.jpg)
នាយករដ្ឋមន្ត្រី ហ៊ុន សែនប្រតិកម្មនឹងលោកសម រង្ស៊ីដែលចោទថាលោកបាន
ទិញLike សម្រាប់ប្រជាប្រិយភាពនៅហ្វេសប៊ុក។
លោកនាយករដ្ឋមន្ត្រី
ហ៊ុន សែន បានប្រតិកម្មខ្លាំងៗសំដៅលើ លោក សម រង្ស៊ី ប្រធានចលនាសង្គ្រោះជាតិដែលកំពុងរស់នៅនីរទេសខ្លួនក្រៅប្រទេស
ហេីយបានប្ដឹងរូបលោកនាយករដ្ឋមន្ត្រីទៅក្រុមហ៊ុនហ្វេសប៊ុក (Facebook) រឿង ចំនួន
Likes ដែលមេចលនាថ្មីនេះ ចោទថា “ភាគច្រេីនសុទ្ធ តែក្លែងក្លាយ” ។ ថ្លែងក្នុងពិធីប្រគល់សញ្ញាបត្រជូននិស្សិតសាកលវិទ្យាល័យវេស្ទើន ប្រមាណជាង ៤,០០០ នាក់ នៅមជ្ឈមណ្ឌលកោះពេជ្យព្រឹកមិញនេះ លោក ហ៊ុន សែន បានហៅ លោក សម រង្ស៊ី ថាជាមនុស្ស «ឆ្លួតឡប់» ដែលប្ដឹងលោកព្រោះបាន Likes ចាញ់រូបលោក។
លោកក៏ប្រតិកម្មផងដែរ ចំពោះលោក សម រង្ស៊ី ដែលបានប្តឹងទៅ ក្រុមហ៊ុន Facebook ដោយចាត់ទុកទង្វើរបស់លោក សម រង្ស៊ី ជាទង្វើរបស់មនុស្សឆ្កួត។
លោកនិយាយថា ៖ «សុខៗ ទៅប្ដឹងខ្ញុំទៅហ្វេសប៊ុក ឱព្រះអើយ។ ចុះអានៅក្នុងហ្នឹងតើខ្ញុំដឹងថាអាហ្នឹងមកពីណាអានៅក្នុងនេះ [ហ្វេសប៊ុក] ពិតមែនហើយ កំពុង live ផ្ទាល់ផង ធម្មតាគេ live នៅក្នុងពេលនេះ។
លោកហ៊ុន សែន ថាលោក «មិនដឹងអាណា like មកពីណា» ទេ និងឲ្យក្រុមហ៊ុន ហ្វេសប៊ុកទទួលខុសត្រូវខ្លួនឯងទៅ ដោយនិយាយថា ៖ «ឲ្យហ្វេសប៊ុកទទួលខុសត្រូវទៅ ឯងយក like មកឲ្យអញ។ អញដឹង អ្នកណាទៅបញ្ជាអាហ្នឹងទៅរួច។ យីអានេះលេងត្រឹមតែហ្វេសប៊ុកចាញ់គេ ក៏វារឿងដែរ ឆ្លួតឡប់តែម្ដង ហើយធ្វើនយោបាយ ដាក់ចេញនយោបាយពេលណាដាក់ចេញកំចាត់គេរហូត។ មានស៊ីអត់សែន មានសែន អត់ស៊ី»។
ដោយថ្លែងថា លោកបាន អនុគ្រោះដល់លោក សម រង្ស៊ី ច្រើនលើកច្រើនសារហើយ តែមិនព្រមកែខ្លួន។
ជាមួយគ្នានេះ លោកថាលោក នឹងអនុវត្ត នយោបាយរបស់ទណ្ឌិត សម រង្ស៊ី «មានស៊ីអត់សែន មានសែនអត់ស៊ី»។
លោកថ្លែងថា៖ «ខ្ញុំពង្រឹងនូវការអនុវត្តទ្រឹស្ដីរបស់អ្នកឯងមានឯងអត់អញមានអញអត់ឯង ព្រោះអ្នកឯងអត់ព្រមកែ»។
ប្រសាសន៍ឆ្លើយតបរបស់លោកនាយករដ្ឋមន្ត្រី កើតមានក្រោយលោក សម រង្ស៊ី ដែលកំពុងស្ថិតនៅនីរទេសខ្លួនក្រៅប្រទេស បានដាក់ពាក្យប្តឹងទៅតុលាការសហរដ្ឋអាមេរិក ដើម្បីតម្រូវឲ្យក្រុមហ៊ុនអាមេរិកាំង Facebook ផ្តល់ព័ត៌មាន និងទិន្នន័យ ដែលបញ្ជាក់ថាលោកនាយករដ្ឋមន្ត្រី «ប្រើប្រាស់បណ្តាញសង្គម Facebook ក្នុងគោលបំណងបំភ័ន្តសាធារណមតិ ដោយបំប៉ោងប្រជាប្រិយភាពក្លែងក្លាយរបស់គាត់»។
លោក រង្ស៊ី បានសរសេរលើទំព័រហ្វេសប៊ុកលោក ថា លោកហ៊ុន សែន ក៏បានប្រើប្រាស់បណ្តាញ Facebook នេះ ដើម្បីគំរាមកំហែងប្រជារាស្ត្រខ្មែរ និងផ្សព្វផ្សាយព័ត៌មានមិនពិត ក៏ដូចជាភូតកុហក អ្នកដទៃ និពង្រឹងអំណាចផ្តាច់ការរបស់គាត់ នៅប្រទេសកម្ពុជា ដែលជាទង្វើផ្ទុយពីក្រមសីលធម៌ របស់ក្រុមហ៊ុន Facebook។
តាមរបាយការណ៏របស់សហគ្រាសទំនាក់ទំនងសាធារណះនៃក្រុមហ៊ុន Burson –Marsteller ដែលមានមូលដ្ឋាននៅសហរដ្ឋអាមេរិក បានប្រកាសជាផ្លូវការកាលពីថ្ងៃ ទី ៩ កុម្ភះ ឆ្នំា ២០១៨ ថា លោកនាយករដ្ឋមន្ត្រី ហ៊ុន សែនគឺជាមេដឹកនាំសាធារណះពិភពលោក ជាប់ចំណាត់ថ្នាក់ទី៣ ដែលមានប្រជាប្រិយភាពជាងគេបំផុតលេីបណ្តាញផ្សព្វផ្សាយសង្គមហ្វេសប៊ុក (Facebook) បន្ទាប់ ពីប្រធានាធិបតីឥណ្ឌា លោក ណារិនដ្រា ម៉ូឌី ដែលជាប់ចំណាត់ថ្នាក់លេខ២ ហេីយលោក ដូណាល់ ត្រាំ ប្រធានាធិបតីសហរដ្ឋអាមេរិក ជាប់ចំណាត់ថ្នាក់លេខ១៕
0 comments:
Post a Comment