បុរសខ្លាំងនៃកម្ពុជា ហ៊ុន សែន
ថ្លែងនៅចំពោះមុខអ្នកសារព័ត៌មានប្រមាណជិត ៥.០០០នាក់ នៅក្នុងពិធីជួបជុំអាហារពេលល្ងាចនាថ្ងៃ ទី ១១ មករាថា កម្ពុជាត្រូវការចាំបាច់នូវច្បាប់ចំនួន
២បន្ថែមទៀត គឺច្បាប់ស្ដីពីសិទ្ធិទទួលបានព័ត៌មាន និងច្បាប់ស្ដីពីការគ្រប់គ្រងឧក្រិដ្ឋកម្មតាមអ៊ិនធឺណិត
ដែលច្បាប់ទាំង២នេះលោកថានៅជាសេចក្ដីព្រាងច្បាប់នៅឡើយ។ បើតាមបុរសខ្លាំង
ហ៊ុន សែន ច្បាប់ដែលសំខាន់នោះការគ្រប់គ្រងឧក្រិដ្ឋកម្មតាមអ៊ិនធឺណិត គឺត្រូវចេញឲ្យបានឆាប់
ដើម្បីធ្វើឲ្យទាន់ស្ថានភាពក្នុងពេលបច្ចុប្បន្ន ដែលពិភពលោក កំពុងយកចិត្តទុកដាក់លើបទល្មើសតាមអ៊ិនធឺណិត
និងព័ត៌មានក្លែងក្លាយ (Fake News)។
ការលើកឡើងរបស់លោក ហ៊ុន សែន
ពីភាពស៊ីសង្វាក់គ្នារវាង ច្បាប់ទាំង២នេះ បង្ហាញអោយឃើញពីភាពចម្រូងចម្រាស់គ្នានាពេលកន្លងទៅ
រវាងក្រុមអង្គការសង្គមស៊ីវិល និងអ្នកសារព័ត៌មានជាមួយរដ្ឋាភិបាល។ ដ្បិតសង្គមស៊ីវិល
និងអ្នកសារព័ត៌មានតែងតែទាមទារអោយរដ្ឋាភិបាលចេញច្បាប់ស្ដីពីសិទ្ធិទទួលបានព័ត៌មាន
ប៉ុន្តែសេចក្ដីព្រាងច្បាប់នេះអូសបន្លាយពេលជាច្រើនឆ្នាំហើយនៅតែចេញមិនរួច។
ចំណែករដ្ឋាភិបាលវិញទាមទារថាទាល់តែមានច្បាប់គ្រប់គ្រង ឧក្រិដ្ឋកម្មតាមអ៊ិនធឺណិត
ដែលសង្គមស៊ីវិលរិះគន់ថាអាចជាលេសរបស់រដ្ឋាភិបាលក្នុងការប្រើប្រាស់ច្បាប់នេះ
ដើម្បីរឹតត្បិតសិទ្ធិសេរីភាពពលរដ្ឋ និងការបញ្ចេញមតិតាមអ៊ិនធឺណេតទៅវិញទេ។
ជាមួយគ្នានេះបុរសខ្លាំង ហ៊ុន សែន ប្រកាសជាថ្មីនៅចំពោះមុខអ្នកកាសែតថា
លោក នឹងកាន់អំណាចបន្តទៀតរហូតដល់ឆ្នាំ ២០២៨។
គិតត្រឹមថ្ងៃទី១៤
ខែមករាខាងមុខនេះ គឺនៅសល់តែ៣ថ្ងៃ ទៀតប៉ុណ្ណោះ បុរសខ្លាំង ហ៊ុន សែន បានកាន់អំណាចជានាយករដ្ឋមន្ត្រី
បាន៣៤ឆ្នាំហើយ ហើយក្នុងរយៈពេលនៃការគ្រប់គ្រងនេះមានការរិះគន់ជុំទិសពីការរំលោភសិទ្ធិមនុស្ស
ហើយថ្មីៗ នេះ គឺការរម្លាយចោលនូវដំណើរការប្រជាធិបតេយ្យ ដែលដំណើរការនេះ
ត្រូវបានធានាដោយរដ្ឋធម្មនុញ្ញកម្ពុជា។ ជាមួយគ្នានេះដែរបុរសខ្លាំង ហ៊ុន
សែន បានចេញមុខស្នើអោយអ្នកលេងហ្វេសប៊ុកកុំប្រើពាក្យអសុរោះជេរប្រទេចគ្នា។
បើទោះជាយ៉ាងណាកន្លងទៅបុរសខ្លាំងរូបនេះ
ដែលជាអតីតកម្មាភិបាលខ្មែរក្រហមត្រូវបានគេរិះគន់ថា ជាអ្នកនយោបាយ ដែលប្រើពាក្យសម្ដីអសុរោះ
ប្រមាថ និងហិង្សាស្ទើរមិនលស់ពេល ពេលដែលលោកថ្លែងសន្ទរកថាជាសាធារណៈម្ដងៗ
មិនថានៅចំពោះព្រះភ័ក្ត្រព្រះសង្ឃ ដូនជី ឬក៏សិស្សសាលានោះទេ
ជាពិសេសពេលលោកខឹងសម្បានឹងលោកសម រង្ស៊ីប្រធានស្តីទីគណបក្ស សង្គ្រោះជាតិ៕
0 comments:
Post a Comment