លោកហង្ស ពុទ្ធា អ្នកនាំពាក្យ គ.ជ.ប
ដោយ លោក នុប គីម
គណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃទី២៩ វិច្ឆិកា នេះសម្រេចពន្យារពេលចុះឈ្មោះបោះឆ្នោតមួយ(០១)ថ្ងៃទៀត នៅគ្រប់ការិយាល័យចុះឈ្មោះបោះឆ្នោតទូទាំងប្រទេស។
គណបក្សសង្គ្រោះជាតិកាលពីចុងសប្តាហ៏កន្លងមកបានស្នើឲ្យគ.ជ.បពន្យាពេលចុះឈ្មោះបោះ
ឆ្នោតចំនួន៣ថ្ងៃទៀតដើម្បីទុកពេលឲ្យប្រជាពលរដ្ឋដែលមិនបានមកចុះឈ្មោះបោះឆ្នោតមាន
ឱកាសមកចុះឈ្មោះនៅក្នុងបញ្ចីបោះឆ្នោតថ្មីនេះ។
អ្នកនាំពាក្យគ.ជ.ប លោក ហង្ស ពុទ្ធា ប្រកាសថា ការសម្រេចពន្យារពេលនេះ ដោយសារគ.ជ.ប មើលឃើញថា រយៈពេលពីរបីថ្ងៃចុងក្រោយនេះ មានពលរដ្ឋជាច្រើនបានសម្រុកមកចុះឈ្មោះបោះឆ្នោត។ លោកបញ្ជាក់ថា គ.ជ.ប ចង់ឲ្យបញ្ជីចុះឈ្មោះបោះឆ្នោតថ្មីនេះ មានការចូលរួមពីពលរដ្ឋច្រើន។
ប្រតិទិននៃការចុះឈ្មោះបោះឆ្នោតរបស់គ.ជ.ប ថ្ងៃទី២៩ វិច្ឆិកានេះ ជាថ្ងៃចុងក្រោយ នៃដំណើរការចុះឈ្មោះបោះឆ្នោត។ របាយការណ៍ពីចំនួនអ្នកចុះឈ្មោះបោះឆ្នោតទូទាំងប្រទេស គិតត្រឹមល្ងាចថ្ងៃទី២៨ វិច្ឆិកា បង្ហាញថា មានពលរដ្ឋជិត ៨ លាននាក់(៧.៧៦៤.៦៥៣នាក់) ខណៈពលរដ្ឋដែលមានអាយុគ្រប់អាចចុះឈ្មោះបាននៅសល់ជិត២លាននាក់ (១.៨៩៩.៥៦៣នាក់) ទៀត។
ក្នុងចំណោមអ្នកដែលមិនទាន់បានមកចុះឈ្មោះបោះឆ្នោតទាំងនេះគឺភាគច្រើនជាពលករខ្មែរទៅ
ធ្វើការនៅក្រៅប្រទេសដូចជាប្រទេសថៃជាដើម៕
0 comments:
Post a Comment