ប្រធានគណៈកម្មាធិការព្រំដែនកម្ពុជា លោក
វ៉ា គឹមហុង។
ចំណែកតំបន់ ដែលមានភាពចម្រូងចម្រាស់វិញ មន្ត្រីជាន់ខ្ពស់កម្ពុជាដដែលបញ្ជាក់ថា ភាគីទាំង
ពីរ នឹងបន្តធ្វើការដោះស្រាយ ដោយមានការចូលរួមពីអ្នកឯកទេសផ្នែកព្រំដែននិងផែនទីមកពី ប្រទេសបារាំង។
ប្រធានគណៈកម្មាធិការព្រំដែនកម្ពុជា លោក វ៉ា គឹមហុង អះអាងនៅថ្ងៃសុក្រនេះថា ការបោះបង្គោលព្រំដែន បំពេញបន្ថែម នៅតាមព្រំដែនកម្ពុជា-វៀតណាម រហូតដល់ពេលនេះ បានរួចរាល់ជាង ៨៤ភាគរយនៅក្នុងចំណោមព្រំដែនសរុប។
លោកបន្តថា កម្ពុជា-វៀតណាម បានឯកភាពបញ្ចប់ ការបោះបង្គោលព្រំដែនបំពេញបន្ថែម នៅចុងឆ្នាំ២០១៧ខាងមុខ ចំណែក សម្រាប់តំបន់ដែលភាពចម្រូងសម្រាស់ ភាគីទាំងពីរ នឹងបន្តធ្វើការដោះស្រាយ ដោយមានការស្នើឲ្យប្រទេសបារាំងមកជួយ។
លោកបញ្ជាក់ថា «គណៈកម្មាការចម្រុះព្រំដែន នៃប្រទេសទាំងពីរ បញ្ចប់ការបោះបង្គោលបំពេញ បន្ថែមនៃកំណាត់ខ្សែព្រំដែន ដែលឯកភាពគ្នា ឲ្យចប់មុនបំណាច់ឆ្នាំ២០១៧។ នេះ ជាអ្វី ដែល
យើង ប៉ងប្រាថ្នារបស់នាយករដ្ឋមន្ត្រី នៃប្រទេសទាំងពីរ។ ប៉ុន្តែ នៅចំណុចខ្លះ ដែលយើងនៅមិន ទាន់ឯកភាពគ្នា យើងពឹងបារាំងទៅ បារាំងមិនទាន់មកផង»។
ប៉ុន្តែ នៅក្នុងការចុះផ្សាយរបស់សារព័ត៌មានក្នុងស្រុកនានា ដែលដកស្រង់សម្តី លោកស្រី កុយ ពិសី នៅក្នុងសប្តាហ៍នេះ បានឲ្យដឹងថា ខេត្ត ដែលបានការបោះបង្គោលព្រំដែនបំពេញបន្ថែមរួចរាល់ រួមមាន ខេត្តក្រចេះ ខេត្តត្បូងឃ្មុំ ដែលខេត្តនេះ មានព្រំប្រទល់ជាប់ខេត្តតៃនិញ និងប៊ិនភឿក នៃប្រទេសវៀតណាម។
ចំណែក ខេត្តដែលនៅមានភាពចម្រូងចម្រាស់នោះ រួមមានខេត្ត ស្វាយរៀង រតនគិរី មណ្ឌលគិរី កំពត តាកែវ និងខេត្តកណ្ដាល។
ជាញឹកញាប់ មេដឹកនាំវៀតណាម តែងតែជំរុញរដ្ឋាភិបាលកម្ពុជា ឲ្យពន្លឿនការបោះបង្គោលព្រំដែនរវាងប្រទេសទាំងពីរ ឲ្យបានឆាប់តាមដែលអាចធ្វើទៅបាន នៅពេលដែលខ្លួនមក ទស្សនកិច្ចនៅកម្ពុជាម្តងៗ។
ពាក់ព័ន្ធរឿងព្រំដែននេះ មន្ត្រីបក្សប្រឆាំងលោក អ៊ុំ សំអាន កំពុងជាប់ពន្ធនាគាររហូតមកដល់សព្វថ្ងៃនេះ បន្ទាប់ពីរិះគន់រដ្ឋាភិបាលកម្ពុជាថាប្រើប្រាស់ផែនទីក្លែងក្លាយក្នុងការបោះបង្គោលព្រំដែន ជាមួយវៀតណាម។ ចំណែកលោកហុង សុខហួរត្រូវបានដោះលែងឲ្យមានសេរីភាពវិញ នៅពេលថ្មីៗនេះ បន្ទាប់ពីលោកបានជាប់ពន្ធនាគារព្រៃស អស់រយះពេល២ឆ្នាំមក៕
No comments:
Post a Comment