ព្រះបរមរាជវាំងថ្កោលទោសលោក សម រង្ស៉ី បន្ទាប់ពីលោកហៅ ព្រះមហាក្សត្រថា «ជាអាយ៉ង ហ៊ុន សែន»

(ភ្នំពេញ)៖ ក្រសួងព្រះបរមរាជវាំង នៅថ្ងៃទី១៣ ខែកញ្ញា ឆ្នាំ២០១៩នេះ បានចេញសេចក្តី ថ្លែងការណ៍មួយ ថ្កោលទោសចំពោះលោក សម រង្ស៉ី មេបក្សប្រឆាំងកម្ពុជាដែលបាននិយាយ រិះគន់ដល់ អង្គព្រះមហាក្សត្រ ជីវិតតម្កល់លើត្បូង សម្តេចព្រះនរោត្តម សីហមុនីថា«ជាអាយ៉ងហ៊ុន សែន» ដែលមិនអាចដោះស្រាយបញ្ហានយោបាយកម្ពុជាបានទេ។

ក្នុងសេចក្តីថ្លែងការណ៍ដែលអ្នកកាសែត ទទួលបានមុននេះ បានបញ្ជាក់ថា៖ «ក្រសួងព្រះបរម រាជវាំង សូមប្រកាសដាច់អហង្កាថ្កោលទោសចំពោះលោក សម រង្សី ដែលមានចរិតជាជន ក្បត់ជាតិ តែងតែពោលពាក្យប៉ះពាល់ដល់ព្រះកិត្តិនាម ព្រះករុណា ព្រះមហាក្សត្រ នៃព្រះរាជា ណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ដែលព្រះអង្គ កំពុងគង់ប្រថាប់បំពេញ ព្រះរាជ តួនាទីដ៏ឧត្តុង្គឧត្តម ជានិមិត្តរូបនៃឯកភាពជាតិ និងរិរន្តរភាពជាតិ»។

ព្រះបរមរាជវាំងបានបញ្ជាក់ទៀតថា៖ អាស្រ័យលើព្រះរាជតួនាទីដ៏ឧត្តុង្គឧត្តមខាងលើនេះ សង្គម ជាតិកម្ពុជា កំពុងទទួលបានសេចក្តីសុខ សន្តិភាព និងការអភិវឌ្ឍន៍ ក្រោមការដឹកនាំរបស់ រាជរដ្ឋាភិបាល នៃព្រះរាជាណាចក្រកម្ពុជា។

សូមបញ្ជាក់ថា នាយប់ថ្ងៃទី១២ ខែកញ្ញា ឆ្នាំ២០១៩ លោក សម រង្ស៉ី ក្នុងកិច្ចសម្ភាសន៍ជាមួយ វិទ្យុអាស៊ីសេរី បានគូសបញ្ជាក់យ៉ាងធ្ងន់ធ្ងរលើអង្គព្រះមហាក្សត្រ ដោយបានវាយប្រហារថា ព្រះមហាក្សត្រ ជា «ចំណាប់ខ្មាំង» និងជា «អាយ៉ង» របស់លោកនាយករដ្ឋមន្ត្រី ហ៊ុន សែន និងចង់រក្សាតែរាជបល្ល័ង។

រដ្ឋធម្មនុញ្ញនៃព្រះរាជាណាចក្រកម្ពុជា មាត្រា៧ បានចែងថា «អង្គព្រះមហាក្សត្រ មិនអាចនរណា រំលោភបំពានបានឡើយ»។ មាត្រា៨ បានចែងថា «ព្រះមហាក្សត្រ ព្រះអង្គទ្រង់ជានិមិត្តរូបនៃ ឯកភាពជាតិ និងនិរន្តរ៍ភាពជាតិ។ ព្រះមហាក្សត្រ ទ្រង់ជាអ្នកធានាឯករាជ្យជាតិ អធិបតេយ្យ និងបូរាណភាពទឹកដីនៃព្រះរាជាណាចក្រកម្ពុជា ទ្រង់ជាអ្នកធានាការគោរពសិទ្ធិ និងសេរីភាព របស់ប្រជាពលរដ្ឋ និងការគោរពសន្ធិសញ្ញាអន្តរជាតិ»៕