ប្រធានាធិបតីអាមេរិកលោក Joe Biden នៅថ្ងៃពុធនេះបានសម្រេចចិត្តថា បញ្ជូនប្រព័ន្ធរ៉ុកកែតទំនើបជាងមុននិងគ្រាប់រំសេវបន្ថែមទៀតទៅឱ្យប្រទេសអ៊ុយក្រែនដែលជាផ្នែកមួយនៃកិច្ចប្រឹងប្រែងរបស់សហរដ្ឋអាមេរិកក្នុងការជួយប្រទេសនេះដើម្បីប្រយុទ្ធទប់ទល់នឹងការឈ្លានពានរបស់រុស្ស៊ីដែលរហូតមកដល់ពេលនេះចូលដល់ខែទី៤ហើយ។
ជំនួយយោធាថ្មីនេះ គិតជាលុយមានចំនួន៧០០លានដុល្លារ ដែលលោក Biden យកមកទូទាត់នឹងប្រព័ន្ធរ៉ុកកែតទំនើបៗ និងគ្រាប់រំសេវជាច្រើនទៀតដល់អ៊ុយក្រែន។
លោក Biden បានសរសេរនៅក្នុងអត្ថបទបញ្ចេញមតិមួយដែលបានចុះផ្សាយនៅក្នុងកាសែត The New York Times ថា សហរដ្ឋអាមេរិកបានផ្តល់ជំនួយជាអាវុធយុទ្ធភណ្ឌនិងគ្រាប់រំសេវដល់ប្រទេសអ៊ុយក្រែនដើម្បីជួយពង្រឹងជំហររបស់ប្រទេសនេះនៅលើសមរភូមិហើយនឹងនៅទីបញ្ចប់ធ្វើការចរចាសន្តិភាពជាមួយប្រទេសរុស្ស៊ី។
លោក Biden បានសរសេរបន្តទៀតថា«ការឈ្លានពានដោយគ្មានមូលហេតុ ការបាញ់ផ្លោងដាក់សាលារៀននិងមជ្ឈមណ្ឌលវប្បធម៌និងបង្ខំឱ្យមនុស្សរាប់លាននាក់បាត់បង់ទីជម្រកបានធ្វើឱ្យសង្គ្រាមនៅក្នុងប្រទេសអ៊ុយក្រែនក្លាយជាបញ្ហាសីលធម៌ដ៏សំខាន់មួយ»។
ការសម្រេចចិត្តដើម្បីបញ្ជូនអាវុធទំនើបកាន់តែខ្លាំងបន្ថែមទៀតទៅឱ្យអ៊ុយក្រែនបានកើតមានឡើង បន្ទាប់ពីរដ្ឋបាលរបស់លោក Biden មានភាពស្ទាក់ស្ទើរក្នុងពេលកន្លងមក។
លោក Biden បាននិយាយខ្លួនឯងកាលពីថ្ងៃចន្ទថា សហរដ្ឋអាមេរិកនឹងមិនបញ្ជូនរ៉ុក្កែតដែលអាចបាញ់ដល់ប្រទេសរុស្ស៊ីនោះឡើយ»។
ទីភ្នាក់ងារព័ត៌មាន The Associated Press បានស្រង់សម្តីមន្ត្រីជាន់ខ្ពស់នៃរដ្ឋបាលអាមេរិកមួយចំនួនមកចុះផ្សាយថា កញ្ចប់ជំនួយអាវុធថ្មីដែលនឹងត្រូវបញ្ជាក់លម្អិតនៅថ្ងៃពុធនេះថាកញ្ចប់ថវិកាជំនួយចំនួន៧០០លានដុល្លារជាជំនួយយោធារួមមានរ៉ុកកែតវង់ប្រតិបត្តិការមធ្យម ដែលអាចបាញ់បានក្នុងរង្វង់ចម្ងាយប្រមាណ៧០គីឡូម៉ែត្រ។ មន្ត្រីអាមេរិកទាំងនោះក៏បានលើកឡើងផងដែរថា អ៊ុយក្រែនបានសន្យាថា កងទ័ព របស់ខ្លួន នឹងមិនប្រើអាវុធរ៉ុកកែតទាំងនោះដើម្បីបាញ់ទៅលើទឹកដីប្រទេសរុស្ស៊ីនោះទេ៕
0 comments:
Post a Comment