រដ្ឋមន្រ្តីក្រសួងសុខាភិបាល ទាត់ចោលព័ត៌មាន ដែលបាន ផ្សព្វផ្សាយថា «មានអ្នកឆ្លងជំងឺកូរ៉ូណា ២នាក់នៅខេត្តកោះ កុង»ក្នុងកាសែតដើមអម្ពឹល!

(ភ្នំពេញ)៖ រដ្ឋមន្រ្តីក្រសួងសុខាភិបាល លោក ម៉ម ប៊ុនហេង ថ្លែងប្រាប់ថា លោកសូមបដិសេធ ភ្លាមៗចំពោះព័ត៌មាន ដែលបានផ្សព្វផ្សាយក្នុងកាសែត ដើមអម្ពិលនៅព្រឹកនេះថា មានជនជាតិ ចិន២នាក់ ឆ្លងជំងឺរលាកសួត កូរ៉ូណា នៅខេត្តកោះកុង ករណីនេះមិនមែនជាការពិតនោះទេ។

រដ្ឋមន្រ្តីក្រសួងសុខាភិបាល បានបញ្ជាក់យ៉ាងដូច្នេះថា «ពូបានបញ្ជាក់ទៅខេត្តកោះកុងហើយ ពុំមានករណីជនជាតិចិន២នាក់ ឆ្លងជំងឺរលោកសួតកូរ៉ូណា នៅខេត្តកោះកុងនោះទេ សូមបដិសេធ ព័ត៌មានទាំងនោះ»។

ការថ្លែងទាត់ចោលភ្លាមៗចំពោះព័ត៌មានបំផ្លើសការពិតនៅក្នុងកាសែតដើមអម្ពិលនេះ ធ្វើឡើង បន្ទាប់ពីកាសែតនេះបានសរសេរថា មានករណីឆ្លងមេរោគកូរ៉ូណា ២នាក់នៅខេត្តកោះកុង។

សូមបញ្ជាក់ថា គិតត្រឹមព្រឹកថ្ងៃទី២៩​ ខែមករា ឆ្នាំ២០២០នេះ កម្ពុជាមានអ្នកជំងឺរលាកសួត កូរ៉ូណា តែមួយនាក់ នៅខេត្តព្រះសីហនុ៕