កសិករប្រមូលផលស្រូវនៅឆ្នាំនេះនៅខេត្តបាត់ដំបងចំពេលតម្លៃស្រូវធ្លាក់ចុះយ៉ាងខ្លាំង
ដោយ លោក ជា វិបុល
លោកនាយករដ្ឋមន្ត្រី ហ៊ុន សែន បានប្រកាសបញ្ចេញថវិកាប្រមាណ ២០លានដុល្លារសហរដ្ឋអាមេរិក ដើម្បីជួយអន្តរាគមន៍ពាក់ព័ន្ធការធ្លាក់ចុះនៃតម្លៃស្រូវរបស់ ប្រជាកសិករបច្ចុប្បន្នដែលបង្កឲ្យមានការរិះគន់រដ្ឋាភិបាលយ៉ាងខ្លាំង។
ការប្រកាសបញ្ចេញថវិកាប្រមាណជិត ២០លានដុល្លាសហរដ្ឋអាមេរិក របស់លោកនាយក
រដ្ឋមន្ត្រី ហ៊ុន សែននៅពេលនេះ ធ្វើឡើងនៅលើគណនីហ្វេសប៊ុក (Facebook) របស់លោក
នៅថ្ងៃទី១៦ ខែកញ្ញាគឺជាការឆ្លើយតបនឹងការរិះគន់យ៉ាងខ្លាំងពីសំណាក់ប្រធានគណបក្ស
សង្គ្រោះជាតិលោកសម រង្ស៊ី។
ទោះជាយ៉ាងណាលោកនាយករដ្ឋមន្ត្រី ហ៊ុន សែន រំពឹងថា ការប្រកាសបញ្ចេញថវិកាប្រមាណជិត ២០លានដុល្លារសហរដ្ឋអាមេរិកនេះ នឹងជួយអន្តរាគមន៍លើកតម្លៃស្រូវរបស់កសិករដែលបានធ្លាក់ចុះយ៉ាង ខ្លាំងមួយរយៈពេលចុងក្រោយនេះ។
លោកនាយករដ្ឋមន្ត្រី ហ៊ុន សែន លើកឡើងថា មួយរយៈពេលកន្លងទៅនេះតម្លៃស្រូវ និងកសិផលរបស់ប្រជាពលរដ្ឋ មិនថាតែនៅកម្ពុជាទេ គឺនៅប្រទេសដទៃក៏មានការធ្លាក់ចុះផងដែរ ហើយបញ្ហានេះក៏បានធ្វើឲ្យតម្លៃស្រូវរបស់ប្រជាកសិករនៅកម្ពុជា ក៏បានធ្លាក់ចុះយ៉ាងខ្លាំងដែរ។
លោកក៏បានបញ្ជាក់ថា លោកបានពិនិត្យយ៉ាងយកចិត្តទុកដាក់ចំពោះកង្វល់របស់ប្រជាពលរដ្ឋលើ បញ្ហាតម្លៃស្រូវធ្លាក់ចុះ។ ហេតុនេះ លោកបានរកឃើញនូវវិធានការចាំបាច់មួយចំនួនដើម្បីដាក់ចេញជួយ ដោះស្រាយ និងជួយលើកតម្លៃស្រូវរបស់កសិករ។
ជាងនេះទៀត លោកក៏បញ្ជាក់ដែរថា ទន្ទឹមនឹងវិធានការជាបន្ទាន់នេះ រដ្ឋាភិបាលក៏នឹងមានវិធានការរយៈពេលមធ្យម និងរយៈពេលវែងផ្សេងទៀតដើម្បីគាំទ្រដល់វិស័យកសិកម្មកម្ពុជា ឲ្យប្រសើរឡើង។ លោកនាយករដ្ឋមន្ត្រី ហ៊ុន សែន ឲ្យដឹងទៀតថា បច្ចុប្បន្នលោក ក៏បានបញ្ជាទៅក្រសួងសេដ្ឋកិច្ច និងហិរញ្ញវត្ថុ ព្រមទាំងស្ថាប័នពាក់ព័ន្ធប្រជុំរកដំណោះស្រាយលើបញ្ហានេះផងដែរ។
សង្គមស៊ីវិលផ្នែកកសិកម្ម និងក្រុមហ៊ុននាំចេញអង្ករយល់ថាការបញ្ចេញថវិកាជាតិជិត២០លាន
ដុល្លារ នេះគឺជាសញ្ញាវិជ្ជមានជួយជំរុញវិស័យស្រូវអង្ករកម្ពុជា ឲ្យស្ទុះងើបឡើងវិញដែលពេល
នេះកំពុងធ្លាក់ចុះយ៉ាងខ្លាំងធ្វើឲ្យកសិករខ្មែរខាតចុងខាតដើម៕
0 comments:
Post a Comment