.jpg)
អ្នកនាំពាក្យអគ្គនាយកដ្ឋានពន្ធនាគារ លោក នុត សវនា បានអះអាងនៅថ្ងៃនេះថា អគារថ្មីមួយស្ថិតក្នុងបរិវេណពន្ធនាគារព្រៃស ដែលកាលដើមឡើយសង់ឡើងក្នុងបំណងដាក់ជួលឱ្យអ្នកជាប់ឃុំនោះ ត្រូវបានផ្ទេរជាផ្លូវការដាក់ឱ្យស្ថិតក្រោមការគ្រប់គ្រងរបស់ពន្ធនាគាររាជធានីភ្នំពេញ ឬហៅកាត់ថា ពន្ធនាគារប៉េហ្ស៊ី (PJ)។
មន្ត្រីពន្ធនាគាររូបនេះ ប្រាប់បន្ថែមថា នេះគឺជាសេចក្ដីសម្រេចផ្លូវការរបស់រដ្ឋមន្ត្រីក្រសួងមហាផ្ទៃ លោក ស ខេង បន្ទាប់ពីអគារពន្ធនាគារនោះ ត្រូវបានសាងសង់រួចរាល់កាលពីដើមខែវិច្ឆិកានេះ។
លោក នុត សវនា មានប្រសាសន៍ថា៖ «មកដល់ពេលនេះ យើងតេស្តហេដ្ឋារចនាសម្ព័ន្ធ និងគ្រឿងបំពាក់សម្ភារបច្ចេកទេសនៅក្នុងហ្នឹង។ ប្រសិនបើដើរស្រួលបួលហើយ ទើបអាចដំណើរការបាន។ អ៊ីចឹង ក្នុងអំឡុងពេលនេះ ខ្ញុំមិនអាចជម្រាបជូនបានទេថា នឹងអាចប្រើប្រាស់បាននៅពេលណា។ យើងត្រូវមានលិខិតបទដ្ឋានបែបបទគតិយុត្តិអីត្រឹមត្រូវសមរម្យសិន។ មួយទៀត គឺបច្ចេកទេស និងរចនាសម្ព័ន្ធដឹកនាំអង្គភាព។ ជនជាប់ឃុំអត់មានត្រូវបង់លុយអីទេ ព្រោះទីនេះជាកន្លែងគ្រប់គ្រងដោយរដ្ឋ»។
លោក នុត សវនា ឱ្យដឹងថា ក្រសួងមហាផ្ទៃបានទទួលទិញអគារពន្ធនាគារថ្មីនេះពីក្រុមហ៊ុនឯកជន ដែលលោកប្រាប់ថា លោកមិនបានដឹងពីតម្លៃនៃការទិញអគារនោះទេ។
លោកបន្តថា អគារថ្មីនេះនឹងត្រូវដាក់ដំណើរការឱ្យពិរុទ្ធជនស្នាក់នៅនាពេលខាងមុខ ប្រសិនបើមានការរៀបចំលិខិតបទដ្ឋានត្រឹមត្រូវ និងការងារគ្រប់គ្រងរួចរាល់។
លោក នុត សវនា បញ្ជាក់ថា បច្ចុប្បន្ន ពន្ធនាគារ និងមណ្ឌលអប់រំកែប្រែនៅកម្ពុជាស្ទើរគ្រប់កន្លែង មានសភាពចង្អៀតណែន ដែលចាំបាច់ត្រូវមានការដោះស្រាយបញ្ហានេះឱ្យមានប្រសិទ្ធិភាព។
គម្រោងសាងសង់អគារពន្ធនាគារបង់ប្រាក់នេះ ត្រូវបានក្រសួងមហាផ្ទៃផ្ដល់សិទ្ធិវិនិយោគដំបូងទៅក្រុមហ៊ុន គន្ធរីខុន ហូលឌីង សម្រាប់កិច្ចសន្យាវិនិយោគរយៈពេល ៤៥ឆ្នាំ មុននឹងផ្ទេរទៅឱ្យរដ្ឋាភិបាលវិញ។
សារព័ត៌មានក្នុងស្រុកដែលបានដកស្រង់សម្ដីតំណាងក្រុមហ៊ុន គន្ធរីខុន ហូលឌីង ឲ្យដឹងថាអគារពន្ធនាគារនេះ ត្រូវបានសាងសង់ឡើងជាមួយទុនវិនិយោគទំហំជាង ៤លាន ១សែនដុល្លារ និងមានគ្រែចំនួន ៤០០ ហើយបំពាក់ទៅដោយសម្ភារសុវត្ថិភាពសន្តិសុខ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ស្វាគមន៍ចំពោះការផ្ទេរជាផ្លូវការនេះ ប៉ុន្តែ លោកថា អគារពន្ធនាគារថ្មីនេះ គ្រាន់តែអាចដោះស្រាយកន្លែងដាក់អ្នកជាប់ឃុំបានតិចតួចប៉ុណ្ណោះ។
លោកបន្តថា មូលហេតុសំខាន់ ដែលនាំពន្ធនាគារកាន់តែចង្អៀតណែននោះ គឺបណ្ដាលមកពីកំណើននៃបទល្មើសគ្រឿងញៀន និងការអនុវត្តនីតិវិធីរបស់តុលាការមានការយឺតយ៉ាវ។
លោក ស៊ឹង សែនករុណា និយាយថា៖ «ស្ដង់ដារក្នុងការគ្រប់គ្រងអ្នកជាប់ឃុំហ្នឹង អ្នកមានលុយមានអំណាចមានសែហ្នឹងផ្សេងទៅ អ្នកជាប់ឃុំហ្នឹងផ្សេងទៅ ក្នុងនាមជាសង្គមស៊ីវិល យើងចង់ឃើញមានការអនុវត្តច្បាប់ស្មើៗគ្នា មិនថាអ្នកហ្នឹងជាអ្នកណាទេ»។
កាលពីខែកញ្ញាកន្លងមកនេះ បងស្រីរបស់សកម្មជនអតីតបក្សសង្រោះជាតិ កញ្ញា យូ ចាន់ធានី បានថ្លែងប្រាប់អ្នកសារព័ត៌មានថា កញ្ញាត្រូវបានអនុរក្សពន្ធនាគារដាក់ឱ្យរស់នៅក្នុងបន្ទប់ជាមួយអ្នកជាប់ឃុំដទៃទៀតប្រមាណ ១០០នាក់។
បន្ទាប់ពីការតវ៉ារបស់សាច់ញាតិ និងក្រុមមេធាវីរួចមក មន្ត្រីពន្ធនាគារបាននាំកញ្ញា ធានី ទៅរស់នៅក្នុងបន្ទប់ឃុំឃាំងដែលមិនសូវចង្អៀតវិញ។
របាយការណ៍ឃ្លាំមើលពន្ធនាគាររបស់អង្គការលីកាដូ ចេញផ្សាយកាលពីឆ្នាំ២០១៨ បង្ហាញថា ក្នុងករណីសិក្សាលើអ្នកជាប់ឃុំចំនួនជាង ២៥០០០នាក់ គឺមានអ្នកជាប់ឃុំ ៣៧ភាគរយហើយ ដែលជាអ្នកជាប់ឃុំបណ្ដោះអាសន្នរង់ចាំសវនាការ។
របាយការណ៍ដដែល ក៏បានរកឃើញដែរថា មណ្ឌលអប់រំកែប្រែមួយចំនួនផ្ទុកអ្នកជាប់ឃុំលើសបន្ទុក ជាក់ស្តែងគុកព្រៃស ឬម១ មានសមត្ថភាពផ្ទុកអ្នកទោសត្រឹមជាង ២ពាន់នាក់ ប៉ុន្តែ ធាតុពិតជាក់ស្តែង មានអ្នកជាប់ឃុំរហូតដល់ទៅជាង ៦ពាន់នាក់គិតត្រឹមខែកក្កដា ឆ្នាំ២០១៨។
របាយការណ៍បច្ចុប្បន្នភាពរបស់អគ្គនាយកដ្ឋានពន្ធនាគារ បង្ហាញថា គិតត្រឹមបំណាច់ខែតុលាក្នុងឆ្នាំនេះ ក្នុងពន្ធនាគារចំនួន ២៨នៅទូទាំងប្រទេស មានអ្នកជាប់ឃុំជាង ៣៦ ៦០០នាក់ ក្នុងនោះស្រីជាង ៣ ០០០នាក់ ដែលភាគច្រើនជាបទល្មើសគ្រឿងញៀន៕
0 comments:
Post a Comment