នៅពេលនេះវាដល់ពេលរដ្ឋាភិបាល របស់លោកនាយករដ្ឋមន្ត្រី ហ៊ុន សែនធើ្វសុីមន្ត្រីយោធាណា មានងារជាឧកញ៉ាហើយបន្ទាប់ពីមានការ ចាប់ខ្លួន ឧកញ៉ា គង់ ក្រឹង ជាមន្ត្រីយោធាខេត្តក្រចេះនិង ជាឈ្មួញឈើ និងឧកញ៉ាសឹង សំអុលជាមន្ត្រីកងរាជអាវុធហត្ថ ខេត្តត្បូងឃ្មុំ និងជាឈ្មួញឈើដាក់ គុកថ្មីៗនេះ។
មន្ត្រីជាន់ខ្ពស់កងយោធពលខេមរភូមិន្ទអះអាងថា
ថ្នាក់ដឹកនាំក្រសួងការពារជាតិនឹងជួបប្រជុំជាមួយក្រុមឧត្តមសេនីយ៍ដែលមានងារជាឧកញ៉ានៅពេលខាងមុខនេះ
បន្ទាប់ពីទទួលបានតួលេខពិតប្រាកដ។
អ្នកនាំពាក្យអគ្គបញ្ជាការកងទ័ពលោក
ថោង សូលីម៉ូ ថ្លែងនៅថ្ងៃទី៤ កញ្ញាថា
ឧត្ដមសេនីយ៍ក្នុងជួរកងយោធពលខេមរភូមិន្ទ ដែលមានងារជាឧកញ៉ាមានចំនួន
៦១នាក់។ លោកបញ្ជាក់ថា ក្នុងនោះឧត្ដមសេនីយ៍ ៤៥នាក់
បានសម្រេចបោះបង់ចោលងារជាឧកញ៉ា ខណៈ ១៦រូបផ្សេងទៀត
សម្រេចលាលែងពីការងាររដ្ឋ។ លោកថា តួលេខជាក់ស្ដែងអាចមានច្រើនជាងនេះ ពីព្រោះចំនួននេះមិនបានរាប់បញ្ចូលឧត្ដមសេនីយ៍នៅក្នុងក្រសួងការពារជាតិដែលមានងារជាឧកញ៉ានោះឡើយ។
លោកបញ្ជាក់ថា នៅពេលប្រមូលស្ថិតិបានគ្រប់គ្រាន់អស់ហើយ ថ្នាក់ដឹកនាំក្រសួងការពារជាតិ
និងថ្នាក់ដឹកនាំកងយោធពលខេមរភូមិន្ទ នឹងជួបជាមួយក្រុមឧត្ដមសេនីយ៍ឧកញ៉ាទាំងនោះ។
លោកបន្តថា«ខ្ញុំនិយាយតែនៅក្នុងក្របខ័ណ្ឌរបស់អគ្គបញ្ជាការទេ ដោយឡែកបូកទាំងក្រសួងទាំងអីទៀត វាមានលើសពីហ្នឹងទៀត។ តួលេខហ្នឹងមានការប្រែប្រួល មិនទាន់ជាក់លាក់ទេ។ នៅពេលណាដែលមានរបាយការណ៍ជាក់លាក់ សម្ដេចរដ្ឋមន្ត្រីលោកនឹងធ្វើការជួបជុំម្ដងជាមួយឧកញ៉ាទាំងហ្នឹង ដើម្បីសំណេះសំណាលសាកសួរអី ដើម្បីឱ្យមានការសម្រេចចិត្តត្រឹមត្រូវ»។
រដ្ឋមន្ត្រីក្រសួងការពារជាតិ លោក
ទៀ បាញ់ បានថ្លែងប្រាប់ក្រុមអ្នកកាសែតកាលពីថ្ងៃទី៣ កញ្ញាថា លោកបានបញ្ជាឱ្យគ្រប់អង្គភាពទាំងអស់ដែលចំណុះឱ្យក្រសួងការពារជាតិ
និងអគ្គបញ្ជា ការដ្ឋាន ឱ្យប្រមូលទិន្នន័យចំនួនឧកញ៉ាក្នុងជួរកងទ័ព។ លោកបញ្ជាក់ថា
បន្ទាប់ពីមានព័ត៌មានគ្រប់គ្រាន់ហើយ លោកនឹងជួបជាមួយអ្នកទាំងនោះ ដើម្បីឱ្យពួកគេសម្រេចចិត្តរវាងងារជាឧកញ៉ា
និងជាមន្ត្រីយោធា។ លោកបន្ថែមថា ការងារនេះ ត្រូវធ្វើឡើងដោយប្រុងប្រយ័ត្នចៀសវាងការអាក់អន់ស្រពន់ចិត្តពីមន្ត្រីយោធាដែលមានងារជាឧកញ៉ាទាំងនោះ។
ចំណាត់ការរបស់ក្រសួងការពារជាតិនេះ
ធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន បានប្រកាសកាលពីថ្ងៃទី២៣
សីហាថា កងកម្លាំងប្រដាប់អាវុធ រួមមាន ទាហាន ប៉ូលិស និងប៉េអឹម
ត្រូវហាមឃាត់មិនឱ្យមានងារជាឧកញ៉ាទៀតឡើយ ពីព្រោះកន្លងមក មានមនុស្សមួយចំនួនបានយកតួនាទីទាំងនេះទៅប្រកបការងារផ្សេងៗ
ខុសច្បាប់។
ងារជាឧកញ៉ា ត្រូវបានព្រះមហាក្សត្រប្រទានដល់ជនណាដែលមានអាជីវកម្មសុចរិត
និងមានទ្រព្យសម្បត្តិស្តុកស្តម្ភ ហើយបានបរិច្ចាគទ្រព្យធនរបស់ខ្លួនក្នុងការកសាងជាតិ
និងជួយដល់ផ្នែកមនុស្សធម៌ ដោយមានការថ្វាយយោបល់ពីរដ្ឋាភិបាលក្រុងភ្នំពេញ។
នៅខែមីនា ឆ្នាំ២០១៧ រដ្ឋាភិបាលលោក ហ៊ុន សែន បានកំណត់តម្លៃបរិច្ចាគ៥០ ម៉ឺនដុល្លារអាមេរិក
សម្រាប់ងារជាឧកញ៉ា ដែលមុននេះមានតម្លៃ១០ ម៉ឺនដុល្លារអាមេរិក។
ទោះជាយ៉ាងណា មានមន្ត្រីមួយចំនួនក្នុងជួរកងកម្លាំងប្រដាប់អាវុធបានប្រើប្រាស់តួនាទី
និងឥទ្ធិពលរបស់ខ្លួនទៅប្រកបមុខរបរមិនស្របច្បាប់ទៅវិញ។ ជាឧទាហរណ៍ ថ្មីៗនេះ
សមត្ថកិច្ចបានចាប់ខ្លួនមន្ត្រីយោធាថ្នាក់វរសេនីយ៍ទោម្នាក់ ដែលមានងារជាឧកញ៉ារកស៊ីឈើដ៏ល្បីល្បាញនៅខេត្តភាគឦសាន
គឺលោក គង់ ក្រឹង ពាក់ព័ន្ធនឹងបទល្មើសព្រៃឈើ និងឧកញ៉ាសឹង សំអុល ជាមន្ត្រី ប៉េអឹម
ខេត្តត្បូងឃ្មុំក៏ត្រូវចាប់ខ្លួនដែរ ខណះពេលអតីតឧត្ដមសេនីយ៍យោធាដែលមានងារជាឧកញ៉ាម្នាក់ទៀត
គឺលោក ហូរ ចំរើន ត្រូវបានតុលាការក្រុងភ្នំពេញកាត់ទោសដាក់ពន្ធនាគារ ១ឆ្នាំកន្លះ
ពាក់ព័ន្ធនឹងករណីឆបោក និងចេញសែកស្អុយ។
អ្នកវិភាគនយោបាយនិងសង្គមកម្ពុជាមើលឃើញថា
នេះវាដល់ពេលរដ្ឋាភិបាលលោកហ៊ុន សែន ចាប់ផ្តើមធ្វើសុីក្រុមមន្ត្រីយោធាដែលមានងារជាឧកញ៉ាទាំងអស់នោះ៕
0 comments:
Post a Comment