លោកនាយករដ្ឋមន្ត្រីហ៊ុន សែន បញ្ជាក់ថា ការមិនបិទជើងយន្តហោះ និងជម្លៀសពលរដ្ឋកម្ពុជាពីប្រទេសចិន គឺដើម្បីរក្សាសេដ្ឋកិច្ច និងទំនាក់ទំនងល្អជាមួយមហាអំណាចមួយនេះ។
ក្នុងសន្និសីទសារព័ត៌មាននៅព្រឹកថ្ងៃព្រហស្បតិ៍នេះ លោកនាយករដ្ឋមន្ត្រី ហ៊ុន សែន បានថ្លែងថា ការបិទជើងយន្តហោះពីចិនមកកម្ពុជា និងជម្លៀសពលរដ្ឋពីប្រទេសចិនមកវិញគឺ ហាក់បីដូចជាសម្លាប់សេដ្ឋកិច្ច និងនយោបាយកម្ពុជាជាមួយចិន។
លោកថ្លែងថា៖ « រឿងអីពេលសុខស្រួលនៅជាមួយគ្នា ពេលលំបាកបែរជារត់ចោលគ្នា? បើខ្ញុំជាស៊ីជិនពីង ឬក៏ជាលី ឃឺឈាង គឺខ្ញុំអត់ឱ្យទេ! ហែងរត់ចោលអញហើយ អ្ហែងមកធ្វើអីទៀត អាហ្នឹងយើងសាកគិតខ្លួនគេខ្លួនយើងទៅចុះ! »
ជំងឺរលាកសួតធ្ងន់ធ្ងរដែលបណ្ដាលមកពីវីរុសកូរ៉ូណា បានផ្ទុះឡើងដំបូងកាលពីថ្ងៃទី ៣១ ធ្នូ ឆ្នាំ២០១៩ ក្នុងទីក្រុងវូហាន ក្នុងខេត្តហ៊ុយបេ ប្រទេសចិន ដែលរហូតមកដល់ពេលនេះ វីរុសនេះត្រូវបានរកឃើញលើអ្នកដំណើរជនជាតិចិនជាច្រើនប្រទេស រួមទាំងប្រទេសកម្ពុជាផងដែរ បានបង្កការភ័យខ្លាចដល់ពលរដ្ឋខ្មែរដែលរស់នៅក្នុងស្រុករហូតទៅរកទិញម៉ាស់ពាក់ស្ទើរគ្រប់គ្នា ដែល ករណីនេះត្រូវបានលោកហ៊ុន សែន ចាត់ទុកថា ជាជំងឺភ័យខ្លាចហួសការពិតរបស់ប្រជាពលរដ្ឋ៕
0 comments:
Post a Comment