.jpg)
អ្នកនាំពាក្យក្រសួងការបរទេស លោក កេត សោផាន់ ថ្លែងប្រាប់ក្រុមអ្នកសារព័ត៌មាននៅក្រោយជំនួបនេះថា រដ្ឋាភិបាលបានប្រឹងប្រែងពង្រឹងលំហប្រជាធិបតេយ្យ និងសិទ្ធិសេរីភាពក្នុងសង្គម ដោយអនុវត្តតាមខ្លឹមសារនៃសេចក្ដីថ្លែងការណ៍កាលពីចុងឆ្នាំ២០១៨ កន្លងទៅ។ លោកអះអាងទៀតថា បញ្ហាប្រជាធិបតេយ្យ សិទ្ធិមនុស្ស សិទ្ធិការងារ និងបញ្ហាដីធ្លីជាដើម មានការវិវឌ្ឍវិជ្ជមានទៅមុខយ៉ាងច្រើន ហើយរដ្ឋមន្ត្រីការបរទេសកម្ពុជាក៏បានស្នើឱ្យប្រតិភូសហភាពអឺរ៉ុបកត់សម្គាល់អំពីសមិទ្ធផលទាំងនេះផងដែរ។ លោកថា៖ «ឯកឧត្ដមឧបនាយករដ្ឋមន្ត្រីក៏បានឆ្លៀតរឭកដែរថា កម្ពុជាបានធ្វើការងារទៅតាមអ្វីដែលជាសេចក្ដីថ្លែងការណ៍របស់រាជរដ្ឋាភិបាល កាលពីថ្ងៃទី៣ ខែ១២ ឆ្នាំ២០១៨ ហើយក៏បានជម្រាបជូនភាគីភ្ញៀវអំពីវឌ្ឍនភាពជាច្រើន អ្វីដែលរដ្ឋាភិបាលប្រាជ្ញាថា នឹងធ្វើ ដូចជា ក្នុងការពង្រឹងលំហប្រជាធិបតេយ្យ សិទ្ធិសេរីភាព ការងារ បញ្ហាដោះស្រាយវិបត្តិដីធ្លីជាដើម»។
អ្នកនាំពាក្យរូបនេះបញ្ជាក់ទៀតថា រដ្ឋាភិបាលកម្ពុជានឹងប្រឹងប្រែងគ្រប់បែបយ៉ាងដើម្បីរក្សាបាននូវប្រព័ន្ធអនុគ្រោះពន្ធ EBA ព្រោះប្រព័ន្ធអនុគ្រោះពន្ធនេះបានផ្តល់ប្រយោជន៍ដល់ពលរដ្ឋរាប់លាននាក់នៅទូទាំងប្រទេស។ ក៏ប៉ុន្តែជាថ្មីម្តងទៀត លោកថា ភាគីកម្ពុជានឹងមិនអនុវត្តតាមសំណើទាំងឡាយណា ដែលប៉ះពាល់ដល់ឯករាជ្យ និងអធិបតេយ្យជាតិនោះឡើយ។
ប្រតិភូសហភាពអឺរ៉ុបកំពុងបំពេញបេសកកម្មស្វែងរកការពិតនៅកម្ពុជា និងជួបជាមួយគ្រប់ភាគីពាក់ព័ន្ធ រួមមានមន្ត្រីរដ្ឋាភិបាល អង្គការសង្គមស៊ីវិល សហជីព និងសហគមន៍រងគ្រោះដីធ្លី នៅអំឡុងសប្ដាហ៍នេះ។ បេសកកម្មលើកនេះ ត្រូវបានក្រុមសង្គមស៊ីវិលចាត់ទុកថា ជាព្រឹត្តិការណ៍ដ៏សំខាន់ ពីព្រោះរបាយការណ៍នេះនឹងត្រូវយកជាមូលដ្ឋានរឹងមាំសម្រាប់គណៈកម្មការអឺរ៉ុប ក្នុងការសម្រេចចិត្តព្យួរ ឬមិនព្យួរប្រព័ន្ធអនុគ្រោះពន្ធ EBA ពីកម្ពុជា នៅក្នុងរយៈពេលប៉ុន្មានខែខាងមុខទៀតនេះ៕
0 comments:
Post a Comment