រហូតមកដល់ម៉ោង១១និង៨នាទីថ្ងៃទី១២កុម្ភះនេះ សហភាពអឺរ៉ុបមិនទាន់សម្រេចផ្តាច់EBAនៅ ឡើយទេ ខណះ សម្តេចនាយករដ្ឋមន្ត្រី ហ៊ុន សែន បានអំពាវនាវទៅពលរដ្ឋកុំឱ្យ«តក់ស្លុត»ទៅនឹងការកាត់ផ្ដាច់ប្រព័ន្ធអនុគ្រោះពាណិជ្ជកម្មដែលផ្ដល់ឱ្យដោយសហភាពអឺរ៉ុបនោះឡើយ។
មេដឹកនាំកម្ពុជារូបនេះ បានថ្លែងដូច្នេះអំឡុងពិធីបើកការដ្ឋានសាងសង់ផ្លូវជាតិលេខ
២ឡើងវិញនៅថ្ងៃម្សិលមិញ តែមួយថ្ងៃមុនសហភាពអឺរ៉ុបធ្វើសេចក្ដីសម្រេច ជុំវិញប្រព័ន្ធអនុគ្រោះពាណិជ្ជកម្ម«អ្វីគ្រប់យ៉ាងលើកលែងតែអាវុធ» ឬ EBA ដែលគ្រោងធ្វើនៅថ្ងៃស្អែកនេះ។
សម្តេច ហ៊ុន សែន ថ្លែងថា៖
«កម្ពុជាសុខចិត្តទទួលទណ្ឌកម្មនយោបាយ និងសេដ្ឋកិច្ចពីប្រទេសក្រៅ លើកនេះហេតុអ្វីបានជាមិនហ៊ានលេង
មិនមែនជាសារនយោបាយផ្ចាញ់ផ្ចាលទេ ក៏ប៉ុន្តែ អំពាវនាវឱ្យពលរដ្ឋរបស់យើងកុំឱ្យមានការតក់ស្លុតឱ្យសោះ
ប្រទេសរបស់យើង យើងជាម្ចាស់ប្រទេស យើងត្រូវមានលទ្ធភាពដោះស្រាយបញ្ហារបស់យើង»។
សម្តេច ហ៊ុន សែន បានបញ្ជាក់ថា
រោងចក្រមួយចំនួននឹងបិទទ្វានៅខែក្រោយ ប៉ុន្តែ សម្តេចថា ការបិទទ្វានោះ មិនជាប់ពាក់ព័ន្ធទៅនឹងចំណាត់ការរបស់សហភាពអឺរ៉ុបលើបញ្ហា
EBA ទេ គឺដោយសាររោងចក្រខ្វះវត្ថុធាតុដើមនាំចូលពីប្រទេសចិន
ដែលចិនពេលនេះ កំពុងបិទការផលិត ទប់ស្កាត់ការឆ្លងមេរោគរលាកផ្លូវដង្ហើមថ្មី ហៅថា កូរ៉ូណាវីរុស។
សម្តេច ហ៊ុន សែន ថ្លែងបន្តថា៖ «រឿង EBA បើទោះបីគេដកទាំងស្រុង ឬផ្នែកខ្លះ
ក៏គង់ទៅដល់ខែ៨ ឯណោះ បានវាចាប់ផ្តើម។ អ៊ីចឹង វាអត់មានទេ ហើយកុំឆ្កួតៗ និយាយរួម
គឺពួកអាពុលក្តួចភ័យខ្លាច ឮតែ EBA ភ័យ តែអត់ដឹងថា អា EBA
ជាស្អី»។
នៅក្នុងសេចក្ដីប្រកាសព័ត៌មានរបស់ខ្លួននៅថ្ងៃនេះដែរ
សមាគមរោងចក្រកាន់ដេរកម្ពុជា ហៅ GMAC បានបង្ហាញជំហរដូចគ្នាទៅនឹងអ្វីដែលសម្តេច
នាយករដ្ឋមន្ត្រី ហ៊ុន សែន បានថ្លែងនៅព្រឹកថ្ងៃនេះផងដែរ ជុំវិញដំណើរវិវត្តថ្មីៗនៃវិស័យរោងចក្រកាត់ដេរនៅកម្ពុជា។
GMAC បានអះអាងនៅក្នុងសេចក្ដីប្រកាសព័ត៌មាននោះថា
រោងចក្រមួយចំនួនអាចនឹងបិទទ្វារយៈពេល១ ឬ ២ខែ ដែលខ្លះចាប់ពីចុងខែកុម្ភៈនេះទៅ ដោយសារកង្វះខាតវត្ថុធាតុដើម
ដែល GMAC ថា ៦០ភាគរយ ត្រូវបាននាំចូលពីប្រទេសចិន។
អគ្គលេខាធិការ GMAC
លោក កេន លូ បានប្រាប់ថា លោកមិនទាន់អាចបញ្ជាក់បានអំពីចំនួនរោងចក្រដែលកំពុងប្រឈមមុខនឹងការផ្អាកដំណើរការផលិតកម្មរបស់ពួកគេនោះទេ
ព្រមទាំងរយៈពេលនៃការផ្អាកដំណើរការផលិតកម្មនោះឡើយ។
នៅថ្ងៃទី១២ ខែកុម្ភៈ នេះ
សហភាពអឺរ៉ុបនឹងប្រកាសចុងក្រោយថា តើត្រូវព្យួរ ឬមិនព្យួរប្រព័ន្ធអនុគ្រោះពន្ធ EBA
ពីកម្ពុជា បន្ទាប់ពីអឺរ៉ុបបានទាមទារឱ្យកម្ពុជាស្ដារការគោរពសិទ្ធិមនុស្ស
និងលទ្ធិប្រជាធិបតេយ្យឡើងវិញ។
នៅពេលត្រូវបានសាកសួរថា តើស្ថានភាពបច្ចុប្បន្ននៃរោងចក្រកាត់ដេរកម្ពុជា
មួយផ្នែកបណ្ដាលមកពីភាពមិនច្បាស់លាស់នៃ EBA ឬយ៉ាងណានោះ លោក កេន លូ បានច្រានចោលនូវការលើកឡើងនេះ។
លោក កេន លូ ប្រាប់ថា៖
«បញ្ហាចំពោះមុខនៅខែ៣ អាចមានរោងចក្រមួយចំនួនត្រូវព្យួរការងារ មកពីអត់មានវត្ថុធាតុដើម។
អ៊ីចឹង យើងចង់ឆ្លើយថា បញ្ហាអត់មានវត្ថុធាតុដើម មិនមែនជាបញ្ហា EBA ទេ គឺថា ទាំងស្រុងមកពីកូរ៉ូណាវីរុស»។
ប្រព័ន្ធអនុគ្រោះពន្ធពាណិជ្ជកម្មរបស់សហភាពអឺរ៉ុប
បានផ្ដល់សិទ្ធិឱ្យកម្ពុជានាំចូលទំនិញគ្រប់យ៉ាងចូលទៅទីផ្សារសហភាពអឺរ៉ុបដោយរួចផុតពីកាតព្វកិច្ចបង់ពន្ធ។
យោងតាមការចុះផ្សាយរបស់សារព័ត៌មានជប៉ុន
Nikkei Asia Review កម្ពុជានាំចេញផលិតផលកាត់ដេរសម្លៀកបំពាក់មានតម្លៃដល់ទៅ
៤.៦ពាន់លានដុល្លារ ទៅកាន់ពីទីផ្សារសហភាពអឺរ៉ុបនៅក្នុងរយៈពេល១១ខែឆ្នាំមុន។
ប្រសិនបើកម្ពុជាបាត់បង់ប្រព័ន្ធអនុគ្រោះ
EBA រាល់ទំនិញនាំចេញពីកម្ពុជាទៅកាន់ទីផ្សារសហភាពអឺរ៉ុប
នឹងត្រូវជាប់កាតព្វកិច្ចបង់ពន្ធគយក្នុងអត្រាចន្លោះពី៨ភាគរយ ទៅ១៧ភាគរយ៕
0 comments:
Post a Comment