អ្នកបើករថយន្តរូបនេះ ត្រូវបានលោកឲ្យកម្លាំងយកចេញពីមន្ទីរពេទ្យ ទៅបង្ហាញខ្លួននៅតុលាការ ហើយនៅល្ងាចថ្ងៃនេះ ត្រូវតុលាការចេញដីកាឃុំខ្លួនតែម្តង។
សូមបញ្ជាក់ថា អ្នកម្នាង អ៊ុក ផល្លា បានទទួលអនិច្ចកម្មដោយសារតែគ្រោះថ្នាក់ចរាចរណ៍នៅលើ ផ្លូវជាតិលេខ៤ ចំណុចគីឡូម៉ែត្រលេខ២០០-២០១ ក្នុងភូមិអូរតាសេក ឃុំអូរចំណារ ស្រុកព្រៃណប់ ខេត្ដព្រះសីហនុ កាលពីថ្ងៃអាទិត្យ ទី១៧ ខែមិថុនា ឆ្នាំ២០១៨ ។ គ្រោះថ្នាក់នេះបានកើតឡើងបន្ទាប់ពីមានរថយន្តឈ្នួលម៉ាកហាយឡែនឌើមួយគ្រឿង បើកបុក ព្រះទីនាំងរបស់សម្តេចក្រុមព្រះ នរោត្តម រណឫទ្ធិ ពេលព្រះអង្គកំពុងយាងចុះទៅសំណេះ សំណាលជាមួយ ប្រជាពលរដ្ឋនៅក្នុងខេត្តព្រះសីហនុ។
របាយការណ៍របស់សមត្ថកិច្ចបានឲ្យដឹងថា គ្រោះថ្នាក់នេះ បានកើតឡើងដោយសាររថយន្តឈ្នួល ហាយឡែនឌើ បានព្យាយាមបើកជែងរថយន្តធំមួយគ្រឿងបើកក្នុងទិសដៅស្របគ្នាក្នុងទិសដៅពី ខេត្តព្រះសីហនុ មកភ្នំពេញ ក៏ជ្រុលចូលទៅបុកព្រះទីនាំងសម្តេចក្រុមព្រះ ដែលមានទិសដៅផ្ទុយ គ្នានោះតែម្តង។
គ្រោះថ្នាក់នេះ បានធ្វើឲ្យអ្នកម្នាង អ៊ុក ផល្លា ស្លាប់បាត់បង់ជីវិតពេលបញ្ជូនទៅសង្គ្រោះនៅ មន្ទីរពេទ្យ រីឯសម្តេចក្រុមព្រះបានរងរបួសធ្ងន់ធ្ងរ។ ដោយឡែក ភាគីរថយន្តហាយឡែនឌើវិញ ដែលមានអ្នកជិះរហូតដល់ទៅ៦នាក់ បានរងរបួសធ្ងន់ស្រាល តែបុរសជនជាតិចិនម្នាក់ ដែល ជិះក្នុងរថយន្តហាយឡែនឌើដែរ គឺរងរបួសធ្ងន់ធ្ងរខ្លាំង ត្រូវបានបញ្ជូនមកសង្គ្រោះ នៅមន្ទីរពេទ្យ ក្នុងរាជធានីភ្នំពេញ។ ចំណែក អ្នកបើកបររថយន្តសម្តេចក្រុមព្រះ បានរងរបួសស្រាល។
ទាក់ទងករណីគ្រោះថ្នាក់ចរាចរណ៏នេះដែរ គណបក្សហ៊្វុនស៊ិនប៉ិចស្នេីឲ្យអជ្ញាធរបេីកការស៊េីប អង្កេតករណីគ្រោះថ្នាក់ចរាចរណ៏ ដ៏រន្ធត់នេះផងដែរ។
អ្នកនាំពាក្យគណបក្សហ៊្វុនស៊ិនប៉ិច លោក ញេប ប៊ុនជិន ទទូចឲ្យសមត្ថកិច្ចបើកការស៊ើបអង្កេតលើករណីគ្រោះថ្នាក់ចរាចរណ៏លេីសម្តេចក្រុមព្រះនិងអ្នកម្នាងអ៊ុក ផល្លា ឲ្យបានស៊ីជម្រៅ ដើម្បីរកយុត្តិធម៌ថ្វាយដល់សម្ដេចក្រុមព្រះ និងព្រះនាងព្រមទាំងជនរងគ្រោះដទៃៗទៀត។
លោក ញេប ប៊ុនជិន បានអះអាងនៅរសៀលថ្ងៃទី១៨ មិថុនាថា ព្រះអង្គម្ចាស់ នរោត្ដម រណឫទ្ធិ ត្រូវបានបញ្ជូនទៅព្យាបាលបន្តនៅប្រទេសថៃហើយ កាលពីព្រឹកថ្ងៃទី១៨ មិថុនា ដោយសារសមាជិកគណបក្សចង់ឲ្យរបួសរបស់ព្រះអង្គបានធូរស្រាលចាប់រហ័ស។
លោក ញេប ប៊ុនជិន បន្តថា ចំពោះសពអ្នកម្នាង អ៊ុក ផល្លា វិញ គឺបានបង្កើតគណៈកម្មការបុណ្យធ្វើបុណ្យសព ដោយតម្កល់ធ្វើបុណ្យនៅវត្តបទុមវត្តី ចាប់ពីថ្ងៃទី១៨ រហូតដល់២០មិថុនា ហើយនឹងបូជាសពនៅព្រឹកថ្ងៃទី២០ មិថុនា តែម្ដង។ លោក ញេប ប៊ុនជិន អះអាងទៀតថា រហូតមកដល់ពេលនេះមិនទាន់មានស្ថាប័នណាចូលលុយដើម្បីធ្វើបុណ្យនៅឡើយទេ។
អ្នកម្នាង អ៊ុក ផល្លា ទទួលអនិច្ចកម្ម នៅម៉ោង១២ថ្ងៃត្រង់ ក្រោយពីគ្រោះថ្នាក់ចរាចរណ៏នៅស្រុកព្រៃនប់ ខេត្តព្រះសីហនុ កាលពីព្រឹកថ្ងៃទី១៧ មិថុនា គឺបន្ទាប់ពីបញ្ជូនទៅសង្គ្រោះបន្ទាន់នៅមន្ទីរពេទ្យខេត្តព្រះសីហនុ។ ចំណែកសម្តេចក្រុមព្រះរងរបួសធ្ងន់ បាក់ជេីង និងមានហូរឈាមតាម ត្រចៀក និងមាត់៕
0 comments:
Post a Comment