តំបន់ការពារក្នុងឧទ្យានជាតិគិរីរម្យ និងដែនជម្រកសត្វព្រៃកែវសីមា កំពុងត្រូវបានធ្វើអនុបយោគទៅឱ្យក្រុមហ៊ុនដែលគ្រប់គ្រងដោយសមាជិកគ្រួសាររបស់ឧកញ៉ាដ៏ល្បីឈ្មោះ គឺលោកស្រី ជឹង សុភាព ព្រមទាំងភរិយារបស់រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ គឺលោកស្រី អុឹម ប៉ូលីកា។
លោកស្រី ជឹង សុភាព ដែលជាភរិយារបស់លោក ឡាវ ម៉េងឃីន សមាជិកព្រឹទ្ធសភាមកពីគណបក្សកាន់អំណាច នៅពីក្រោយសម្បទានដីជាច្រើនកន្លែងនៅទូទាំងប្រទេស ក៏ដូចជាការបណ្តេញចេញដោយហិង្សានៅតំបន់បឹងកក់ រាជធានីភ្នំពេញ ដែលបច្ចុប្បន្ននេះត្រូវបានលុបទាំងស្រុង។
អនុក្រឹត្យថ្មីរបស់រដ្ឋាភិបាលដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពីខែកក្កដា បានសម្រេចផ្ទេរដីតំបន់និរន្តរភាពចំនួន២ នៅឧទ្យានជាតិគិរីរម្យ ខេត្តកំពង់ស្ពឺ និងនៅខេត្តមណ្ឌលគិរី ឱ្យទៅក្រុមហ៊ុនឯកជនចំនួន២ ដែលមានទំនាក់ទំនងជាមួយគ្រួសាររបស់លោកស្រី ជឹង សុភាព។
អនុក្រឹត្យមួយចុះថ្ងៃទី១៩ ខែកក្កដា កំណត់ផ្ទៃដី ៧០ហិកតា ក្នុងដែនជម្រកសត្វព្រៃកែវសីមា សង្កាត់រមនា ក្រុងសែនមនោរម្យ ខេត្តមណ្ឌលគិរី ដោយចាត់ថ្នាក់ឡើងវិញពីទ្រព្យសម្បត្តិសាធារណៈទៅជាដីឯកជន ដើម្បីអភិវឌ្ឍដោយក្រុមហ៊ុន One Prosperity សម្រាប់ការវិនិយោគអេកូទេសចរណ៍។
យោងតាមបញ្ជីពាណិជ្ជកម្មរបស់ក្រសួងពាណិជ្ជកម្ម ក្រុមហ៊ុន One Prosperity ដឹកនាំដោយលោកស្រី អ៊ឹម ប៉ូលីកា ភរិយារបស់លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។
នាយក៤រូបទៀត រួមមាន លោកស្រី ឡាវ សុខហ៊ុយ លោក ជឹង ធានគាត លោក ជឹង ធានសេង និងលោកស្រី ជឹង សុគន្ធាវី។ លោកស្រី ជឹង សុគន្ធាវី និងលោក ជឹង ធានសេង គឺជាកូនរបស់លោកស្រី ជឹង សុភាព អគ្គនាយកក្រុមហ៊ុន ភាពីម៉ិច (Pheapimex) ដែលត្រូវបានគេស្គាល់ថាជាយាយភូ។
លោក ជឹង ធានសេង និងលោក ជឹង ធានគាត គឺជានាយកក្រុមហ៊ុនមួយផ្សេតទៀត ដែលបានទទួលដីទំហំ ៨៥,៧២ ហិកតា នៃឧទ្យានជាតិគិរីរម្យ ក្នុងឃុំត្រែងត្រយឹង ស្រុកភ្នំស្រួច នៅក្នុងអនុក្រឹត្យចុងក្រោយបង្អស់។
អនុក្រឹត្យនេះចុះហត្ថលេខាកាលពីថ្ងៃទី១៥ ខែកក្កដា បានផ្ទេរដីទៅឱ្យក្រុមហ៊ុន Den-Dey Eco-Tour សម្រាប់ការអភិវឌ្ឍទៅជាអេកូទេសចរណ៍។
លោកស្រី ជឹង សុគន្ធាវី បានទទួលដីទំហំ ២២២ហិកតា នៅគិរីរម្យ តាមរយៈក្រុមហ៊ុន One More របស់លោកស្រី នៅក្នុងអនុក្រឹត្យពីលើកមុន។
បុរសម្នាក់ដែលបានលើកទូរសព្ទ បានបដិសេធថា គាត់មិនមែនឈ្មោះ ធានគាត ទេ ខណៈលោក ធានសេង មិនអាចទាក់ទងបានឡើយ។ លេខទូរសព្ទដែលធ្លាប់កាន់ដោយលោក អូន ព័ន្ធមុនីរ័ត្ន ត្រូវបានស្ត្រីម្នាក់លើក។ លេខទូរសព្ទរបស់លោកស្រី អ៊ឹម ប៉ូលីកា ដែលចុះបញ្ជីនៅក្រសួងពាណិជ្ជកម្មចំនួន២ខ្សែ មានអ្នកផ្សេងលើក ដោយនិយាយថា មិនមែនជាលោកស្រីឡើយ។
អភិបាលខេត្តកំពង់ស្ពឺ លោក វ៉ី សំណាង និងអភិបាលខេត្តមណ្ឌលគិរី លោក ថង សាវុន បានបដិសេធធ្វើអត្ថាធិប្បាយ ដោយនិយាយថាមិនទាន់បានទទួលឯកសារនៅឡើយទេ។
អនុក្រឹត្យទី៣ ក៏បានផ្ទេរដីទំហំ ២៩២,០២ហិកតា នៅស្រុកបន្ទាយស្រី ខេត្តសៀមរាប ទៅឱ្យបុគ្គលឯកជន ២រូប គឺឈ្មោះ ចាន់ សុធី និង ម៉េត តុលា ដែលមិនអាចផ្ទៀងផ្ទាត់អត្តសញ្ញាណបានឡើយ។ អនុក្រឹត្យនេះបានបន្តថា តំបន់ដែលធ្លាប់បានចាត់ថ្នាក់ជាគម្របព្រៃ នឹងត្រូវប្រែក្លាយទៅជាដីឯកជនរបស់រដ្ឋ។
អភិបាលស្រុកបន្ទាយស្រី លោក រិន ឡូត មានប្រសាសន៍ថា លោកមិនបានដឹងរឿងដីនោះទេ ព្រោះលោកទើបឡើងកាន់តំណែងក្នុងខែនេះ។
ដីនៅបឹងតាមោក ក្នុងរាជធានីភ្នំពេញ ក៏ជាផ្នែកនៃអនុក្រឹត្យនេះផងដែរ៕
.jpg)
No comments:
Post a Comment