លោក ស៊ិក ប៊ុនហុក (កណ្តាល) ប្រធាន គ.ជ.ប សម្រេចច្រានចោលបណ្តឹងចំនួន៧
ក្នុងចំណោម១៨១នាក់របស់បក្សប្រឆាំងសុំឲ្យលប់ឈ្មោះវៀតណាមចេញពីបញ្ចីបោះឆ្នោត។
គណៈកម្មាធិការជាតិរៀបចំការបោះឆ្នោត(គ.ជ.ប) នៅថ្ងៃទី១៦ខែមករានេះបានបើកសវនាការ
លើបណ្តឹងទាស់ចំនួន៧របស់គណបក្សសង្គ្រោះជាតិ ក្រោយពីគណបក្សនេះមិនទទួលយក
សេចក្តីសម្រេចរបស់ក្រុមប្រឹក្សាឃុំ-សង្កាត់ ដែលមិនព្រមលុបឈ្មោះអ្នកចុះឈ្មោះបោះឆ្នោត
មួយចំនួនដែលគេសង្ស័យថាជាជនជាតិវៀតណាម។
នៅក្នុងសវនាការនោះបណ្តឹងយ៉ាងតិចចំនួន៧ ក្នុងចំណោមបណ្តឹងចំនួន១៨១ត្រូវបានគណៈ
កម្មាធិការជាតិរៀបចំការបោះឆ្នោតប្រកាសច្រានចោល ដោយអះអាងថាការដែលដើមបណ្តឹងប្តឹង
សុំលុបឈ្មោះជនជាតិវៀតណាម១៨១នាក់ចេញពីបញ្ជីបោះឆ្នោតនោះថាមិនមែនជាទម្រង់ច្បាប់
សម្រាប់ពិចារណា។
បណ្តឹងដែល គ.ជ.ប លើកយកមកជំនុំជម្រះនៅថ្ងៃដំបូងនេះ មានករណីនៅសង្កាត់ផ្សារថ្មី២និង
សង្កាត់មួយចំនួនក្នុងខណ្ឌឬស្សីកែវ រាជធានីភ្នំពេញ ករណីនៅឃុំស្វាយជ្រំ ស្រុករលាផ្អៀ ខេត្ត
កំពង់ឆ្នាំង សង្កាត់ប៉ៃលិន ខេត្តប៉ៃលិន និងសង្កាត់មួយចំនួនក្នុងខេត្តព្រះសីហនុ។
ក្នុងពេលបើកសវនាការ មេធាវីការពារឲ្យដើមបណ្តឹង លោក សំ សុគង់ ពន្យល់ដល់ក្រុមប្រឹក្សា
ជំនុំជម្រះថា ការដែលកូនក្តីលោកហ៊ានអះអាងថាអ្នកទាំងនោះជាជនជាតិវៀតណាម លោក
សំអាងថាអ្នកទាំងនោះនិយាយភាសាខ្មែរមិនច្បាស់ ហើយប្រើភាសាវៀតណាមជាប្រចាំក្នុងការ
ទំនាក់ទំនងក្នុងគ្រួសារនិងប្រើប្រាស់អត្តសញ្ញាណប័ណ្ណសញ្ជាតិខ្មែរទៅចុះឈ្មោះដោយមិនបាន
បំពេញលក្ខខណ្ខនៃការចូលសញ្ជាតិ។
លោក សំ សុគង់ ស្នើឲ្យ គ.ជ.ប លុបឈ្មោះអ្នកដែលមានក្នុងពាក្យបណ្តឹងនោះចេញពីបញ្ជីបោះ
ឆ្នោតនិងបើកការស៊ើបអង្កេតរកមូលហេតុដែលជនសង្ស័យទាំងនោះមានអត្តសញ្ញាណប័ណ្ណ
សញ្ជាតិខ្មែរប្រើប្រាស់ដោយមិនឆ្លងកាត់ច្បាប់សញ្ជាតិ។
ក្រោយពីបើកសវនាការសួរដេញដោលពេញមួយព្រឹកទៅលើដើមបណ្តឹងនិងចុងចម្លើយរួចមក គ.ជ.ប បានប្រើពេលពិភាក្សាក្នុងបន្ទប់បិទជិតប្រមាណជា៤ម៉ោង។
ក្រោយមកសមាជិក គ.ជ.ប និងជាក្រុមប្រឹក្សាជំនុំជម្រះទាំង៩រូប បានបង្ហាញវត្តមាននៅក្នុងអង្គ
សវនាការវិញនៅម៉ោង៧យប់។
ប្រធានក្រុមប្រឹក្សាជំនុំជម្រះនិងជាប្រធាន គ.ជ.ប លោក ស៊ិក ប៊ុនហុក បានប្រកាសថាការស្នើសុំរបស់ដើមបណ្តឹងតំណាងឲ្យគណបក្សសង្គ្រោះជាតិ លោកថា គ.ជ.ប មិនអាចពិចារណា
បានទេដោយថាការស្នើនោះមិនមានគតិយុត្តិផ្លូវច្បាប់សម្រាប់ឲ្យក្រុមប្រឹក្សាជំនុំជម្រះពិចារណា
ជឿបាន។
លោក ស៊ិក ប៊ុនហុក បន្តថា គ.ជ.ប សម្រេចថាការដែលក្រុមប្រឹក្សាឃុំ-សង្កាត់រក្សាទុកជនសង្ស័យទាំងជាង១០០នាក់នោះនៅក្នុងបញ្ជីបោះឆ្នោត លោកថាជារឿងត្រឹមត្រូវតាមទម្រង់ច្បាប់។
លោក ស៊ិក ប៊ុនហុក បន្តថាការស្នើសុំឲ្យ គ.ជ.ប ស៊ើបអង្កេតទៅលើជនសង្ស័យដែលមាននៅក្នុង
ពាក្យបណ្តឹងនោះ លោកថាមិនមែនជាដែនសមត្ថកិច្ចរបស់ គ.ជ.ប ទេ។
ប៉ុន្តែប្រធាន គ.ជ.ប រូបនោះទុកពេលឲ្យដើមបណ្តឹងប្តឹងករណីនេះទៅក្រុមប្រឹក្សាធម្មនុញ្ញ។បើតាម
គ.ជ.ប គិតត្រឹមថ្ងៃទី១៦ ខែមករា គឺមានបណ្តឹង១៤១២បានដល់ដៃ គ.ជ.ប ហើយ ក្នុងនោះបណ្តឹង
ប្តឹងជំទាស់ឲ្យលុបឈ្មោះដែលគេសង្ស័យថាមានជនជាតិវៀតណាមបន្លំចុះឈ្មោះបោះឆ្នោតនេះ មាន៧៦១បណ្តឹង ហើយ គ.ជ.ប នឹងបន្តសវនាការលើបណ្តឹងទាំងនោះរហូតដល់ថ្ងៃទី១៩ ខែ
មករា។
នៅពេលនេះគណបក្សសង្គ្រោះជាតិមិនទាន់មានប្រតិកម្មចំពោះការសម្រេចបដិសេធរបស់គ.ជ.បនៅឡើយទេ។ចំណែកមន្ត្រីគ.ជ.បខាងកូតារបស់គណបក្សសង្គ្រោះជាតិវិញដូចជាលោកគួយ ប៊ុន
រឿនអនុប្រធានគ.ជ.បនិងលោករ៉ុង ឈុនសមាជិកគ.ជ.បជាដើមគឺគ្មានប្រតិកម្មអ្វីចំពោះការ
សម្រេចនេះដែរ។នេះបង្ហាញឲ្យឃើញថាមន្ត្រីគ.ជ.បមកពីកូតារបស់គណបក្សប្រឆាំងគ្មានអំណាច
អ្វីដើម្បីតតាំងជាមួយក្រុមមន្ត្រីគ.ជ.បមកពីគណបក្សកាន់អំណាចរបស់នាយករដ្ឋមន្ត្រីហ៊ុន សែន
នោះទេ៕
0 comments:
Post a Comment