អ្នកស្រី មិថុនា ភូថង អភិបាលខេត្តកោះកុង បរាជ័យក្នុងការដោះស្រាយវិវាទ
ដីធ្លីប្រជាពលរដ្ឋរបស់ខ្លួន។
តំណាងពលរដ្ឋដែលមកតវ៉ាអ្នកស្រី សាំង
ពុយ បានឲ្យអ្នកសារព័ត៌មានដឹងថា
ពួកគេទាំង២១០គ្រួសារដែលបានរស់នៅ
និងធ្វើចំការលើដីជាង៦ពាន់ហិកតា
ក្នុងឃុំភីមាស និងឃុំកោះស្តេច ក្នុងស្រុកគីរីសាគរ
ខេត្តកោះកុង តាំងពីឆ្នាំ១៩៨០មកដោយមានអាជ្ញាធរមូលដ្ឋានបញ្ជាក់ត្រឹមត្រូវ តែនៅឆ្នាំ២០០៨
ត្រូវបានក្រុមហ៊ុន Union Development របស់ប្រទេសចិនបានចូលមកឈូសឆាយដី និងកម្ទេចផលដំណាំរបស់ពួកគេអស់
ដោយពុំដឹងមូលហេតុច្បាស់លាស់។
អ្នកស្រីបន្តថា បន្ទាប់ពីមានការឈូសឆាយពួកគេក៏បានចេញតវ៉ាជាបន្តបន្ទាប់ តាំងពីថ្នាក់ស្រុក
ខេត្ត រហូតមកដល់ថ្នាក់ជាតិរួមមានទាំងសភាជាតិផងដែរនៅតែគ្មានដំណោះស្រាយ ទើបតែនៅខែមុនមានការណែនាំរបស់រដ្ឋមន្ត្រីក្រសួងដែនដីលោក ជា
សុផារ៉ា ឲ្យត្រលប់ទៅខេត្តវិញ
និងមានក្រុមការងារបស់ក្រសួងចុះទៅដោះស្រាយជូន តែនៅតែគ្មានដំណោះស្រាយដដែល។
អ្នកស្រីបន្តថា <<យើងជូនព័ត៌មានទៅខាងអាជ្ញាធរខេត្តក៏មិនអាចរកយុត្តិធម៌មិនទាន់បាន ហើយ១០ឆ្នាំហើយ។
ចំការរបស់យើងប៉ុនហ្នឹង
១ឆ្នាំៗយើងអាចទទួលផល១ឆ្នាំៗ បើគ្រាន់តែបេះដូងលក់ ក៏យើងចិញ្ចឹងជីវភាពរបស់គ្រួសារយើងបានដែរ។
ចន្ទី ក៏យើងអាចចិញ្ចឹមបានដែរតែឥឡូវយើងមិនមានសិទ្ធចូលទៅក្នុងដីយើងផង ដល់សុំអនុញ្ញាតពីគេហើយយើងរស់នៅមុន ហេតុអីបានគាត់បិទសិទ្ធប្រជាពលរដ្ឋមិនឲ្យចូលទៅរស់ដីខ្លួនឯង កាលពីមុនយើងរស់នៅសោះមានផ្ទះមានសំបែងអីទាំងអស់>>។
ពលរដ្ឋម្នាក់ទៀតអ្នកស្រី ឡាន់
យី មានប្រសាសន៍ថាចាប់តាំងពីក្រុមហ៊ុន Union
development របស់ចិនចូលមកប្រជាពលរដ្ឋជួបការលំបាកជាខ្លាំងដោយសារខ្វះចំណូលចិញ្ចឹមគ្រួសារ ត្រូវធ្វើចំណាកស្រុក
និងទៅរស់នៅក្នុងខេត្តផ្សេងជាដើម។
រហូតមកដល់រសៀលម៉ោង៥នេះ
ប្រជាពលរដ្ឋទាំងនោះនៅតែបន្តការតវ៉ានៅក្បែរក្រសួងដែនដី នៅឡើយ
ដោយរង់ចាំដំណោះស្រាយពីអាជ្ញាធរ។
ទោះជាយ៉ាងណាបើតាមប្រជាពលរដ្ឋដែលឡើងមកតវ៉ាឲ្យដឹងថានៅថ្ងៃនេះ អគ្គនាយកនៃ អគ្គនាយកដ្ឋានរដ្ឋបាលលោក
សេង ឡូត បានមកទទួលជួប
និងបានជម្រាបឲ្យប្រជាពលរដ្ឋឡើងទៅតវ៉ានៅក្រសួងបរិស្ថានវិញដោយសារករណីរបស់ពលរដ្ឋនេះគឺមិនមែនជាសមត្ថកិច្ចរបស់ ក្រសួងដែនដីនោះទេ។
កាលពីថ្ងៃទី ១៣ខែមិថុនា
រដ្ឋមន្ត្រីក្រសួងមហាផ្ទៃ លោក ស ខេង
បានបញ្ជារទៅកាន់រដ្ឋបាលខេត្តនានា ឲ្យដោះស្រាយវិវាទដីធ្លីក្នុងខេត្តរបស់ខ្លួនឲ្យមានប្រសិទ្ធភាព និងរក្សាភាពអត់ធ្មត់ក្នុង ការបំពេញការងារពាក់ព័ន្ធនឹងបញ្ហាទំនាស់ដីធ្លី ឬការតវ៉ាទាមទារនានារបស់ប្រជាពលរដ្ឋ
ដោយថា ដើម្បីបញ្ចៀសនូវអំពើហិង្សាផ្សេងៗ
ខណៈ ប៉ុន្មានខែចុងក្រោយនេះក្រុមពលរដ្ឋមានជម្លោះដីធ្លីបន្តឡើងមកតវ៉ានៅរាជធានីភ្នំពេញជាបន្តបន្ទាប់
តែមិនមានដំណោះស្រាយឡេីយ៕
0 comments:
Post a Comment