លោកស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត (គ.ជ.ប.)។
ចំណែកការទទួលពាក្យអ្នកសង្កេតការណ៍ជាតិ និងអន្តរជាតិ សម្រាប់ការបោះឆ្នោតជ្រើសតាំងសមាជិកព្រឹទ្ធសភាវិញ នឹងឈប់ទទួលនៅពាក់កណ្តាលខែកុម្ភៈ ឆ្នាំ ២០១៨នេះដែរ។
ក្នុងសេចក្តីប្រកាសព័ត៌មានរបស់ឋខ្លួនកាលពីថ្ងៃម្សិលមិញនេះ គ.ជ.ប. ប្រកាសថា ស្ថាប័ននេះ កំពុងដំណើរការនៃការដាក់ពាក្យ និងការទទួលពាក្យសុំចុះឈ្មោះភ្នាក់ងារគណបក្សនយោបាយ អ្នកសង្កេតការណ៍ជាតិ និងអន្តរជាតិ សម្រាប់ការបោះឆ្នោតជ្រើសតាំងសមាជិកព្រឹទ្ធសភា នីតិកាល ទី៤ ឆ្នាំ២០១៨នេះ។
គ.ជ.ប. ប្រកាសថា ខ្លួននឹងឈប់ទទួលពាក្យអ្នកសង្កេតការណ៍ជាតិនៅត្រឹមម៉ោង ៥កន្លះល្ងាចថ្ងៃទី១៥ ខែកុម្ភៈ ឆ្នាំ២០១៨ និងអ្នកសង្កេតការណ៍អន្តរជាតិនៅម៉ោង ៥កន្លះល្ងាចថ្ងៃទី២២ ខែកុម្ភៈ ខណៈការទទួលពាក្យសង្កេតការណ៍របស់ភ្នាក់ងារគណបក្សនយោបាយ នឹងបញ្ចប់នៅត្រឹមល្ងាចថ្ងៃនេះ។
គ.ជ.ប. បង្ហាញក្តីសង្ឃឹមថា គ្រប់គណបក្សនយោបាយ សមាគម អង្គការមិនមែនរដ្ឋាភិបាល អន្តរជាតិ និងគ.ជ.ប. គ្រប់លំដាប់ថ្នាក់ នឹងយកចិត្តទុកដាក់សហការល្អ ដើម្បីជំរុញឲ្យដំណើរការ បោះឆ្នោតជ្រើសតាំងសមាជិកព្រឹទ្ធសភា នីតិកាលទី៤ ឆ្នាំ២០១៨នេះ ប្រព្រឹត្តទៅប្រកបដោយ ជោគជ័យផងដែរ។
ការបោះឆ្នោតជ្រើសរើសសមាជិកព្រឹទ្ធសភា ដំបូងឡើយត្រូវបានកំណត់ធ្វើឡើងនៅថ្ងៃទី១៤ ខែមករាក្នុងឆ្នាំនេះ ប៉ុន្តែ ត្រូវបានលោកនាយករដ្ឋមន្ត្រី ហ៊ុន សែន ប្ដូរទៅថ្ងៃទី២៥ ខែកុម្ភៈវិញ។
ការបោះឆ្នោតអសកលនេះ គ្រោងនឹងធ្វើឡើងដោយពុំមានការចូលរួមពីគណបក្សសង្គ្រោះជាតិនោះឡើយ បន្ទាប់ពីអតីតបក្សប្រឆាំងដ៏ធំមួយនេះ ត្រូវបានតុលាការសម្រេចរំលាយចោលកាលពីពាក់កណ្ដាលខែវិច្ឆិកាឆ្នាំមុន ទៅតាមបណ្ដឹងរបស់រដ្ឋាភិបាល ហើយថ្នាក់ដឹកនាំ ១១៨រូបរបស់បក្សនេះទៀតសោត ក៏ត្រូវបានតុលាការហាមឃាត់មិនឲ្យធ្វើនយោបាយផងដែរ ក្រោមការចោទប្រកាន់ពីរដ្ឋាភិបាលថា មានជាប់ពាក់ព័ន្ធនឹងទង្វើ«ក្បត់ជាតិ»របស់មេដឹកនាំបក្សប្រឆាំង លោក កឹម សុខា។
លោកកឹម សុខានៅពេលនេះកំពុងជាប់ឃុំក្នុងពន្ធនាគារត្រពាំងផ្លុង នៅឡេីយ ហេីយលោកសម រង្ស៊ីអតីតប្រធានបក្សនេះ បានបង្កេីតចលនាសង្គ្រោះជាតិ នៅក្រៅប្រទេស៕
0 comments:
Post a Comment